ރޮނާގެ ހެޓްރިކުން މޯލްޑިވްސް ސޮކަރ މޭޓްސް މޮޅު
8 އެޕްރީލު 2023 | ހޮނިހިރު 02:17އެމްއެސް މޭޓްސްއަށް ކްއާޓާ ފައިނަލް ޔަޤީން ވެއްޖެ
މެޗުގައި ތިން ލަނޑު ޖެހި އާދަމް ލަރީފް
ކުރިން ފުރަތަމަ ޑިވިޝަންގައި ވިދާލި އާދަމް ލަރީފް (ރޮނާ) ގެ ހެޓްރިކުން މޯލްޑިވްސް ސޮކަރ މޭޓްސް ދެވަނަ މެޗު ކާމިޔާބުކޮށްފިއެވެ.
ފުރަތަމަ މެޗު ހުއްރިއްޔާ ވެޓަރެންސްއާ ވާދަކޮށް އެއްވަރުވެފައިވަނިކޮށް, ދެވަނަ މެޗު ކާމިޔާބުކުރީ ގްރީން ސްޓްރީޓްސްއާ ވާދަކޮށެވެ. މެޗު އެމްއެސް މޭޓްސްއިން ކާމިޔާބުކުރީ 3-0 ނެވެ. ތިން ލަނޑުވެސް ޖެހީ އާދަމް ލަރީފެވެ. މެޗުގެ މޮޅު ކުޅުންތެރިއަކީވެސް ކުރިން ހުރައާއި, ނިއުރޭޑިއަންޓާއި, ވިކްޓްރީއާއި ވީބީންވެސް ފާހަގަވި ރޮނާއެވެ. މެޗުން އެންމެ ބޮޑަށް ފާހަގަވި އެއްކަމަކީ ޤައުމީ ޓީމަށް އެންމެ ގިނަ މެޗު ކުޅުނު, ކުރީގެ އެއްވަނަ ކީޕަރު އިމްރާން މުޙައްމަދު އެމްއެސް މޭޓްސްގެ ފޯވާޑަކަށް ކުޅުމެވެ. މެޗަށް ވާމްއަޕް ކުރިއިރު އިމްރާން ހުރީ ކީޕަރު ޖަރޒީގައެވެ. އިމްރާން ވަނީ ވީބިއަށް ކުޅުނުއިރުވެސް ފޯވާޑަކަށް ކުޅެ ލަނޑު ޖަހާފައެވެ. އެމްއެސް މޭޓްސް ކުޅެނީ ޤައުމީ ޓީމްގެ ކުރީގެ ކެޕްޓަން އަސްއަދު އަބުދުލްޣަނީގެ ކެޕްޓަންކަމުގެ ދަށުންނެވެ. ކޯޕަރަކީ ސިނާން (ނާނި)އެވެ.
މިގްރޫޕްގައި ދެން ހިމެނެނީ ހުއްރިއްޔާއާއި ޕޮލިސް ކްލަބެވެ. ޕޮލިސް ކްލަބް ވަނީ ފުރަތަމަ މެޗުގައި ގްރީން ބަލިކޮށް ތިން ޕޮއިންޓް ހޯދާފައެވެ. ދެ މެޗުން ޕޮއިންޓެއް ނުލިބި އޮތީ ގްރީންއެވެ. ގްރީން އަތުން ހޯދި މޮޅާއެކު ސޮކަރ މޭޓްސްއަށް ކްއާޓާ ފައިނަލްގެ ޖާގައެއް ލިބޭނެއެވެ. އެޓީމް ވަނީ ދެ މެޗުން ހަތަރު ޕޮއިންޓް ހޯދާފައެވެ.
