އަންގާރަ ދުވަހުން ފެށިގެން ގޮވާމުން ފިތުރު ޒަކާތް ބަލައިގަންނާނެ!
ހުކުރު ދުވަސް ނޫން ހުރިހާ ދުވަހެއްގައި ގޮވާމުން ފިތުރު ޒަކާތް ބަލައިގަންނާނެ
ގޮވާމުގެ ބާވަތްތަކުން ފިޠުރު ޒަކާތް ދެއްކުން
ގޮވާމުން ފިތުރު ޒަކާތް ދައްކަން ބޭނުންވާ ފަރާތްތަކަށް އަންނަ އަންގާރަ ދުވަހުން ފެށިގެން ޒަކާތް ދެއްކޭނެ ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން އާދީއްތަ ދުވަހު ބުނީ އެ ފުރުސަތު ހުޅުވާލާނީ 11 އޭޕްރިލް ވާ އަންގާރަ ދުވަހުން ފެށިގެން 20 އޭޕްރިލް ވާ ބުރާސްފަތި ދުވަހުގެ ނިޔަލަށް ކަމަށެވެ. އެގޮތުން، ފިތުރު ޒަކާތުގެ ގޮތުގައި ދައްކާނީ އެބަޔަކު އާއްމުގޮތެއްގައި ކެއުމަށް ބޭނުން ކުރާ ގޮވާމުގެ ބާވަތަކުން ބޮލަކަށް 2.4 ކިލޯގެ މިންވަރު ކަމަށް އެ މިނިސްޓްރީން ބުންޏެވެ.
މާލޭގައި ގޮވާމުން ފިތުރު ޒަކާތް ބަލައިގަތުމަށް ހަމަޖެހިފައިވަނީ މަޖީދިއްޔާ ސްކޫލްގެ ސަލާހުއްދީން ހޯލުގައެވެ. އެތަނަށް ޒަކާތް ދައްކަން ދާ ފަރާތްތަކުން ބޭނުން ކުރާނީ އަމީރު އަހުމަދު މަގުގައި ހުންނަ ކުރީގެ ދަރުމަވަންތަ ސްކޫލް ގޭޓު ކަމަށް އިސްލާމިކް މިނިސްޓްރީން ބުންޏެވެ.
އިސްލާމިކް މިނިސްޓްރީން ހުކުރު ދުވަސް ނޫން ހުރިހާ ދުވަހެއްގައި ގޮވާމުން ފިތުރު ޒަކާތް ބަލައިގަންނާނެއެވެ. އެގޮތުން، ހެނދުނު 10:00 ން 12:00 އަށް އަދި މެންދުރު 1:00 ން 3:15 އަށް، ރޭގަނޑު 9:00 ން 10:30 އަށް ޒަކާތް ބަލައިގަންނާނެ ކަމަށް އެ މިނިސްޓްރީން ބުންޏެވެ.
މާލޭގައި ފައިސާއިން ފިތުރު ޒަކާތް މިހާރު ވެސް ދެއްކޭނެއެވެ. އެގޮތުން ދިރާގު، އުރީދޫ، މޯލްޑިވްސް އިސްލާމިކް ބޭންކް، ބޭންކް އޮފް މޯލްޑިވްސް، މިނިސްޓްރީ އޮފް ފިނޭންސް އިތުރުން، ފަހިޕޭ މެދުވެރިކޮށް ޒަކާތް ބަލައިގަތުމަށް ހަމަޖެހިފައިވެއެވެ.
ފިތުރު ޒަކާތުގެ ގޮތުގައި ރާއްޖެއިން ބަލައިގަންނަ ބާވަތްތަކާއި އަގުތައްވެސް އެ މިނިސްޓްރީން ވަނީ އާންމުކޮށްފައެވެ. އާދައިގެ ހަނޑުލުން ޒަކާތް ނެރޭނަމަ، ދައްކަންޖެހެނީ 12 ރުފިޔާގެ ރޭޓުންނެވެ. އަދި ތައިލެންޑް ހުދުހަނޑުލުން 84 ރުފިޔާ، ރަތް ހަނޑުލުން 99 ރުފިޔާ ދައްކަންޖެހޭއިރު، އާދައިގެ ބާސްމަތީ ހަނޑުލުން ދައްކަން ޖެހެނީ 84 ރުފިޔާއެވެ. ހަމައެހެންމެ މޮޅު ބާސްމަތީ ހަނޑުލުން 100 ރުފިޔާގެ މަގުން، އަދި އެންމެ މޮޅު ބާސްމަތީ ހަނޑުލުން ދައްކަންޖެހެނީ 125 ރުފިޔާއެވެ.
މީގެ އިތުރުން ފުށުން ޒަކާތް ނެރެންޖެހޭ ފައިސާގެ އަދަދަށް ބަލާއިރު، އާދައިގެ ފުށުން ނަމަ ދައްކަންޖެހެނީ 12 ރުފިޔާއެވެ. އަދި އާޓާ ފުށުން ދައްކަންޖެހެނީ 75 ރުފިޔާއެވެ.
