އެކައުންޓަންޓް ޖެނެރަލްގެ މަޤާމަށް އާޒާދު
ދައުލަތުގެ ފައިސާއާއި، ހިސާބާއި ހިސާބުގެ ލިޔެކިޔުންތަކުގެ ނިޒާމް، މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ކަނޑައަޅާފައިވާ ގޮތުގެމަތިން ބެލެހެއްޓުން ހިމެނޭ
އެކައުންޓަންޓް ޖެނެރަލްގެ މަޤާމަށް އައްޔަންކުރެއްވި އާޒާދު
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު، އެކައުންޓަންޓް ޖެނެރަލްގެ މަޤާމު އުފައްދަވައި އެ މަޤާމަށް މުޙައްމަދު އާޒާދު އައްޔަން ކުރައްވައިފިއެވެ.
އާޒާދު މީގެ ކުރިން ހުންނެވީ ފައިނޭންޝިއަލް ކޮންޓްރޯލާގެ މަގާމުގައެވެ. އާޒާދަކީ ފިނޭންސް މިނިސްޓްރީގެ އެސްއޯއީ ފައިނޭންޝަލް ކޮންސަލްޓަންޓުގެ މަގާމު ފުރުއްވި ބޭފުޅެކެވެ. އޭނާ ފައިނޭންޝިއަލް ކޮންޓްރޯލާގެ މަގާމަށް އައްޔަން ކުރެއްވީ ހަ އަހަރު ވަންދެން އެ މަގާމުގައި ހުންނެވުމަށްފަހުގެ ކުރިން އެ މަގާމުގައި ހުންނެވި ފާޠިމަތު ރަޒީނާ އިސްތިއުފާދެއްވުމުންނެެވެ.
އާޒާދަކީ ސީއެފްއޭ ޗާޓަރ ހޯލްޑަރއެއްގެ އިތުރުން، ބިޒްނަސް އެޑްމިނިސްޓްރޭޝަން ދާއިރާއިން ބެޗެލަރސް ޑިގްރީއަކާއި ސައިންސް އިން ފައިނޭންސް ދާއިރާއިން މާސްޓަރ ހާސިލުކުރައްވާފައިވާ ބޭފުޅެކެވެ. އޭގެކުރިން އޭނާ ވަނީ، ފިނޭންސް މިނިސްޓްރީގެ އެސްއޯއީ ރިފޯމް ކޮންސަލްޓަންޓެއްގެ ވަޒީފާއާއި ޚަޒާނާ މޯލްޑިވްސްގެ އެކައުންޓް އެންޑް ފައިނޭންސްގެ އިސްވެރިޔާގެ ގޮތުގައިވެސް މަސައްކަތްކުރައްވައިފައެވެ.
އެކައުންޓަންޓް ޖެނެރަލް މަގާމަކީ މާލިއްޔަތު ގާނޫނުގެ ދަށުން އުފައްދާ މަގާމެކެވެ. މި ގާނޫނުގެ 44 ވަނަ މާއްދާގައި ވަނީ އެކައުންޓަންޓް ޖެނެރަލް އައްޔަންކުރުމާއި އޭނާގެ މަސްއޫލިއްޔަތުގެ ވާހަކައެވެ. މި މާއްދާގެ (ހ) ގައި ބުނެފައިވަނީ ދައުލަތުގެ ފައިސާއާއި، ހިސާބާއި ހިސާބުގެ ލިޔެކިޔުންތަކުގެ ނިޒާމް ބަލަހައްޓައި ހިންގުމަށްޓަކައި މިނިސްޓްރީގައި އެކައުންޓަންޓް ޖެނެރަލްއެއް ހުންނަންވާނެއެވެ. އަދި (ށ) ގައި ބުނެފައިވަނީ އެކައުންޓަންޓް ޖެނެރަލްގެ މަގާމަށް މީހަކު އައްޔަންކުރާނީ މިނިސްޓަރުގެ ލަފާގެމަތިން ރައީސުލްޖުމްހޫރިއްޔާއެވެ.
އެކައުންޓަންޓް ޖެނެރަލްގެ މަސްއޫލިއްޔަތުތައް މި މާއްދާގެ (ރ) ގައި ހިމަނާފައިވެއެވެ. އޭގެ ތެރޭގައި ދައުލަތުގެ ފައިސާއާއި، ހިސާބާއި ހިސާބުގެ ލިޔެކިޔުންތަކުގެ ނިޒާމް، މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ކަނޑައަޅާފައިވާ ގޮތުގެމަތިން ބެލެހެއްޓުމާއި ހިންގުމާއި، ދައުލަތުގެ ފައިސާ ބަލައިގަނެވެނީ، ނުވަތަ ރައްކާތެރިކަމާއެކު ބެލެހެއްޓެނީ، ނުވަތަ ހަރަދުކުރެވެނީ، ނުވަތަ އިންވެސްޓްކުރެވެނީ މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެމަތިންތޯ ބެލުން ހިމެނެއެވެ.
އަދި ދައުލަތުގެ މުދާ ގަނެވެނީ، ނުވަތަ ރައްކާތެރިކަމާއެކު ބެލެހެއްޓެނީ، ނުވަތަ ބޭނުންކުރެވެނީ، ނުވަތަ ވިއްކެނީ، ނުވަތަ ނައްތާލެވެނީ،ނުވަތަ ދޫކޮށްލެވެނީ މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެމަތިންތޯ ބެލުން ހިމެނެއެވެ.
މި މާއްދާގެ މި އަކުރުގެ (1) ވަނަ ނަންބަރުން ފެށިގެން (3) ވަނަ ނަންބަރުގެ ނިޔަލަށް ބަޔާންކޮށްފައިވާ ކަންކަމުގެ އިތުރުން ދައުލަތުގެ މާލިއްޔަތުގެ ގަވާއިދުގެ ދަށުން ކަނޑައަޅާ އެނޫންވެސް މަސްއޫލިއްޔަތު އަދާކުރުން ހިމެނެއެވެ.
