52 މިލިއަން ރުފިޔާ ދެއްކުމަށް ޔާމީނަށް ކުރި އަމުރު ހައިކޯޓުން ބާތިލުކޮށްފި
މި މައްސަލައިގެ ރިޔާސަތު ބަލަހައްޓަވަނީ ފަނޑިޔާރު މުހައްމަދު ފައިސަލް
ކުރީގެ ރައީސް އަބްދުﷲ ޔާމީން
ވ. އާރަށު މައްސަލާގައި 52 މިލިއަން ރުފިޔާ ދައުލަތަށް ދެއްކުމަށް ކުރީގެ ރައީސް އަބްދުﷲ ޔާމީންގެ މައްޗަށް ކުރި އަމުރުގެ, ހުކުމް ކުރުމުގެ އަޑުއެހުމެއް އަންގާރަ ދުވަހު ހައިކޯޓުގައި ކުރިއަށް ގެންގޮސްފިއެވެ.
އަންގާރަ ދުވަހު އޮތީ މި މައްސަލައިގެ ހުކުމްކުރުމެވެ. ހައިކޯޓުގައި މި މައްސަލައިގެ ރިޔާސަތު ބަލަހައްޓަވަނީ ފަނޑިޔާރު މުހައްމަދު ފައިސަލެވެ. ބެންޗުގައި ދެން ހިމެނިވަޑައިގަންނަވަނީ ފަނޑިޔާރު ހަސަން ޝަފީއު އަދި ފަނޑިޔާރު ދީބާނާޒް ފަހުމީއެވެ.
ޔާމީނުގެ ފަރާތުން ވަނީ އެއީ ގާނޫނާ ޚިލާފު އަމުރެއްކަމަށް ކަނޑައަޅުއްވައި ދެއްވުމަށް އެދިފައެވެ. އެގޮތުން ވ. އާރަށު މައްސަލާގައި ޔާމީނަށް ކުރި ހުކުމުގައި ފައިސާ ހޯދުމުގެ އަމުރު ހިމަނާފައި ނުވާކަމަށް ޔާމީނުގެ ވަކީލުން ވިދާޅުވިއެވެ.
މި އަމުރު ނެރެފައިވަނީ މި މައްސަލައިގެ ފުރިހަމަ ރިޕޯޓު ދޫކޮށް، އިސްތިއުނާފުކުރުމަށްވެސް ހުށަހެޅިފަހުންކަން ފާހަގަކޮށް ވަކީލުން ވިދާޅުވީ، މި އަމުރަކީ މައްސަލައިގެ ތެރޭގައި ހިމެނޭ އަމުރެއްނަމަ، މައްސަލައިގެ ފުރިހަމަ ރިޕޯޓާއި ލިއުންތައް ދޫކުރިއިރު މި އަމުރު ހިމެނޭނެކަމަށެވެ.
އިސްތިއުނާފުގެ ޖަވާބުގައި ދައުލަތުން ބުނީ، މި މައްސަލާގައި އޮތް ހަމައެކަނި ޚުޞޫމާތަކީ އެފަދަ އަމުރެއް ނެރެވިދާނެ ވަގުތާ ގުޅޭގޮތުން އޮތް ދެބަސްވުން ކަމަށެވެ. ދައުލަތުގެ ވަކީލުން ވަނީ އެ އަމުރަކީ ސައްހަ އަމުރެއްކަމަށް ދައުލަތަށް ގަބޫލުކުރެވޭ ސަބަބުތައްވެސް ކިޔައިދީފައެވެ. ޖިނާއީ އިޖުރާއަތުގެ ގާނޫނުގެ ތަރުތީބަށް ބަލާއިރު، ހުކުމާއެކުވެސް އަދި ހުކުމަށްފަހުވެސް އެފަދަ އަމުރެއް ނެރުމަށް ހުރަހެއް ނެތްކަމަށް ދައުލަތަށް ގަބޫލުކުރެވޭކަމަށް ދައުލަތުގެ ވަކީލު ވިދާޅުވިއެވެ.
ދައުލަތުން ދެކޭގޮތުގައި މި މައްސަލާގައި ދިމާވެފައި މިވަނީ "އިޖުރާއީ އައިބެކެވެ." އެއީ އެކަމަށް ހައިކޯޓުން ހައްލެއް ގެނެވިދާނެ އައިބެއްކަމަށް ދައުލަތުގެ ވަކީލު ވިދާޅުވިއެވެ.
ދައުލަތުން ވަނީ މި އަމުރު ބާތިލު ކުރަން ޖެހޭ ޝަރުއީ އަދި ގާނޫނީ ސަބަބެއް ނެތްކަމަށް ކަނޑަައަޅުއްވައި ދެއްވުމަށް އެދިފައެވެ.
ފަނޑިޔާރު ފައިސަލް ވިދާޅުވީ، މި މައްސަލައިގެ ފުރިހަމަ ރިޕޯޓު ދޫކޮށް، އިސްތިއުނާފު ކުރުމަށްވެސް ހުށައެޅި ފަހުން އެފަދަ އަމުރެއް ނެރެފައިވަނީ ރަނގަޅަށް ނޫން ކަމަށެވެ.
މިއީ އިޖުރާއީ އައިބެއް ހިމެނޭ ކަމެއްކަމަށް ދައުލަތުން ބުނެފައިވާއިރު، ކުށް ކޮށްގެން ހޯދާފައިވާ މުދަލާއި ފައިސާ ހޯދުމަށް އަމުރު ނެރޭއިރު "ނެޗުރަލް ޖަސްޓިސް"ގެ އުސޫލުތަކާ އެއްގޮތްވާން ޖެހޭނެކަމަށް ފަނޑިޔާރު ވިދާޅުވިއެވެ. އެގޮތުން އަމުރު ނެރުނުއިރު، އަމުރު ރައްދުވާ ފަރާތުގެ ބަހެއް ހޯދާފައިވާކަން އެނގެން އޮންނަންޖެހޭ ކަމަށްވެސް ފަނޑިޔާރު ވިދާޅުވިއެވެ.
މި މައްސަލައަށް ބަލާއިރު، އަމުރު ނެރެފައިވަނީ ކުށް ސާބިތުވި ފަހުން ވަކި އަމުރެއްގެ ގޮތުގައި ކަމަށާއި، އަމުރާ ގުޅޭގޮތުން ވާހަކަދެއްކުމަށް ފުރުސަތު ދެވިފައިވޭތޯއާމެދު ދައުލަތާއި ޔާމީނުގެ ފަރާތުން ދެބަސްވާ ކަމަށް ފަނޑިޔާރު ވިދާޅުވިއެވެ.
މިއީ ޔާމީނު ޝަރީއަތަށް ހާޒިރު ކުރުމަކާ ނުލައި، ހުކުމްކުރިތާ 2 މަސް ފަހުން ދައުލަތުން ކޯޓަށް ހުށައެޅި ސިޓީއަކާ ގުޅިގެން ނެރުނު އަމުރަކަށްވާއިރު، ދައުލަތަށް އެކަން ސާފުކޮށްދެވިފައި ނުވާކަމަށް ފަނޑިޔާރު ވިދާޅުވިއެވެ. މި މައްސަލަ ތަފާތުވި ގޮތެއް ދައުލަތަށް ސާފުކޮށްދެވިފައި ނުވާކަންވެސް ފަނޑިޔާރު ފާހަގަކުރެއްވިއެވެ.
އެއަށްފަހު ފަނޑިޔާރު ހަސަން ޝަފީއު ވަނީ ރައުޔު އިއްވަވާފައެވެ. ރައުޔު އިއްވަވަމުން ފަނޑިޔާރު ޝަފީއު ވިދާޅުވީ، ދައުލަތުން ކޯޓުގެ އިޖުރާއަތު ނަހަމަގޮތުގައި ބޭނުންކޮށްފައިވާކަމަށް ދެކެވަޑައިގަންނަވާ ކަމަށެވެ. ދަށު ކޯޓުން ނެރުނު އަމުރަކީ ބާތިލު އަމުރެއްކަމަށް ދެކެވަޑައިގަންނަވާކަމަށް ފަނޑިޔާރު ވިދާޅުވިއެވެ.
ވުމާއެކު، ފަނޑިޔާރުންގެ އިއްތިފާގުން ހުކުމްކޮށްފައިވަނީ ކްރިމިނަލް ކޯޓުގެ އަމުރު ބާތިލު ކަމަށެވެ.
