އުތުރު ކޮރިއާއިން އައު އިންޓަރކޮންޓިނެންޓަލް ބެލެސްޓިކް މިސައިލް ޓެސްޓުކޮށްފި
15 އެޕްރީލު 2023 | ހޮނިހިރު 04:43އުތުރު ކޮރިއާއިން އުފެއްދި އެންމެ ބޮޑެތި ބެލެސްޓިކް މިސައިލްތައް އުފައްދާފައިވަނީ "ލިކުއިޑް ފިއުލް" ބޭނުންކޮށްގެން
އުތުރު ކޮރިއާއިން އެންމެ ފަހުން ޓެސްޓުކުރި "ސޮލިޑް-ފިއުލް" އިންޓަރކޮންޓިނެންޓަލް ބެލެސްޓިކް މިސައިލް
އުތުރު ކޮރިއާއިން އަނެއްކާވެސް އައު މިސައިލެއް ޓެސްޓުކޮށްފިއެވެ.
އުތުރު ކޮރިއާއިން އެންމެ ފަހުން ޓެސްޓުކޮށްފައި ވަނީ "ސޮލިޑް-ފިއުލް" އިންޓަރކޮންޓިނެންޓަލް ބެލެސްޓިކް މިސައިލެކެވެ. މި މިސައިލް އެގައުމުން ޓެސްޓުކޮށްފައިވަނީ ބުރާސްފަތި ދުވަހު ކަމަށް އެގައުމުން އިއުލާންކޮށްފައިވަނީ ހުކުރު ދުވަހުއެވެ.
އުތުރު ކޮރިއާގެ އައު މިސައިލް އެގައުމުން ޓެސްޓުކޮށްފައިވަނީ އެގައުމުގެ ލީޑަރު، ކިމް ޖޮންގ އުންގެ ބެއްލެވުމުގެ ދަށުންނެވެ. ކިމް ވަނީ، މި މިސައިލަކީ އެގައުމުގެ ދުޝްމަނުންގެ ހިތްތަކަށް ބިރުވެރިކަން ގެނުވާނެ ހަތިޔާރެއް ކަމަށް ވިދާޅުވެފައެވެ.
ހްވަސޮންގް-18ގެ ނަން ދެވިފައިވާ މި މިސައިލް ފޮނުވާލާފައިވަނީ ޕްޔޮންގްޔޮންގާ ކައިރި ހިސާބަކުންނެވެ. ގާތްގަޑަކަށް 1،000 ކިލޯމީޓަރަށް ދަތުރުކުރުމަށްފަހު މިސައިލް ކަނޑަށް ވެއްޓިފައިވަނީ އެގައުމުގެ އިރުމަތީފަރާތުންނެވެ.
މި މިސައިލް ޓެސްޓިންގ ބެއްލެވުމަށް ކިމްގެ އަރިހުގައި އޭނާގެ އަނބިކަނބަލުންނާއި ދަރިކަނބަލުންވެސް ވަނީ ބައިވެރިވެވަޑައިގަންނަވާފައެވެ.
މާހިރުން ފާހަގަކުރާގޮތުގައި މިއީ އުތުރު ކޮރިއާއިން ސޮލިޑް ފިއުލް ބޭނުންކޮށްގެން އިންޓަރމީޑިއޭޓް-ރޭންޖް ނުވަތަ އިންޓަރކޮންޓިނެންޓަލް ބެލެސްޓިކް މިސައިލެއް އުފެއްދި ފުރަތަމަ ފަހަރެވެ.
މީގެ ކުރިން އެ ގައުމުން އުފެއްދި އެންމެ ބޮޑެތި ބެލެސްޓިކް މިސައިލްތައް އުފައްދާފައިވަނީ "ލިކުއިޑް ފިއުލް" ބޭނުންކޮށްގެންނެވެ.
ދެކުނު ކޮރިއާގެ ޑިފެންސް މިނިސްޓްރީން ވަނީ، އުތުރު ކޮރިއާގެ އައު މިސައިލް އަދިވެސް އޮތީ އުފެއްދުމުގެ މަރުހަލާގައި ކަމަށް ބުނެފައެވެ. އަދި އެ މިސައިލް އުފައްދައި ނިންމަން އިތުރު ވަގުތު ނަގާނެކަމަށާއި، އިތުރު ޓެސްޓުތައްވެސް އުތުރު ކޮރިއާއިން ކުރަންޖެހޭނެކަން ދެކުނު ކޮރިއާއިން ފާހަގަކުރެއެވެ.
