ހުޅުމާލެ ފޭސް 2ގައި އިތުރު މިސްކިތެއް އެޅުމަށް އިންޓަރނޭޝަނަލް ޗެއިން މޯލްޑިވްސްއާއެކު އެއްބަސްވުމެއްގައި ސޮއިކޮށްފައެވެ.

މި އެއްބަސްވުމުގެ ދަށުން، ހުޅުމާލެ ފޭސް 2، ލޮޓް ނަންބަރު 20243ގައި އަޅާ މި މިސްކިތަކީ 11،643.74 އަކަފޫޓުގެ މިސްކިތެކެވެ. މި މިސްކިތުގައި 3 ފަންގިފިލާ ހުންނައިރު، މި މިސްކިތަކީ 521 މީހުންގެ ޖާގައިގެ މިސްކިތެކެވެ.

އަރބަންކޯގައި ބޭއްވި ސޮއިކުރުމުގެ ރަސްމިއްޔާތުގައި އައި.ސީ.އެމް.ޕީ.އެލްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުހައްމަދު ފަޔާޒެވެ. އަދި އަރބަންކޯގެ ފަރާތުން ސޮއިކުރެއްވީ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު އާތިފެވެ.

ހުޅުމާލެ ފޭސް 2ގައި އަލަށް މީހުން އާބާދުވެގެން އަންނައިރު ބޭނުންވާނެ މިސްކިތްތައް އެޅުމުގެ މަސައްކަތުގެ ތެރެއިން، މި މިސްކިތް ހިމަނައިގެން ޖުމްލަ 7 މިސްކިތެއްގެ މަސައްކަތް ހަވާލުކުރެވި، ގިނަ މިސްކިތްތަކުގެ އަމަލީ މަސައްކަތް މިހާރު ވަނީ ފަށާފައެވެ.

ވަގުތީ މިސްކިތްތަކުގެ އިތުރުން ދާއިމީ މިސްކިތެއް މިހާރުވެސް ފޭސް 2ގައި ހުރެއެވެ. ހުޅުމާލެއަކީ ހުޅުމާލޭގައި ދިރިއުޅޭ އެންމެހާ ފަރާތްތަކަށާއި އެކި ބޭނުންތަކަށް ހުޅުމާލޭ ޒިޔާރަތްކުރާ ފަރާތްތަކަށް ބޭނުންވާނެ ހުރިހާ ބޭނުންތަކެއް ހިމެނިގެން ތަރައްގީކުރެވޭ ރަށަކަށް ހެދުމަށް އަރބަންކޯގެ ފަރާތުން ދަނީ ގިނަ މަސައްކަތްތަކެއް ކުރަމުންނެވެ.