ޗެލްސީން ގެންނަން ބޭނުންވާ ކޯޗުންގެ ލިސްޓުގެ ކުރީގައި ނާގަލްސްމަން

ހުސްވެފައިވާ ޗެލްސީގެ ކޯޗުކަމުގެ މަޤާމަށް ގެންނަން ބޭނުންވާ މީހުންގެ ލިސްޓުގެ ކުރީގައި އޮތީ ޖަރުމަނުގެ ހޫލިއަން ނާގަލްސްމަން ކަަމަށް ބޭރުގެ މީޑިއާ ރިޕޯޓުތައް ބުނެފި އެވެ.

ޗެލްސީގެ ކޯޗުކަމުގެ ގްރަހަމް ޕޮޓާ ވަކިކުރުމަށްފަހު ވަގުތީ ގޮތުން ޓީމު ހަވާލުކޮށްފައިވަނީ ބްރޫނޯ ސަލްޓޯ އެވެ. ޗެލްސީގެ ކޯޗުކަމުން ޕޮޓާ ވަކިކޮށްފައިވަނީ އެ ކުލަބުގެ ނަތީޖާތައް ވަރަށް ބޮޑަަށް ދަށްވުމުންނެވެ. އެއަށްފަހު ޗެލްސީން މިހާރު އަންނަނީ އައު ކޯޗެއް ހޯދުމުގެ މަސައްކަތް ކުރަމުންނެވެ. އެ މަސައްކަތުގެ ތެރެއިން ޗެލްސީން ބޭނުންވާ ކެންޑިޑޭޓުންގެ ލިސްޓުގެ ކުރީގައި އޮތީ ނާގަލްސްމަން ކަމަށް ރިޕޯޓުތައް ބުނެ އެވެ. އެކަމުގެ މަޝްވަރާތައް ކޮންމެ ވެސް ވަރަކަށް ޗެލްސީ އާއި ނާގަލްސްމަންއާ ދެމެދު ކުރެވުނު ކަމަށް ރިޕޯޓުތައް ބުނި ނަމަވެސް، މިހާތަނަށް އެ ކުލަބުން ރަސްމީ ވަކި އެއްޗެއް ބުނެފައެއް ނުވެ އެވެ. އެކަމުގެ މަޝްވަރާތައް ކުރިއަށް އޮތް ދުވަސްތަކުގައި ވެސް ކުރިއަށް ދާނެ ކަމަށާއި، ފައިނަލް ނިންމުމެއް ނިންމާނީ އެއަށްފަހު ކަމަށް ރިޕޯޓުތަކުގައި ވަނީ ބުނެފަ އެވެ. މީގެ އިތުރުން ޕޮޓާ ވަކިކުރުމުގެ ކުރިން ޗެލްސީގެ ވެރިން ކުރިއަށްގެންދިޔަ ބައްދަލުވުމުގައި ވަނީ އެ މަގާމަށް ނާގަލްސްމަން ގެނައުމުގެ ވާހަކަތައް ވެސް ދައްކާފައި ކަމަށް ރިޕޯޓުތައް ބުނެ އެވެ. ހަމައެއާއެކު ރިޕޯޓުތައް ބުނާ ގޮތުން ޗެލްސީގެ ވެރިން ދެކޭ ގޮތުގައި ނާގަލްސްމަން އަކީ ހުނަރުވެރި ކޯޗެކެވެ.

އުމުރުން 35 އަހަރުގެ ނާގަލްސްމަން އެންމެ ފަހުން ހުރީ ޖަރުމަނުގެ ޗެމްޕިއަން ބަޔާން މިއުނިކްގެ ކޯޗުކަމުގަ އެވެ. ނަމަވެސް ބަޔާން އިން ވެސް ނާގަލްސްމަން ވަކިކޮށްފައި ވަނީ އެ ޓީމުގެ ނަތީޖާތައް ދަށްވުމ،ުގެ އުޒުރު ދައްކައިފަ އެވެ. އެ މަގާމުން ނާގަލްސްމަން ވަކިކުރުމަށްފަހު، ކޯޗަކަށް ހަމަޖެއްސީ ޗެލްސީގެ ކުރީގެ ކޯޗު ތޯމަސް ޓުޗެލް އެވެ. ޗެލްސީގެ ކޯޗުކަމަށް ނާގަލްސްމަން ހަމަޖައްސައިފި ނަމަ، އެކުލަބު ވާނީ ޖަރުމަނުގެ ކުލަބެއް ނޫން އެހެން ކުލަބަކާ އޭނާ ހަވާލުވާ ފުރަތަމަ ކުލަބެވެ. މީގެ ކުރިން ނާގަލްސްމަން ވަނީ ޖަރުމަނުގެ ހޮފެންހެއިމް އަދި އާރްބީ ލައިޕްޒިގަށް ކޯޗުކަން ކޮށްދީފަ އެވެ. ބަޔާނުން އޭނާ ގެނައީ ލައިޕްޒިގްގައި އޭނާ ކޮށްފައިވާ ރަނގަޅު މަސައްކަތާއި، ނެރުނު ނަތީޖާގެ ސަބަބުންނެވެ.