ތަށި ދިފާއު ނުކުރެވޭނެ، ބޭނުން ވަނީ ޒުވާން ޓީމެއް ނެރެން: ކުޑަ ހީނާ

ކުލަބް ވެލެންސިއާ އަށް ޕްރެޒިޑެންޓްސް ކަޕްގެ ތަށި ދިފާއު ނުކުރެވޭނެ ކަމަށާއި، ބޭނުން ވަނީ ޒުވާން ޓީމެއް ނެރެންކަމަށް އެ ކުލަބުގެ ކޯޗު އިސްމާއީލް އާސިފް (ކުޑަ ހީނާ) ބުނެފިއެވެ.

ކުޑަ ހީނާ މިހެން ބުނީ މިއަހަރުގެ ޕެރްޒިޑެންޓްސް ކަޕްގެ ފުރަތަމަ މެޗުގައި އާދިއްތަ ދުވަހުގެ ރޭ ކުލަބު އީގަލްސްއާ ދެކޮޅަށް ނިކުންނަ މެޗުގެ ކުރިން ރާއްޖެ އެމްވީ އިން ކުރި ސުވާލަކަށް ޖަވާބު ދެމުންނެވެ. ކުޑަ ހީނާ ބުނީ މެޗަށް އެންމެ އެކަށީގެންވާ މިންވަރަށް ވެލެންސިއާއަށް ތައްޔާރުވެސް ނުވެވޭ ކަމަށެވެ. ސަބަބަކީ އެކި ހިސާބުގައި އެކި ކަހަލަ އުނދަގޫތައް ކުރިމަތިވުންކަން އޭނާ ފާހަގަ ކުރިއެވެ. ކުޑަ ހީނާ ބުނީ މިދިޔަ އަހަރުގެ ޕްރެޒިޑެންޓްސް ކަޕް ވެލެންސިއާ އިން ކާމިޔާބު ކުރިއިރު ޓީމުގައި ތިބި މުހިންމު ގިނަ ކުޅުންތެރިން މިހާރު ނެތް ކަމަށެވެ. އޭނާ ބުނީ މިވަގުތު ބޭނުންވަނީ ޔޫތު ޑިވެލޮޕްމަންޓު ސިސްޓަމްގެ ތެރެއިން ކުޅުންތެރިން ހިމަނައިގެން ޓީމެއް އެކުލަވާލާ މަސައްކަތް ކުރަންކަމަށެވެ. ކުޑަ ހީނާ ބުނީ ވެލެންސިއާގެ ޔޫތު ސިސްޓަމްގެ ތެރޭގައި ވަރަށް ހުނަރުވެރި ކުޅުންތެރިން ތިބޭކަން އަބަދު ވެސް ފާހަގަވާ ކަމަށެވެ. އެ ވާހަކަތަކުގެ ތެރެއިން ކުޑަ ހީނާ ބުނީ، ފުޓުބޯޅައިގެ ނަަޒަރަކުން ބުނާނެ ވަކި އެއްޗެއް ނެތް ކަމަށެވެ.

ކުޑަ ހީނާ ބުނީ، ވެލެންސިއާ އިން އައު ކުޅުންތެރިންތަކެއް ހޯދި ކަމަށެވެ. ނަމަވެސް މިވަގުތާ ހަމައަށް ވެސް އެ ކުޅުންތެރިންގެ ރަޖިސްޓްރޭޝަންގެ ކަންތައްތައް ފުރިހަމަ ނުވާތީވެ، އެ ކުޅުންތެރިންގެ ވާހަކަ ނުދެއްކޭނެ ކަމަށެވެ. ޒުވާން ކުޅުންތެރިންނަށް ފުރުސަތު ދީގެންވެސް ކުޅެން ބަލާއިރު، ކުޑަ ހީނާގެ ބޮޑު ކަންބޮޑުވުމެއް އެބަ އޮތެވެ. އެގޮތުން ޓީމު އެކުލަވާލާ، ރަނގަޅު ފަރިތަކުރުމެއް ކުރިއަށް ގެންދެވިފައި ނުވާ ކަމަށް އޭނާ ބުންޏެވެ. އޭނާ ބުނީ ވަގުތު ލިބިގެން ކަންކަން ކުރެވޭ ނަމަ، މާބޮޑު މައްސަލައެއް ދިމާނުވާނެ ކަމަށެވެ. ކުޑަ ހީނާ ބުނީ މީގެ ކުރިންވެސް އެގޮތަށް ޒުވާން ކުޅުންތެރިން ގެންގުޅެ، ތިން އަހަރު ދުވަހުން ކުރި މަސައްކަތާއެކު ފުރަތަމަ ޑިވިޝަން ކުޅެފައި އޮންނާނެ ކަމަށެވެ. ނަމަވެސް މިހާރު ފުޓުބޯޅަ އޮތް ޙާލަތަށް ބަލާއިރު، އެކަން ކުރުމުގެވެސް މާ ބޮޑު ފުރުސަތުތަކެއް ނެތް ކަމަށް ބުންޏެވެ. ކުޑަ ހީނާ ފާހަގަކުރި ގޮތުގައި ޒުވާން ކުޅުންތެރިން އިންޓަ ސްކޫލްގެ މުބާރާތްތައް ކުޅެފައި ތިބި ނަމަވެސް، މަތީ ފަންތީގެ ފުޓުބޯޅަ ކުޅުމަކީ ތަފާތު ކަމެކެވެ. އެކަމަށް ކުރަން ޖެހޭ މަސައްކަތް ވެސް ތަފާތުވާނެކަން ފާހަގަ ކުރަމުން ކުޑަ ހީނާ ބުނީ، އެ މަސައްކަތް ނުކުރެވި މުބާރާތަށް ނިކުންނަން ޖެހޭތީ ބުނާނެ އެއްޗެއް ނެތް ކަމަށެވެ.

ވެލެންސިއާ އިން މިދިޔަ އަހަރުގެ ޕްރެޒިޑެންޓްސް ކަޕްގެ ފައިނަލްގައި މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ތަށި ކާމިޔާބު ކުރީވެސް ކުޑަ ހީނާގެ އިރުޝާދުގެ ދަށުންނެވެ. މިއަހަރުގެ ފުޓުބޯޅަ ސީޒަން ފެށުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ތައްޔާރުވަމުން އައިއިރު، ކުލަބުތަކުގެ ތައްޔާރީތައް ފެންނަނީ ވަރަށް ފަނޑުކޮށެވެ. ހަ ޓީމާއެކު އާދިއްތަ ދުވަހުގެ ރޭ ޕެރެޒިޑެންޓްްސް ކަޕް ފަށާއިރު، މިހާތަނަށް ގިނަ ޓީމުތަކުން ކޮށްފައި ވަނީ އެންމެ ފަރިތަކުރުމެކެވެ.