ރަންތާޖު ޤުރުއާން މުބާރާތުގެ ތިންވަނަ އެލިމިނޭޝަން ރައުންޑް މިރޭ ރާއްޖެ ޓީވީން ދައްކާނެއެވެ.

ރަންތާޖު މުބާރާތް ފަށައިފައިވަނީ 24 މަރޗް 2023 ވީ ހުކުރު ދުވަހުގެ ރޭ އެވެ. އެ މުބާރާތް ފެއްޓުމުގެ ރަސްމިއްޔާތު ޝަރަފްވެރިކޮށްދެއްވީ ނައިބުރައީސް ފައިސަލް ނަސީމްއެވެ. ފެށުމުގެ ރަސްމިއްޔާތަށްފަހު މުބާރާތުގެ ފުރަތަމަ ކިޔެވުން އެ ރޭ ވަނީ ފަށައިފައެވެ.

މިރޭ ރާއްޖެ ޓީވީން ގެނެސްދޭނީ ރަންތާޖު ޤުރުއާން މުބާރާތުގެ ހަތަރު ވަނަ ޝޯއާއި ތިން ވަނަ އެލިމިނޭޝަން އެވެ. މިރޭގެ އެލިމިނޭޝަން ރައުންޑުގައި ދެ ބައިވެރިއަކު މުބާރާތާ އަލްވަދާއު ކިޔާނެއެވެ. މިރޭ 9:30ގައި ރާއްޖެ ޓީވީން ރަންތާޖު ޤުރުއާން މުބާރާތް ދައްކާނެއެވެ.

ރަންތާޖު ޤުރުއާން މުބާރާތުގެ ދެވަނަ ބުރުން ވަކިވެގެންދިޔަ ހަތަރު ބައިވެރިން އެންމެ ފަހު ޝޯ ގައި ވަނީ އިއުލާންކޮށްފައެވެ. އެލިމިނޭޝަން ރައުންޑުގައި 15 ބައިވެރިންގެ ތެރެއިން ހަތަރު ބައިވެރިއަކު މުބާރާތަށް ވަނީ އަލްވަދާއު ކިޔާފައެވެ. އެއީ މުބާރާތުން 15 ވަނައަށް ދިޔަ އިޖާޒަތު ހަމޫދާ އަބްދުﷲ އާއި 14 ވަނައަށް ދިޔަ އާސިމާ އާދަމް އާއި 13 ވަނައަށް ދިޔަ ލިއުޝާ ހަސަނާއި 12 ވަނައަށް ދިޔަ އާއިޝަތު ޝަރުފާއެވެ.

6 އެޕިސޯޑަށް ކުރިއަށްގެންދާ މި މުބާރާތުން އެއްވަނަ އަށް އަންނަ ފަރާތަކަށް ތިން ލައްކަ ރުފިޔާ، ދެވަނަ އަށް ދާ ފަރާތަކަށް އެއް ލައްކަ ރުފިޔާ އަދި ތިން ވަނައަށް ދާ ފަރާތަކަށް 75000 ރުފިޔާ ލިބޭނެއެވެ.

މުބާރާތުގެ ބައިވެރިންނަށް އިނާމު ހުށަހެޅުމުގެ ފުރުސަތު ހުޅުވާލާފައިވާއިރު، އެލިމިނޭޓް ވެގެންދާ ފަރާތްތަކަށް ވެސް ގިނަ އިނާމުތަކެއް ލިބޭނެއެވެ.

16 އަހަރާއި 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މި މުބާރާތަކީ މިހާތަނަށް ރާއްޖޭގައި ބާއްވާ މިފަދަ އެންމެ ބޮޑު މުބާރާތެވެ. މި މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.