ތިމާގެ އުފަލަށް އަނެކާ ނުރައްކަލަކަށް ހުށަހެޅޭ ކަންކަން ނުކުރޭ: ފުލުހުން
ނިމިގެން ދިޔަ ހަފްތާ ތެރޭގައި ވެސް ނުރައްކާތެރި ހާދިސާތައް ހިނގާފައިވޭ
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ
މަގުމައްޗަކީ ތިމާގެ އަމިއްލަތަނެއް ނޫން ކަމަށާއި، ތިމާގެ އުފަލަށް އަނެކާ ނުރައްކަލަކަށް ހުށަހެޅޭ ކަންކަން ނުކުރުމަށް ފުލުހުން އިލްތިމާސްކޮށްފިއެވެ.
ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަފުޅުދައްކަވަމުން އިންސްޕެކްޓަރ އޮފް ޕޮލިސް މުހައްމަދު ސޮބާހް ވިދާޅުވީ މަގުމަތީގެ ރައްކާތެރިކަން ކަށަވަރުކުރުމުގެ ގޮތުން ވަރަށް ގިނަ މަސައްކަތްތައް ކުރަމުންދާ ކަމަށެވެ. އެގޮތުން މިރަމަޟާން މަހާއި ދިމާކޮށް ވެސް ގިނަ ޕްރޮގްރާމްތައް މާލެއާއި އަތޮޅުތެރޭގައި ކުރިއަށް ގެންދާ ކަމަށް ސޮބާހް ވިދާޅުވިއެވެ.
މަގުމަތީގެ ރައްކާތެރިކަމަށް އިޝާރާތް ކުރައްވައި ސޮބާހް ވިދާޅުވީ ނިމިގެން ދިޔަ ހަފްތާ ތެރޭގައި ވެސް ހިތާމަވެރި ނުރައްކާތެރި ހާދިސާތައް ހިނގާފައިވާ ކަމަށެވެ. މަގުމައްޗަކީ އެންމެނަށް އަމާން ރައްކާތެރި މާހައުލަކަށް ހެދުމަށް ކުރާ މަސައްކަތުގައި ގިނަ ޕްރޮގްރާމްތައް ހިންގި ނަމަވެސް އެކަށީގެންވާ ނަތީޖާއެއް ނުފެންނާނެ ކަމަށާއި، މަގުމަތީގެ ސަލާމާތާއި ރައްކާތެރިކަން ކަށަވަރު ކުރުމަށް މަސައްކަތް ކުރުމަކީ ތަންފީޒީ އިދާރާތަކުން އެކަނި ކުރަންޖެހޭ މަސައްކަތެއް ކަމަށް ދެކޭ ނަމަ ނަތީޖާ ހިތި ކަމަށެވެ. އަދި އެކަށީގެންވާ ނަތީޖާ ފެންނާނީ ހުރިހާ ރައްޔިތުން އެކަމަށް އެއްބާރުލުންދީ ގާނޫނާއި ގަވާއިދާ އެއްގޮތަށް އަމަލުކޮށްގެން ކަމަށް ސޮބާހް ވިދާޅުވިއެވެ.
މީގެ އިތުރުން ސޮބާހް ވިދާޅުވީ މަގުމަތި ބޭނުންކުރާއިރު، އެކަކު އަނެކަކަށް އިހްތިރާމް ކުރަންޖެހޭ ކަމަށެވެ. ނަމަވެސް ބައެއް ފަހަރު މަގުމަތި ޓްރެފިކްވުމާއި އެހެނިހެން ވެސް މައްސަލައަކާ ގުޅިގެން ބަލާލުމެއް ނެތި ހަޑިހުތުރުކޮށް މުއާމާލާތް ކުރާ މަންޒަރު ފެންނަ ކަމަށް އޭނާ ވިދާޅުވިއެވެ.
ރައްކާ ޕްރޮގްރާމާއި ގުޅޭގޮތުން ސަބް އިންސްޕެކްޓަރ އޮފް ޕޮލިސް މުހައްމަދު އަސްލަހް ވިދާޅުވީ ޕްރޮގްރާމް ކުރިއަށް ގެންދިއުމުގައި އާބާދީ ބޮޑު ރަނގަޅު ފެންވަރަށް މަގުތައް ހެދިފައި ހުންނަ ރަށްތަކަށް ޚާއްސަ ސަމާލުކަމެއްދޭ ކަމަށެވެ. އެގޮތުން އައްޑޫ ސިޓީ، ފުވައްމުލައް ސިޓީ، ކުޅުދުއްފުށި ސިޓީ އަދި ހަނިމާދޫގައި ކުރިއަށް ގެންގޮސްފައިވާ ކަމަށް އޭނާ ވިދާޅުވިއެވެ.
އަސްލަހް ވިދާޅުވީ މަގުމަތީގެ ސަލާމަތާއި ރައްކާތެރިކަމާ ގުޅޭގޮތުން ސްކޫލުތަކާއި، ބެލެނިވެރިންނާއި، އަދި ކުންފުނިތަކަށް މައުލޫމާތު ދިނުމުގެ އިތުރުން ހެލްމެޓް ހަދިޔާކޮށްފައިވާ ކަމަށެވެ. އެގޮތުން އެންމެފަހުން އައްޑޫ ސިޓީގައި ހިންގި ޕްރޮގްރާމްގެ ތެރެއިން ވެސް އާއްމު ރައްޔިތުންނަށް 500 ހެލްމެޓް ހަދިޔާ ކުރި ކަމަށް އަސްލަހް ވިދާޅުވިއެވެ.
