ރާއްޖެއަށް 5 ކިލޯ ޑްރަގް އެތެރެކުރި އިންޑިއާ މީހާގެ ބަންދަށް 3 ދުވަސް
އޭނާއަކީ އިތިއޯޕިއާއިން ވައިގެ މަގުން ރާއްޖެ އައި، އިންޑިޔާ މީހެއް
އިތޯޕިއާއިން އައި އިންޑިއާ މީހާގެ އަތުން އަތުލައިގަތް މަސްތުވާތަކެތި
ރާއްޖެއަށް ޑްރަގް އެތެރެކުރި އިންޑިއާ އަންހެނަކު 3 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
އޭނާއަކީ އިތިއޯޕިއާއިން ވައިގެ މަގުން ރާއްޖެ އައި އިންޑިޔާ މީހެކެވެ. ބުރާސްފަތި ދުވަހު ކްރިމިނަލް ކޯޓުގެ ގާޒީ ހަސަން ސައީދު ވަނީ އޭނާ 3 ދުވަހަށް ބަންދުކުރުމަށް އަމުރުކުރައްވާފައެވެ.
އޭނާގެ ބަންދާމެދު ގޮތެއް ނިންމުމުގެ މަޖިލީހުގައި، ތަރުޖަމާނަކު މިވަގުތަށް ހަމަޖެހިފައި ނެތްކަމަށް ބުނެފައިވެއެވެ. ވުމާއެކު، ދެން ބޭއްވޭ މަޖިލީހެއްގައި ތަރުޖަމާނާއެކު އައުމަށް އޭނާއަށް ވަނީ އަންގާފައެވެ.
ކަސްޓަމްސްއިން ބުނެފައިވަނީ މި ތަކެތި އަތުލައިގެންފައިވަނީ، ވައިގެމަގުން ގިނަ އަދަދެއްގެ މަސްތުވާތަކެތި ރާއްޖެއަށް އެތެރެކޮށްފާނެކަމަށް ކަސްޓަމްސްއަށް ލިބުނު އިންޓެލިޖެންސް މައުލޫމާތަކާ ގުޅިގެން، 12 އެޕްރީލް 2023 ވަނަ ދުވަހު އިތިއޯޕިއާއިން ރާއްޖެ އައި އިންޑިއާގެ އުމުރުން 56 އަހަރުގެ އަންހެން ފަސިންޖަރަކު ހުއްޓުވައި، ބަލައިފާސްކުރުމުގެ ތެރޭގައެވެ.
މިގޮތުން ބަލައިފާސްކުރުމުގެތެރޭގައި މަސްތުވާތަކެތި ކަމަށް ޝައްކުކުރެވޭ ތަކެތި ފެނުމުން، އެ ތަކެތި ފުރަތަމަ މަރުހަލާގައި ކަސްޓަމްސްއިން ތަހުލީލުކުރިއިރު، އަތްދަބަހުން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ ކޮކެއިނަށް، އަދި ލަގެޖުން ފެނުނު ތަކެތި މަސްތުވާތަކެތީގެ ބާވަތެއް ކަމަށްވާ ހެރޮއިނަށް ވަނީ ޕޮޒިޓިވްވެފައެވެ.
އަދި އޭނާގެ އަތްދަބަހާއި ފޮށީގައި ރައްކާކޮށްފައި ހުރި 1.180 ކިލޯ ކޮކެއިން، އަދި 4.2 ކިލޯ ހެރޮއިނާއެކު ޖުމްލަ 5.380 ކިލޯގެ މަސްތުވާތަކެތި އަތުލައިގެންފައިވާއިރު، މިތަކެތީގެ މަގުމަތީ އަގު 9 މިލިއަން ރުފިޔާއަށްވުރެ މަތިވާނެކަމަށް ލަފާކުރެވޭކަމަށް ކަސްޓަމްސްއިން ބުނެއެވެ.
މި މައްސަލަ އިތުރަށް ތަހުގީގުުކުރުމަށްޓަކައި، މި ފަސިންޖަރާއި އޭނާގެ އަތުން އަތުލައިގަނެވުނު މަސްތުވާތަކެތި ދިވެހި ފުލުހުންގެ ޚިދުމަތާ ވަނީ ހަވާލުކުރެވިފައެވެ.
