ރަޝްފޯޑުގެ ލަނޑާއެކު ޔުނައިޓެޑުން ބްރެންޓްފޯޑު ބަލިކޮށްފި

އިނގިރޭސި ޕްރިމިއާ ލީގުގައި ބްރެންޓްފޯޑާ ދެކޮޅަށް ކުޅުނު މެޗުން މޮޅުވެ މެންޗެސްޓަރ ޔުނައިޓެޑުން އަލުން ހަތަރު ވަނަ އަށް ޖެހިލައިފި އެވެ.

ބުދަ ދުވަހުގެ ރޭ ޔުނައިޓެޑުގެ އަމިއްލަ ދަނޑުގައި ބްރެންޓްފޯޑާ ދެކޮޅަށް ނިކުތްއިރު އެ ޓީމުގެ އޮތީ ލީގު ތާވަލްގެ ފަސް ވަނައިގަ އެވެ. ނަމަވެސް މެޗުން 1-0 އިން ބްރެންޓްފޯޑު ބަލި ކުރުމަށް ފަހު ޔުނައިޓެޑު ވަނީ އަލުން ހަތަރު ވަނަ އަށް ޖެހިލައިފަ އެވެ. މެޗުގައި ޔުނައިޓުގެ ހަމައެކަނި ލަނޑު ޖެހީ މި ސީޒަންގައި މޮޅު ކުޅުމެއް ދައްކަމުން އަންނަ އިނގިރޭސި ފޯވާޑް މާކަސް ރަޝްފޯޑު އެވެ. ފުރަތަމަ ހާފުގެ 27 ވަނަ މިނެޓުގައި އޭނާ ލަނޑު ޖެހީ އެ ޓީމުގެ މާސެލް ސަބިޓްޒާ ތަނަވަސްކޮށްދިން ފުރުސަތެއްގަ އެވެ. ޒުވާން ކުޅުންތެރިޔާ ވަނީ މި ސީޒަންގައި ޔުނައިޓެޑަށް 28 ލަނޑު ޖަހައިދީފަ އެވެ. އޭގެ ތެރެއިން 15 ލަނޑަކީ ޕްރިމިއާ ލީގުގައި ކުޅުނު 28 މެޗުން އޭނާ ޖަހާފައިވާ ލަނޑުތަކެވެ.

މެޗުން މޮޅުވުމަށްފަހު ޔުނައިޓެޑުގެ ކޯޗު އެރިކް ޓެން ހާގް ބުނީ، އުނދަގޫ ހާލަތެއްގައި އޮވެ، މެޗުން މޮޅުވެވުމުން އުފާވާ ކަމަށެވެ. އޭނާ ބުނީ ދެން އަމާޒަކީ ކުރިއަށް ހުރި މެޗުތައް ކާމިޔާބުކޮށް ގަދަ ތިނެއްގައި ހިފެހެއްޓުން ކަމަށެވެ. ލީގުގައި މިހާތަނަށް ކުޅުނު 28 މެޗުން ޔުނައިޓެޑަށް ލިބެނީ 53 ޕޮއިންޓެވެ.