ލަމްޕާޑު ބުނަނީ މައުންޓަކީ މަތީ ފަންތީގެ ކުޅުންތެރިޔެއް ކަމަށް

ޗެލްސީއަށް ކުޅެމުން އަންނަ އިންގްލެންޑުގެ އެޓޭކިންގ މިޑްފީލްޑަރު، މޭސަން މައުންޓަކީ މަތީ ފަންތީގެ ކުޅުންތެރިޔެއް ކަަމަށް އެ ޓީމުގެ ކޯޗު ފްރޭންކް ލަމްޕާޑު ބުނެފިއެވެ.

އޭނާ މިހެން ބުނީ އިނގިރޭސި ޕްރިމިއަރ ލީގުގައި ބްރައިޓަންއާ ދެކޮޅަށް އަމިއްލަ ދަނޑުގައި ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަދައްކަމުންނެވެ. ލަމްޕާޑު ބުނީ، މިހާތަނަށް އައިއިރުވެސް މައުންޓް ވަނީ އޭނާގެ ފެންވަރު ދައްކައިދީފަައި ކަމަށާއި، އޭނާއަކީ މިހާރުވެސް މަތީ ފަންތީގައި ހިމެނޭނެ ކުޅުންތެރިޔެއް ކަމަށެވެ. އޭނާ ބުނީ އެންމެ ފުރަތަމަ ދުވަހުން ފެށިގެންވެސް މައުންޓް ހުރީ މޮޅަށް ކުޅެ، އޭނާގެ ހުނަރު ދައްކަން ކެތްމަދުވެފައި ކަމަށެވެ. ލަމްޕާޑު ފާހަގަކުރިގޮތުގައި މައުންޓުގެ ގާބިލްކަމާއި ހުނަރާމެދު އެއްވެސް މީހަކު ސުވާލު އުފައްދައިފިނަމަ، އޭނާއަށް ފުޓުބޯޅައިން ފެންނަނީ މަދު އެއްޗެއް ކަމަށެވެ. އެކަމާ ލަމްޕާޑު ވަނީ ސުވާލުވެސް އުފައްދާފައެވެ. ލަމްޕާޑު ބުނީ، ޗެލްސީގެ ކުރީގެ ދެ ކޯޗުން ކަަމަށްވާ ތޯމަސް ޓުޗެލް، ގްރަހަމް ޕޮޓާ، އަދި އިނގިރޭސި ގައުމީ ޓީމުގެ ކޯޗު ގަރެތު ސައުތުގޭޓު ގާތު އެވާހަކަ އެހުމުންވެސް ދޭނީ ހަމަ އެއް ޖަވާބެއް ކަމަށެވެ.

މައުންްޓް އޭނާގެ ސީނިއަރ ކެރިއަރު ފެށީވެސް ޗެލްސީންނެވެ. 2017 ވަނަ އަހަރު އެ ކުލަބާ ގުޅުނުފަހުން އޭނާ ވަނީ ލޯނު އެއްބަސްވުމެއްގެ ދަށުން ދެ ކުލަބަކަށް ކުޅެފައެވެ. މައުންޓް ވަނީ މިހާތަނަށް ޗެލްސީއަށް 193 މެޗު ކުޅެދީ، 33 ލަނޑު ޖަހައިފައެވެ. ޗެލްސީއާއެކު އޭނާ ވަނީ ޔުއެފާ ޗެމްޕިއަންސް ލީގު، ޔުއެފާ ސުޕަރ ކަޕް، އަދި ފީފާ ކުލަބް ވޯލްޑް ކަޕް ކާމިޔާބު ކޮށްފައެވެ. އޭނާ އަންނަނީ 2019 ވަނަ އަހަރުން ފެށިގެން އިންގްލެންޑުގެ ގައުމީ ޓީމަށްވެސް ކުޅެމުންނެވެ.