ހޮނިހިރު ދުވަހު ބާއްވާ ގުރައިދޫ ދާއިރާގެ ބައި އިލެކްޝަނަށް ވާންޖެހޭ ހުރިހާ ތައްޔާރީތައް ވަނީ ނިމިފައިކަމަށާއި, ހުކުރު ދުވަހު އިލެކްޝަންސް ކޮމިޝަންގެ ޓީމުތައް އެ ދާއިރާގެ ރަށްތަކަށް ފުރާނެކަމަށް، އިލެކްޝަންސް ކޮމިޝަން(އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.
އިންތިޚާބުގެ އެންމެ ފަހުގެ ތައްޔާރީތަކާ ގުޅޭގޮތުން "ރާއްޖެއެމްވީ"ން ދެންނެވި ސުވާލަކަށް ޖަވާބު ދެއްވަމުން ފުއާދު ވިދާޅުވީ އިދާރީގޮތުން ވާންޖެހޭ ހުރިހާ ތައްޔާރީތައް ވަނީ ވެނިމިފައި ކަމަށެވެ.
ގުރައިދޫ ދާއިރާގެ؛ ގުރައިދޫގައި ދެ ފޮށި، މާފުށީގައި ދެ ފޮށި، އަދި ގުޅީގައި ވޯޓު ފޮއްޓެއް ބަހައްޓާނެއެވެ. އަދި މާލޭގައި އިއްޒުއްދީން ސްކޫލްގައި ވޯޓު ފޮށި ބަހައްޓާނެއެވެ.
ރަމަޟާން މަހު އިންތިޚާބު ބާއްވަންޖެހޭތީ އެކަމާ ގުޅޭގޮތުން ފުއާދު ވިދާޅުވީ އާންމު ގޮތެއްގައި މަސައްކަތްކުރަނީ ރަމަޟާން މަހު އިންތިޚާބު ނުބާއްވައި ވޭތޯކަމަށެވެ. ނަމަވެސް ގާނޫނު ބުނާގޮތުން، ގޮނޑި ހުސްވާތާ 60 ދުވަހުގެތެރޭގައި އިންތިޚާބު ބާއްވަންޖެހޭކަމަށާއި އެހެންކަމުން ރަމަޟާން މަހުގެ ފަހުގައި އިންތިޚާބު ބާއްވައިފިނަމަ ގާނޫނުގައި ބުނާ މުއްދަތުގެ ތެރޭގައި އެކަން ނުކުރެވޭނެކަމަށެވެ.
ރަމަޟާން މަސް ކަމުގައި ވިއަސް, ވޯޓުލުން ކުރިޔަށްދާނީ ހެނދުނު 8ން ހަވީރު 4ށް ކަމަށް ފުއާދު ވިދާޅުވިއެވެ. އަދި ވޯޓުލެވޭނީ 4 ޖަހާއިރު ކިޔުއަށް އަރައި ތިބޭ ފަރާތްތަކަށް ކަމަށާއި، 4ގެ ފަހުން ކިޔުއަށް އަރާ ފަރާތްތަކަށް އެފުރުސަތު ނުލިބޭނެކަމަށް ފުއާދު ވިދާޅުވިއެވެ. އަދި ބެލެވެނީ ބަންގި ގޮވުމުގެ ކުރިން ހުރިހާ ފޮއްޓަކަށްވެސް ވޯޓުލައި ނިމޭނެކަމަށް ކަމަށް ފުއާދު ވިދާޅުވިއެވެ.
ވޯޓުލައި ނިމޭތާ 30 މިނެޓް ފަހުން ވޯޓު ގުނަން ފަށާނެކަމަށާއި، ނަމަވެސް ބަންގި ގޮވުމުގެ 30 މިނެޓް ކުރިން ވޯޓުލައި ނިމިއްޖެނަމަ ދެން ވޯޓު ގުނަންފަށާނީ ރޯދަ ވީއްލައިގެންކަމަށް ފުއާދު ވިދާޅުވިއެވެ.
ލަފާކުރެވޭގޮތުގައި ވޯޓުލެވޭ މީހުންގެ 90 އިންސައްތަ މީހުން ވޯޓުލާނެ. އިރުއޮއްސުމުގެ ކުރިން ވޯޓުލާ ނިމޭނެކަމަށް ބެލެވެނީ. ދެން ބަންގިއާ ކައިރިކޮށްފަ ވޯޓުލާ ނިމިއްޖިއްޔާ ރޯދަ ވީއްލާފަ ގުނަން ފަށާނީ.ފުއާދު ތައުފީގު / އީސީގެ ރައީސް
މިއިންތިޚާބުގައި ވޯޓުލުމުގެ ހައްގު 3423 މީހުންނަށް ލިބިގެންވެއެވެ. ކޮންމެ ވޯޓު ފޮއްޓަކަށް 400އާ 700އާ ދެމެދުގެ އަދަދެއްގެ މީހުން ވޯޓުލާނެކަމަށް ފުއާދު ވިދާޅުވިއެވެ.
ގުރައިދޫ ދާއިރާގެ ބައި އިލެކްޝަން ބާއްވަނީ، އެ ދާއިރާގެ މެމްބަރުކަމުގައި ހުންނެވި ޕީޕީއެމްގެ މެމްބަރ އިބްރާހީމް ރިޒާ، ފެބްރުއަރީ މަހުގެ 23 ވަނަ ދުވަހު އަވަހާރަވުމާ ގުޅިގެންނެވެ.
މި އިންތިޚާބުގައި ތިން ޕާޓީން ވާދަކުރެއެވެ. އެއީ ވެރިކަންކުރާ މައި ޕާޓީ އެމްޑީޕީއާއި އިދިކޮޅު ޕީޕީއެމްއާއި އެމްއެންޕީއެވެ. ޕީޕީއެމްއިން ވާދަކުރައްވަނީ ޙުސައިން ރިޒާ އާދަމެވެ. އެމްޑީޕީން އިބްރާހީމް ޝާޒު ވާދަކުރައްވާއިރު އެމްއެންޕީން ވާދަކުރައްވަނީ އަލީ އަރީފެވެ.
