ކްލެސިކޯގެ މުހިންމު މެޗުގެ ކުރިން ޒަވީ: "އަދިވެސް ފޭވަރިޓުންނަކީ ރެއާލް"

ކޮޕަ ޑެލް ރޭ މުބާރާތުގެ ސެމީ ފައިނަލްގެ ދެ ވަނަ ލެގަށް ކުރިމަތިލާއިރު، އަދި ވެސް ފޭވަރިޓުންނަކީ ރެއާލް މެޑްރިޑު ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.

ބާސެލޯނާގެ އަމިއްލަ ދަނޑުގައި ކުޅޭ ދެ ވަނަ ލެގުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ޒަވީ ބުނީ، އޭނާ އަށް ޓައިގައި އެންމެ ފޭވަރިޓް ޕޮއިންޓަކީ ރެއާލް މެޑްރިޑް ކަމަށެވެ. އެގޮތުން ރެއާލް އަކީ އަދިވެސް މިބާވަތުގެ މެޗުތައް ކުޅެން މާ ހޭނިފައި އޮތް ޓީމެއް ކަމަށާއި، އެމީހުންގެ ތަޖުރިބާ ވެސް މާ ގިނަ ކަމަށެވެ. ޒަވީ ފާހަގަ ކުރި ގޮތުގައި ރެއާލަށް އާދަވެފައި ވަނީ މެޗުތަކުން އެނބުރި އައުމަށެވެ. އެހެންކަމުން ދެ ވަނަ ލެގުގައި ބާސެލޯނާ އިން ވަރަށް ބޮޑަށް ސަމާލުވާން ޖެހޭނެ ކަން ފާހަގަ ކުރަމުން ޒަވީ ބުނީ، އޭނާގެ ނަޒަރުގައި އަދިވެސް ރެއާލް އަކީ ފޭވަރިޓުން ކަމަށެވެ. އެހެން ނަމަވެސް ބާސެލޯނާ އިން ވާދަކުރާނެ ކަމަށާއި އަދި އެމީހުން މަސައްކަތް ކުރާނީ ގޭމް ޑޮމިނޭޓް ކޮށްގެން ކުޅެ، މެޑްރިޑަށް ވުރެ މޮޅުވާން ކަމަށެވެ. އޭނާ ބުނީ ކުރިން ސްޕެނިޝް ލީގުގައި ކުޅުނު މެޗުގައި ވެސް އަދި ސްޕެނިޝް ސުޕަ ކަޕްގެ މެޗުގައި ވެސް މޮޅަށް ކުޅުނީ ބާސެލޯނާ އިން ކަމަށެވެ. ނަމަވެސް ކޮޕަ ޑެލް ރޭ މުބާރާތުގެ ފުރަތަމަ ލެގުގައި އެކަން ނުކުރެވުނު ކަމަށާއި، އެ މެޗުގައި ޑޮމިނޭޓުކޮށްގެން ކުޅުނީ ރެއާލް ކަމަށް އަދި އެއީ ބާސެލޯނާ އިން ބޭނުންވާ ގޮތެއް ނޫން ކަމަށެވެ.

މީގެ އިތުރުން ޒަވީ ބުނީ ރެއާލާ ދެކޮޅަށް އޭނާ އުންމީދު ކުރަނީ ވަރަށް ޓަފް މެޗަކަށް ކަމަށާއި، މެޗު އުނދަގޫ ވާނެ ކަމަށެވެ. އެގޮތުން ރެއާލް އަކީ މޮޅުވާ ޓީމެއް ކަމަށާއި، އަބަދުވެސް އެ ޓީމާ ދެކޮޅަށް ކުޅުމަކީ އުނދަގޫ ކަމެއް ކަމަށެވެ. ރެއާލްގެ ތިބި ކުޅުންތެރިންގެ ތެރެއިން ކެޕްޓަން ކަރީމް ބެންޒެމާ، ވިނީޝިއަސް ޖޫނިއާ، ރޮޑްރީގޯ އަދި ވަލްވާޑޭއާ ދެކޮޅަށް ކުޅުމަކީ ވެސް އުނދަގޫ ކަމެއް ކަމަށް ޒަވީ ބުންޏެވެ. އޭނާ ބުނީ ރެއާލްގައި އޮތީ ވަރަށް ވަރުގަދަ ސްކޮޑެއް ކަމަށާއި، ރެއާލާ ދެކޮޅަށް ކުޅެން ޖެހޭނީ ވަރަށް ވަރަށް އުނދަގޫ މެޗެއް ކަމަށެވެ. ނަމަވެސް ބާސެލޯނާ އިން އެމީހުންނަށް ކުރެވުނު އެންމެ ރަނގަޅަށް މަސައްކަތް ކުރާނެ ކަމަށާއި، މެޗު ކޮންޓްރޯލް ހޯދައިގެން، ޑޮމިނޭޓުކޮށްގެން ކުޅެން ބޭނުންވާ ކަމަށެވެ.

ޒަވީ ބުނީ އެންމެ ފަހު ކަމަކަށް ބާސެލޯނާ އިން ބޭނުންވަނީ ތަށިތައް ކާމިޔާބު ކުރަން ކަމަށާއި، އެކަން ހާސިލް ކުރެވެމުން އަންނަ ކަމަށެވެ. ނަމަވެސް މިހާތަނަށް މި ސީޒަންގައި ކާމިޔާބު ކުރެވުނީ އެންމެ ތައްޓެއްކަން ފާހަގަކުރަމުން ޒަވީ ބުނީ، ބާސެލޯނާ އިން އިތުރު ތަށިތައް ވެސް ބޭނުންވާ ކަަމަށެވެ. އެގޮތުން މި ސީޒަންގެ ސްޕެނިޝް ލީގާއި، ކޮޕަ ޑެލް ރޭ މުބާރާތުގެ ތަށި ބޭނުންވާ ކަމަށެވެ. އޭނާ ބުނީ ބުދަ ދުވަހުގެ ރޭ އެންމެ ވާދަވެރި ރެއާލާ ދެކޮޅަށް ކުޅެގެން، އެ މެޗުން މޮޅުވެ ކަޕްގެ ފައިނަލަށް ދިޔުމުގެ ބޮޑު ފުރުސަތެއް ބާސެލޯނާ އަށް އޮތް ކަމަށެވެ.

ބާސެލޯނާ އިން އަމިއްލަ ދަނޑުގައި ރެއާލާ ދެކޮޅަށް ނުކުންނައިރު ކުރީގައި އޮންނާނީ އެ ޓީމެވެ. ފުރަތަމަ ލެގު ރެއާލްގެ ދަނޑުގައި ކުޅުނުއިރު، 1-0 އިން އެ މެޗު ކާމިޔާބުކޮށްފައި ވަނީ ބާސެލޯނާ އިންނެވެ.