ވެލެންސިޔާއިން ރިލީޒް ހޯދައިގެން، ބިޗަޑް ދެވަނަ ޑިވިޝަން ކުޅެން ނިއުރޭޑިއަންޓަށް

ކްލަބް ވެލެންސިޔާއިން ރިލީޒް ހޯދައިގެން, މިދުހަތު ފަހުމީ (ބިޗަޑް) ދެވަނަ ޑިވިޝަން ކުޅެން ނިއުރޭޑިއަންޓަށް ސޮއިކޮށްފިއެވެ.

މިދިޔަ ސީޒަންގައި ވެލެންސިޔާއިން ޕްރެޒިޑެންޓްކަޕް ހޯދިއިރު މުހިއްމު ދައުރެއް އަދާކުރި ބިޗަޑް ނިއުރޭޑިއަންޓަށް ކުޅެން ވެލެންސިޔާއިން ވަނީ ރިލީޒް ދީފައެވެ. ބިޗަޑްއަކީ މީގެކުރިންވެސް ދެ ފަހަރެއްގެ މަތީން ނިއުރޭޑިއަންޓަށް ފުރަތަމަ ޑިވިޝަންގައި ކުޅެ ކާމިޔާބު ހޯދާފައިވާ މިޑްފީލްޑަރެކެވެ. އޭނާ އެންމެ ފުރަތަމަ ނިއުރޭޑިއަންޓަށް ކުޅުނީ 2013 ވަނަ އަހަރުއެވެ. އޭގެފަހުން ދެ އަހަރު އުފަން ރަށް މަހިބަދޫ ޓީމްގެ ކެޕްޓަނެއްގެ ގޮތުގައި ފުރަތަމަ ޑިވިޝަންގައި ކުޅުނީ ރަށު ޓީމަށެވެ. ދެވަނަ ފަހަރަށް ނިއުރޭޑިއަންޓަށް ބަދަލުވީ 2017 ވަނަ އަހަރުއެވެ. ދެވަނަ ޑިވިޝަންގައިވެސް ބިޗަޑް ރަށު ޓީމަށް ކުޅުނެވެ.

ކްލަބް ވެލެންސިޔާއާއެކުވެސް އޭނާ ދެވަނަ ޑިވިޝަނަށް ކުޅެނެވެ. ދެވަނަ ޑިވިޝަންގެ އެހެން ބައެއް ކްލަބްތަކަށްވެސް ބިޗަޑް ކުޅުނެވެ. އޭގެތެރޭގައި ޖޭޖޭ ސްޕޯރޓްސް ކްލަބް ހިމެނެއެވެ. އޭނާ 2017 ވަަނަ އަހަރު ނިއުރޭޑިއަންޓަށް ކުޅުމަށްފަހު ބަދަލުވީ ޖޭޖޭއަށެވެ.

ނިއުރޭޑިއަންޓާއެކު ދިވެހި ލީގާއި, ޕްރެޒިޑެންޓް ކަޕާއި, އެފްއޭކަޕްވެސް ހޯދި ބިޗަޑްގެ ސޮއި ނިއުރޭޑިއަންޓުން މިހޯދީ، އަލުން ފުރަތަމަ ޑިވިޝަނަށް ޕްރޮމޯޓްވުމަށް ކުރާ މަސައްކަތަށެވެ. ބިޗަޑްގެ އިތުރުން ނިއުރޭޑިއަންޓުން ވަނީ ފުރަތަމަ ޑިވިޝަންގައި ކުޅެމުން އައި މިޑްފީލްޑަރ ޔަސްފާދު ހަބީބު (މުލަކޭ)އާއި އިޝާން އިބްރާހީމް (ސައްޓު)ގެ ސޮއިވެސް ހޯދާފައެވެ. ނިއުރޭޑިއަންޓުން ދެވަނަ ޑިވިޝަންގެ އިތުރުން އެފްއޭކަޕްގައިވެސް މިއަހަރު ވާދަކުރާނެއެވެ.