"ޓެކްސީތަކުގެ އަގު ކަނޑައެޅުމުގައި ވިސްނާފައިވަނީ އާއްމުންނަށް ފަސޭހަކޮށްދިނުމަށް"
ކޮމިޓީއަށް އާއްމުން ވަނީ އެ އިދާރާއާ ގުޅުންހުރި ވަރަށް ގިނަ މައްސަލަތައް ހުށަހަޅާފައި
މާލޭގެ މަގުމަތި
ޓެކްސީތަކުގެ އަގު ކަނޑައެޅުމުގައި ވިސްނާފައިވަނީ އާއްމުންނަށް ފަސޭހަކޮށްދިނުމަށް ކަމަށް ޓްރާންސްޕޯޓް މިނިސްޓަރ އާއިޝަތު ނަހުލާ ވިދާޅުވެއްޖެއެވެ.
މިނިސްޓަރު މިފަދައިން ވިދާޅުވީ ހޯމަ ދުވަހު މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި ވާހަކަދައްކަވަމުންނެވެ. އެ ކޮމިޓީއަށް އާއްމުން ވަނީ އެ އިދާރާއާ ގުޅުންހުރި ވަރަށް ގިނަ މައްސަލަތައް ހުށަހަޅާފައެވެ. އޭގެތެރޭގައި ޓެކްސީގެ އަގު ކަނޑައެޅީ ޓެކްސީ ސެންޓަރުތަކާ މަޝްވަރާ ނުކޮށް ކަމަށް ބުނާ މައްސަލައަކާއި، 20 އަހަރުވެފައިވާ އުޅަނދުތަކަށް ޓެކްސީކުރުމުގެ ހުއްދަ ބާތިލްވާގޮތަށް ޓެކްސީ ގަވާއިދު މަނާކޮށް ފިޔަވަޅު އެޅުމާއި، ޓެކްސީ ގަވާއިދާ އެއްގޮތަށް އުޅަނދުތަކުގެ ބިއްލޫރި ބަދަލުކުރުމާ ގުޅުންހުރި މައްސަލަތައް ވަނީ ހުށަހަޅާފައެވެ. މީގެ އިތުރުން ރެޖިސްޓްރޭޝަން މަރުހަލާގެ މައްސަލަތައް ހުރިކަމަށްވެސް އެ މައްސަލަތަކުގައި ފާހަގަކުރައްވާފައިވެއެވެ.
އެ ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ ޓެކްސީގެ އަގު ކަނޑައެޅުމަށް މަޝްވަރާކުރައްވާފައި ނުވާކަމަށް ބުނިނަމަވެސް އަގު ކަނޑައެޅުމުގެ ކުރިން ޓެކްސީ ސެންޓަރުތަކާއެކު އެކަމާމެދު މަޝްވަރާކޮށްފައިވާ ކަމަށެވެ. އަދި ޓްރާންސްޕޯޓް މިނިސްޓްރީއަކީ ރެގިއުލޭޓަރީ އިދާރާއެއް ކަމަށް ވުމުން އެންމެ ބޮޑަށް ވިސްނަން ޖެހެނީ އާއްމު ރައްޔިތުންނަށް ފަސޭހަ ގޮތަކަށް ކަންކަން ކުރުމަށް ކަމަށް ނަހުލާ ވިދާޅުވިއެވެ. އަދި އަތްފޯރާ ފަށުގައި އަގު ބެހެއްޓުމަކީ މުހިންމު ކަމެއް ކަމަށްވެސް މިނިސްޓަރު ވިދާޅުވިއެވެ. މިނިސްޓަރ ވަނީ ޓެކްސީގެ އަގު ކަނޑައަޅަނީ ރައީސް އޮފީހަށް ފޮނުވައިގެން ރައީސް އޮފީހުގެ ލަފަޔާއެކު ކަމަށް ވިދާޅުވެފައެވެ. މިނިސްޓަރ މިފަދައިން ވިދާޅުވުމުން މެމްބަރަކު ވަނީ އެކަމާމެދު ކަންބޮޑުވުން ފާޅުކުރައްވާފައެވެ.
އެގޮތުން ލައިވް ކޮމިޓީއެއްގައި އެފަދައިން ވިދާޅުވުމުން، އެ މައުލޫމާތު އޮޅުން އަރާކަމަށް މެމްބަރު ވިދާޅުވިއެވެ. ރައީސް އޮފީހާއި އިކޮނޮމިކް ކައުންސިލުން ގޮތް ނިންމަނީ މިނިސްޓްރީން ފޮނުވާ ލިޔުންތަކުގެ މައްޗަށް ބިނާކޮށްކަން މެމްބަރު ވަނީ ފާހަގަކުރައްވާފައެވެ. ކޮމިޓީއަށް މިނިސްޓަރުގެ އިތުރުން މިނިސްޓްރީގެ އިސް އެހެން ބައެއް ބޭފުޅުންވެސް ހާޒިރުވެވަޑައިގެންނެވިއެވެ. މަޖިލީހަށް ހުށަހަޅާފައިވާ މައްސަލަތަކުގެ ތެރޭގައި ގޭގެ ވެރިފަރާތަށް ނޭނގި އެ ގޭގެ ގަރާޖުގައި ވެހިކަލް ބޭއްވުމަށް ހުއްދަ ދިން މައްސަލައެއް ހިމެނެއެވެ. އެ މައްސަލައިގައި ބުނެފައިވަނީ ގޭގެ ވެރިފަރާތަށް ނޭނގި، އެ ގޭގެ ގަރާޖުގައި ވެހިކަލް ބާއްވަން ހުއްދަ ދީފައިވާ މައްސަލަ 15 ސެޕްޓެމްބަރު 2022ގައި މިނިސްޓަރަކަށް ހުށަހަޅާފައިވެއެވެ.
