ފުރަތަމަ ލެގުގައި ޗެލްސީ ބަލިކޮށް ރެއާލްއިން އިތުބާރު ބޮޑުކޮށްފި

ޔުއެފާ ޗެމްޕިއަންސް ލީގުގެ ކުއާޓާ ފައިނަލް ފުރަތަމަ ލެގުގައި ޗެލްސީގެ މައްޗަށް ކުރި ހޯދައިގެން ރެއާލް މެޑްރިޑުން އިތުބާރު ބޮޑުކޮށްފިއެވެ.

އަމިއްލަ ދަނޑުގައި ރެއާލްއިން ފުރަތަމަ ލެގު ކާމިޔާބުކުރީ 2-0 ނެވެ. މެޗުގެ ދެވަނަ ހާފްގެ ކުރީކޮޅު ޗެލްސީގެ ބެން ޗިލްވެލްއަށް ސީދާ ރަތްކާޑެއް ދެއްކުމުން ބޮޑުބައި އެޓީމުން ކުޅުނީ އެއް ކުޅުންތެރިއަކު މަދުކޮށެވެ. އެއީ ރޮޑްރިގޯއަށް ލަނޑުޖަހަން ލިބުނު ފުރުޞަތެއްގައި ކުރި ފައުލަކަށް ދެއްކި ރަތްކާޑެކެވެ. އެކަމަކު އޭރުވެސް ރެއާލްއިން ވަނީ އެއް ލަނޑު ޖަހާ ލީޑް ހޯދާފައެވެ. ރެއާލްއަށް ފުރަތަމަ ލަނޑު ޖަހާ ކުރިހޯދައިދިނީ ކެޕްޓަން ބެންޒެމާ އެވެ. ރެއާލްއަށް ފުރިހަމަ މޮޅެއް ކަށަވަރުވީ 74 ވަނަ މިނެޓުގައި އަސެންސިއޯ ޖެހި ލަނޑުންނެވެ. ރެއާލްގެ ދެ ލަނޑު ޖަހަންވެސް ފުރުޞަތު ތަނަވަސްކޮށްދިނީ ވިނީޝިއުސް ޖޫނިއަރ އެވެ.

އެންޗެލޮޓީ ކުރީގެ ކްލަބްގެ މައްޗަށް ފުރަތަމަ ލެގުގައި ހޯދި މޮޅާއެކު ޗެލްސީގެ ދަނޑުގައި ކުޅޭ ދެވަނަ ލެގަށް ރެއާލް މެޑްރިޑް ދާނީ އިތުބާރާއެކުއެވެ. ޗެލްސީގެ ކޯޗުކަމާ ދެވަނަ ފަހަރަށް ހަވާލުވި އެޓީމްގެ ލެޖެންޑް ލަމްޕާޑްގެ އިރުޝާދުގެ ދަށުން ކުޅުނު ދެ މެޗުންވެސް ޗެލްސީ ވަނީ ބަލިވެފައެވެ.

ޗެލްސީގެ ދަނޑުގައި އަންނަ ހަފްތާގެ އަންގާރަ ދުވަހުގެރޭ ކުޅޭ ދެވަނަ ލެގުން ދެ ލަނޑަށްވުރެ ފަރަގު ބޮޑު ނަތީޖާއަކުން މޮޅުވެގެން ނޫންގޮތަކަށް ޗެލްސީއަށް މިހާރު ސެމީފައިނަލްގެ ފުރުޞަތެއް ނެތެވެ. މިހާލަތުގައި އޮތްއިރު ޗެލްސީން އެންމެ ފަހުން ކުޅުނު ހަތަރު މެޗުގައިވެސް ގޯލެއް ނުޖެހެއެވެ.