އެސިސްޓެންޓް އެޓަރނީ ޖެނެރަލްގެ މަޤާމަށް ހިޝާމް އައްޔަންކުރައްވައިފި
ހިޝާމް ވަނީ ޕީޖީ އޮފީހުގައި ވެސް މަސައްކަތްކުރައްވާފައި
އެސިސްޓެންޓް އެޓަރނީ ޖެނެރަލްގެ މަޤާމަށް އައްޔަންކުރެއްވި ހިޝާމް
އެސިސްޓެންޓް އެޓަރނީ ޖެނެރަލްގެ މަޤާމަށް ކުރީގެ ޕަބްލިކް ޕްރޮސެކިއުޓަރ އަހްމަދު ހިޝާމް ހަމަޖައްސަވައިފި އެވެ.
ރައީސް އޮފީހުން ބުނީ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް، އެޓަރނީ ޖެނެރަލްގެ އޮފީހުގެ އެސިސްޓެންޓް އެޓަރނީ ޖެނެރަލްގެ މަޤާމަށް، ޏ. ފުވައްމުލަކު، ދަޑިމަގު. މާވައި، އަލްއުސްތާޒް އަހްމަދު ހިޝާމް ވަޖީހު ހަމަޖައްސާފައިވާ ކަަމަށެވެ.
އެސިސްޓެންޓް އެޓަރނީ ޖެނެރަލްގެ މަޤާމަށް ހިޝާމް އައްޔަން ކުރައްވާފައިވާ އިރު އޭނާ ވަނީ ޕްރޮސެކިއުޓަރ ޖެނެރަލް އޮފީހުގެ ޕަބްލިކް ޕްރޮސެކިއުޓަރެއްގެ ގޮތުގައި ވެސް މަސައްކަތް ކުރައްވާފަ އެވެ.
މީގެ އިތުރުން ޕީޖީ އޮފީހުގެ ސްޕޯކްސްޕާސަންގެ ދައުރު ވެސް އަދާކުރައްވާފައި ވެއެވެ.
ހިޝާމް ވަނީ ދައުލަތުގެ ޕްރޮސެކިއުޓަރެއްގެ މަޤާމުގައި ހުންނެވި އިރު ދައުލަތުން ބެލި ބޮޑެތި ބައެއް މައްސަލަތަކުގައި ދައުލަތް ތަމްސީލުކޮށްދެއްވާފަ އެވެ. އެގޮތުން، ކުރީގެ ރައީސް މުހައްމަދު ނަޝީދު 13 އަހަރަށް ޖަލަށްލި މައްސަލަގައި ވެސް އޭނާ ވަނީ ދައުލަތް ތަމްސީލުކޮށްދެއްވާފަ އެވެ. އަދި ކުރީގެ ނައިބު ރައީސް އަހުމަދު އަދީބުގެ މައްޗަށް އުފުލި ބައެއް ދައުވާތަކާއި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔާތުގެ މައްޗަށް އުފުލި ބައެއް ދައުވާތަކުގައި ވެސް ހިޝާމް މަސައްކަތް ކުރެއްވި އެވެ.
ޕީޖީ އޮފީހުގެ ޕަބްލިކް ޕްރޮސެކިއުޓަރގެ މަޤާމުން ހިޝާމް އިސްތިއުފާ ދެއްވީ މި އަހަރުގެ ފެބްރުއަރީ މަހުގެ ތެރޭގަ އެވެ. ހިޝާމް މަޤާމުން އިސްތިއުފާ ދެއްވީ ޕްރޮސެކިއުޓަރ ޖެނެރަލް އައިޝަތު ބިޝާމްއާ ހިތްހަމަނުޖެހިގެން ކަމަށް އެދުވަސްވަރު އަޑުފެތުރިފައި ވެއެވެ.
