އަގަށް ބަދަލު ގެނައީ ކުއްލިއަކަށް ނޫން، އެއީ ކުންފުންޏަށް ފައިދާ ހޯދުމުގެ ނިޔަތުގައި ކުރި ކަމެއް ނޫން: ވެމްކޯ
ވިޔަފާރިތަކުން ނަގާ ކުންޏަށް، ލީޓަރަކަށް 1.86 ރުފިޔާ ހޭދަކުރޭ
އެސްއޯއީ ކޮމިޓީގެ ބައްދަލުވުން
ވެމްކޯގެ ޚިދުމަތުގެ އަގަށް ބަދަލު ގެނައީ ކުއްލިއަކަށް ނޫންކަމަށާއި, އެއީ ކުންފުންޏަށް ފައިދާ ހޯދުމުގެ ނިޔަތުގައި ކުރި ކަމެއް ނޫންކަމަށް އެ ކުންފުނިން ބުނެފިއެވެ.
ރައްޔިތުންގެ މަޖިލީހުގެ ކޮމިޓީގައި ވާހަކަފުޅުދައްކަވަމުން ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވީ، ޚިދުމަތުގެ އަގަށް ބަދަލު ގެނެސްފައިވަނީ ވަރަށް ގިނަ ކަންކަން ބެލުމަށްފަހު ކަމަށެވެ. އެގޮތުން ގޭބިސީތަކަކީ ވެމްކޯގެ އެންމެ ބޮޑު ކަސްޓަމަރ ބޭސް ކަމަށް ވީނަމަވެސް ގޭބީސީތަކަށް ޚިދުމަތްދޭ އަގަށް ބަދަލުގެނެސްފައި ނުވަނީ ރައްޔިތުންނަށް ދަތިނުވާނެ ގޮތަށް އަމަލުކުރުމުގެގޮތުން ކަމަށެވެ.
އަދި އަގަށް ބަދަލުގެނައީ ކުންފުނީގެ ޚަރަދުތަކަށް ރިއާޔަތްކުރުމަށްފަހު ކޮންސަލްޓަލްޓުންގެ މަޝްވަރާއާއެކު ކަމަށް އޭނާ ވިދާޅުވިއެވެ. އެއީ ކުންފުންޏަށް ވަމުންދާ ގެއްލުން ފޫބެއްދުމުގެގޮތުން އެޅި ފިޔަވަޅެއް ކަމަށްވެސް ސިރާޖް ވިދާޅުވިއެވެ. އަދި އަގުތަކަށް ބަދަލު ގެނެސްފައިވަނީ ކުއްލިއަކަށް ނޫންކަމަށާއި، ބަދަލު ގެނައުމުގެ ކުރިން އެކަށީގެންވާ ވަގުތުވެސް ދީފައިވާކަމަށް އޭނާ ވިިދާޅުވިއެވެ.
އަގު ބޮޑުކުރީ ސަރުކާރުގެ އިދާރާތަކާއި ކުންފުނިތަކުގެ ކުނި އުކައިދޭ އަގުތަކެވެ. އަދި ކުނި ވަކިނުކޮށް ގެންނަ ފަރާތްތަކުންވެސް ފީ ނަގާގޮތަށް ވަނީ ހަމަޖައްސާފައެވެ. ނަމަވެސް އާންމު ގެތަކާއި ވިޔަފާރިތަކުން ނަގާ ފީތަކަށް ބަދަލެއް ގެނެސްފައެއް ނުވެއެވެ. ވެމްކޯގެ ޚިދުމަތުގެ އަގަށް ބަދަލު ގެނައިނަމަވެސް، އެ ބަދަލުތަކަކީ ވިޔަފާރީގެ އުސޫލުން ގެނައި ބަދަލުތަކެއް ނޫންކަމަށް ސިރާޖު ވަނީ ވިދާޅުވެފައެެވެ.
ވެމްކޯއިން މިހާރު އޮޕަރޭޝަނަށް ކުރަމުންދާ ހޭދައިގެ ތަފްސީލްތަކަށް ބަލާއިރު؛ ވިޔަފާރިތަކުން ނަގާ ކުންޏަށް، ލީޓަރަކަށް 1.86 ރުފިޔާ ހޭދަކުރާއިރު, ކޯލް އެންޑް ޕިކަޕް ސަރވިސްއަށް 3.88 ލާރި ހޭދަވާކަމަށް އޭނާ ވިދާޅުވިއެެވެ. ޓްރާސްފަރގައި ކިލޯއަކަށް 72 ލާރި، އަދި ތިލަފުއްޓަށް ވޭސްޓް ޕްރޮސެސްކުރުމަށް 1.70 ރުފިޔާ ހޭދަކުރެއެވެ.
