ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަދި އެމްޑީއޭގެ ރައީސް އަހުމަދު ސިޔާމް ނޫސްވެރިންތަކަކަށް ބިރު ދެއްކެވިކަމަށް ތުހުމަތުކޮށް ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.

އެ މައްސަލަ ހުށަހަޅާފައިވަނީ ރާއްޖޭގެ ނޫހެއްގައި ޝާއިއުކުރި ރިޕޯޓަކާ ގުޅިގެން ދެ ނޫސްވެރިންނަށް އިންޒާރުދެއްވާފައިވާކަމަށް ބުނެއެވެ. ރައްޔިތުންގެ މަޖިލީހުގެ ގަވާއިދުގެ 170 ވަނަ މާއްދާގެ ދަށުން މެދުހެންވޭރު ދާއިރާގެ މެންބަރު އަލީ އާޒިމް ހުށަހަޅުއްވާފައިވާ ކުއްލި މައްސަލަ މަޖިލީހުން ބަލައިގަނެ ބަހުސް ވަނީ ހޯމަ ދުވަހު ކުރިއަށް ގެންގޮސްފައެވެ. އެ މެމްބަރު ވަނީ މިއީ ސީރިއަސް މައްސަލައެއްކަމަށް ވިދާޅުވެފައެވެ. އާޒިމް ވަނީ މީގެ ކުރިންވެސް ނޫސްވެރިންނަށް ދީފައިވާ މަރުގެ އިންޒާރުތަކަށް ބަލާއިރު އެއީ ކަމަކަށް ނަހަދައި ދޫކޮށްލުމުން އޭގެ ނޭދެވޭ ނަތީޖާ ފެނިފައިވާކަމަށެވެ. އަދި މިފަދަ މައްސަލަތަކުގައި ފިޔަވަޅު ނޭޅުމަކީ އަނިޔާވެރިކަމަށް ހުޅުވޭ ޖާގައެއް ކަމަށް އޭނާ ވިދާޅުވިއެވެ.

އެ ބިލަށް ބަހުސްކުރެއްވި މެމްބަރުން ވަނީ ސިޔާމަށް ފާޑުވިދާޅުވެފައެވެ. އަދި ބާރުގަދަ، ނުފޫޒުގަދަ ފަރާތްތަކުން ނޫސްވެރިންނަށް އިންޒާރު ދިނުމަކީ އާދައިގެ ކަމެއް ނޫން ކަމަށް އެ މެމްބަރުން ވަނީ ވިދާޅުވެފައެވެ. އަދި އެއީ ނޫސްވެރިކަމަށް އޮތް ބިރުވެރި ކަމެއްގެ ގޮތުގައި މެމްބަރުން ސިފަކުރެއްވިއެވެ. އަދި އެއީ ނޫސްވެރިންނަށް އޮތް މިނިވަންކަން ފަހަތަށް ގެންދިއުން ކަމަށް ވެސް މެމްބަރުން ވިދާޅުވިއެެވެ.

އެ މައްސަލަ ބަލައިގަތީ ވޯޓުގައި ބައިވެރިވެވަޑައިގެންނެވި 18 މެންބަރުންގެ ވޯޓާއެކުގައެވެ.