ސަލާމަތީ ސަބަބުތަކަށްޓައި އެލް ކްލެސިކޯ މެޗު ފަސްކޮށްފި
18 އޮކްޓޯބަރު 2019 | ހުކުރު 13:19މެޗު ކުޅެން ކުރިން ހަމަޖެހިފައި އޮތީ މި މަހުގެ 26 ވަނަ ދުވަހު
ރެއާލް އަދި ބާސާ ބައްދަލުކުރި މެޗެއްގެ ތެރެއިން
ސަލާމަތީ ސަބަބުތަކަށްޓަކައި ސްޕެނިޝް ލަލީގާގައި ބާސެލޯނާ އާއި ރެއާލް މެޑްރިޑް ބައްދަލުކުރާ އެލްކްލެސިކޯ މެޗު ފަސްކޮށްފިއެވެ.
ބާސާގެ ކޭމްޕްނޯގައި ކުޅުމަށް މި މަހުގެ 26 ވަނަ ދުވަހު ކުޅުމަށް ހަމަޖެހިފައިވާ މި މެޗު ފަސްކުރަން ނިންމާފައިވަނީ އެދުވަހު ބާއްވަން ރާވާފައިވާ މުޒާހަރާގެ ސަބަބުންނެވެ.
ރޯޔަލް ސްޕެނިޝް ފުޓްބޯލް ފެޑެރޭޝަން (އާރްއެފްއީއެފް) އިން ނެރުނު ބަޔާނެއްގައި ބުނީ، ސަލާމަތީ ސަބަބުތަކަށްޓަކައި އެލްކްލެސިކޯ މެޗު ފަސްކުރަން ބޭއްވުނު އެކްސްޓްރާ އޯޑިނަރީ ބައްދަލުވުމުގައި ނިންމާފައިވާ ކަމަށާއި، އަންނަ ހޯމަ ދުވަހުގެ ކުރިން މެޗު ކުޅެން ބޭނުންވާ ދުވަސް އަންގައިދޭން އެދިފައިވާނެ ކަމަށެވެ.
އެގޮތުން އާރްއެފްއީއެފް އިން ބުނީ، ރެއާލް އާއި ބާސާއިން ބޭނުންވާ ދުވަހެއްގައި ސަލާމަތީ ފިޔަވަޅުތަކާ އެކު މެޗު ބާއްވަން ތައްޔާރު ކަމަށާއި، ދެޓީމު މަޝްވަރާކޮށް ދުވަހެއް ދިނަސް އެންމެ ރަނގަޅު ކަމަށެވެ.
ނަމަވެސް އާރްއެފްއީއެފް އިން ބުނީ، މެޗު ކުޅޭނެ ދުވަހަކާ މެދު ދެ ކްލަބުން އެއްބަސްނުވެވިއްޖެ ނަމަ މެޗު ކުޅޭނެ ދުވަސް ނިންމާނީ އާރްއެފްއީއެފްއިން ކަމަށެވެ.
ރެއާލް މެޑްރިޑާއި ބާސެލޯނާ ބައްދަލުކުރާ މެޗަކީ ލީގުގައި ދެ ޓީމަށް ވެސް އެންމެ މުހިންމު މެޗެވެ. އަދި އެންމެ ގިނަ ބަޔަކު އުންމީދު ކުރާ މެޗުވެސްމެއެވެ.
