"ޝެޑިއުލާ އެއްގޮތަށް މަސައްކަތް ކުރިއަށްދާނަމަ 2024ގައި އަރަބިއްޔާގެ އާ އިމާރާތުގައި ކިޔެވުން ފެށޭނޭ"

ޝެޑިއުލާ އެއްގޮތަށް މަސައްކަތް ކުރިއަށް ގޮސްފި ނަމަ 2024 ވަނަ އަހަރުގެ ދިރާސީ އަހަރުގެ ކިޔެވުން ފަށަން ވާއިރަށް އަރަބިއްޔާ ސްކޫލްގެ އާ އިމާރާތުގައި ކިޔަވާދޭން ފެށޭނެ ކަމަށް މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޢަލީ ވިދާޅުވެއްޖެއެވެ.

އެކަމަނާ އެފަދައިން ވިދާޅުވެފައި ވަނީ ހޯމަ ދުވަހު މަހިބަދޫ ދާއިރާގެ މެންބަރު އަޙްމަދު ތާރިޤް (ޓޮމް) ކުރައްވާފައިވާ ސުވާލަށް ޖަވާބުދެއްވަމުންނެވެ. މެންބަރު ތާރިޤު ވަނީ ޢަރަބިއްޔާ ސްކޫލަށް މާލޭގައި އާ ޢިމާރާތެއް އެޅުމަށް ކޮންޓްރެކްޓަރަކާ ހަވާލުކޮށްފައިވާ ކަމަށް 2022 ވަނަ އަހަރު އިޢުލާންކޮށްފައިވާތީ އެ ޢިމާރާތް ކޮންޓްރެކްޓްކޮށްފައިވަނީ ކޮން އަގެއްގައި، ކޮން މުއްދަތަކަށް ނިންމުމަށްތޯ ސުވާލުކުރައްވާފައެވެ. އަދި މިހާރު މަސައްކަތް ނިމިފައިވަނީ ކިހާވަރަކަށްތޯ އަދި ސްކޫލް ބޭނުންކުރަން ފެށޭނެ ދުވަހެއް އެނގިވަޑައިގަންނަވާތޯ ވެސް ސުވާލުކުރައްވާފައިވެއެވެ.

މިހާރު އަރަބިއްޔާ ސްކޫލްގެ ކޮންސެޕްޓް ކުރަހާ ނިންމާފައިވާ ކަށާއި، މިހާރު ކުރިއަށް ދަނީ އެ އިމާރާތުގެ ތަފްސީލީ ކުރެހުން ކުރެހުމުގެ މަސައްކަތް ކަމަށް އެކަމަނާ ވަނީ ވިދާޅުވެފައެވެ. މިނިސްޓަރު ވިދާޅުވީ އަރަބިއްޔާ ސްކޫލްގެ ޑީޓެއިލް ޑިޒައިން ނުވަތަ ތަފްސީލީ ކުރެހުން މި މަހުގެ ނިޔަލަށް ނިމޭނެ ކަމަށް ލަފާކުރެވޭކަމަށެވެ. ހޯމަ ދުވަހުގެ ވަގުތެއްގައި ބާޖަމާލުއްދީން ހުރި އިމާރާތުގައި އަރަބިއްޔާ ސްކޫލްގެ އަމަލީ މަސައްކަތް ފަށާނެ ކަމަށް ވެސް މިނިސްޓަރު ވިދާޅުވިއެވެ.

ޢަރަބިއްޔާ ސުކޫލު ކުރިން ހިންގަމުން އައި އިމާރާތް ބޭނުން ކުރަން އެކަށީގެން ނުވާތީ، މިހާރު އެ ސުކޫލު ވަގުތީ ގޮތުން ހިންގަމުން އަންނަނީ ކުރިން ފޮރިން މިނިސްޓްރީ ހިންގަމުން އައި އޮފީސް އިމާރާތުގައެވެ. އެކަމާއި ގުޅިގެން އެ ސުކޫލު ހިންގުމުގެ ކަންކަން ރަނގަޅު ނޫން ކަމަށް ބުނެ އަރަބިއްޔާ ސުކޫލުގެ ބެލެނިވެރިން ދަނީ ދޭތެރެދޭތެރެއިން ކަންބޮޑުވުން ފާޅުކުރަމުންނެވެ.

އަރަބިއްޔާ ސްކޫލްގެ އެޅުމަށް ޑިޒައިން އެންޑް ބިލްޑް އުސޫލުން 168 މިލިއަން ރުފިޔާ އަށް ވުރެ ބޮޑު އަގަކަށް ހަވާލުކޮށްފައި ވަނީ އަމީން ކޮންސްޓްރަކްޝަނާއިއެވެ.