އަލް ޙިލާލްގެ ރަސްމީ ހުށަހެޅުމެއް މެސީ އަށް، އަހަރަކު 400 މިލިއަން ޔޫރޯއަށް ވުރެ ބޮޑު އަދަދެއް

ސައުދީ ޕްރޯ ލީގުގެ އަލް ޙިލާލް އިން އާޖެންޓީނާގެ ކެޕްޓަން ލިއޮނަލް މެސީ ހޯދުމަށް އެދި ރަސްމީ ހުށަހެޅުމެއް ފޮނުވައިފި ކަމަށް ބޭރުގެ މީޑިއާ ރިޕޯޓުތައް ބުނެފި އެވެ.

ފްރާންސް ލީގުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ މެސީ އެކުލަބާއެކު ހަދާފައިވާ އެއްބަސްވުމުގެ މުއްދަތު މިއަހަރުގެ ޖޫން މަހުގެ ނިޔަލަށް ހަމަވާނެ އެވެ. މެސީ އޭނާގެ ކުރީގެ ކުލަބު ބާސެލޯނާ ދޫކޮށް ޕީއެސްޖީ އަށް 2021 ވަނަ އަހަރު ބަދަލުވީ ދެ އަހަރު ދުވަހުގެ އެއްބަސްވުމެއް ދަށުންނެވެ. އެއްބަސްވުމުގެ މުއްދަތު ހަމަވާއިރު، ޕީއެސްޖީން އަންނަނީ މެސީ އެ ކުލަބުގައި ބަހައްޓަން މަސައްކަތް ކުރަމުންނެވެ. އަނެއްކޮޅު އޭނާގެ ކުރީގެ ކުލަބު ބާސެލޯނާ އިން، މެސީ އަލުން ހޯދުމުގެ މަސައްކަތް ކުރާ ކަމަށް ވެސް މީޑިއާ ރިޕޯޓުތައް ބުނެ އެވެ. އަލް ޙިލާލް އިން މެސީ އަށް ރަސްމީ ހުށެހެޅުމެއް ދީފައިވާ ކަމަށް މީޑިއާތަކުގައި ބުނެފައި މިވަނީ މެސީގެ މުސްތަޤުބަލާމެދު ސުވާލުތަކެއް އުފެދިފައިވާ ވަގުތެއްގަ އެވެ.

ބޭރުގެ މީޑިއާތަކުގައި ބުނެފައިވާ ގޮތުން އަލް ޙިލާލް އިން ވަނީ ބޮޑު މުސާރައެއް ލިބޭ ހުށަހެޅުމެއް މެސީއަށް ދީފަ އެވެ. އެ ހުށަހެޅުމުގައިވާ ގޮތުން އަހަރެއްގެ މައްޗަށް މުސާރައިގެ ގޮތުގައި މެސީ އަށް 400 މިލިއަން ޔޫރޯ އަށް ވުރެ ބޮޑު އަދަދެއް ދިނުމަށް އެކުލަބުން ވަނީ ހުށަހަޅައިފަ އެވެ. ނަމަވެސް އުމުރުން މިހާރު 35 އަހަރުގެ މެސީ ބޭނުން ވަނީ ޔޫރަޕުގައި ކުޅެން ކަމަށް ރިޕޯޓުތައް ބުނެ އެވެ. މީގެ އިތުރުން ރިޕޯޓުތައް ބުނާ ގޮތުގައި ބާސެލޯނާ އިން އަންނަނީ މެސީ އަލުން އެ ކުލަބަށް ގެންދެވޭ ހުރިހާ މަގަކުން މަސައްކަތް ކުރަމުންނެވެ. އަނެއްކޮޅުން މިހާރުގެ ކުލަބް ޕީއެސްޖީން އޮތީ މެސީ އެކުލަބުގައި ބެހެއްޓުމަށް "އަންލިމިޓެޑް" އެއްބަސްވުމެއް ދޭން ތައްޔާރަށް ކަމަށް ވެސް ރިޕޯޓުތައް ބުނެ އެވެ.

މެސީ ހޯދުމުގެ ޝައުޤުވެރިކަން ސައުދީގެ ކުލަބުތަކުން މީގެ ކުރިން ވެސް ވަނީ ފާޅުކޮށްފަ އެވެ. މެސީއާ އެންމެ ވާދަވެރި އެއް ކުޅުންތެރިޔާ، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ މިހާރު ކުޅެމުން އަންނަނީ ސައުދީ ލީގުގެ އަލް ނަޞްރުންނެވެ. އެ ލީގުގެ ކުލަބުތަކުގެ މައިގަނޑު މަޤްސަދަކީ ދުނިޔޭގައި މޮޅެތި ކަމަށް ދެކޭ ގިނަ ކުޅުންތެރިން އެ ލީގަށް ގެންގޮސް، އެ ލީގު ވަރުގަދަ ކުރުމެވެ.