"ވަޒީރުންނާއި ސުވާލުކުރުމަށް ކިއު ދިގު، މިހާރުވެސް 20 ސުވާލު އެބައޮތް"
ސުވާލު އަނބުރާ ގެންދިއުމުން ސުވާލުކުރަން ބޭނުންވާ މެންބަރުންނަށް ފުރުސަތު ގެއްލޭތީ ނަޝީދުގެ ކަންބޮޑުވުން ފާޅުކުރެއްވި
ކުރީގެ ރައީސް މުހައްމަދު ނަޝީދު
ރައްޔިތުންގެ މަޖިލީހަށް ވަޒީރުންނާއި ސުވާލުކުރުމަށްޓަކައި ހުށަހަޅާފައިވާ ސުވާލުތަކުގެ ތެރެއިން ކިއުގައި މިހާރުވެސް 20 ސުވާލު އެބައޮތް ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު އެފަދައިން ވިދާޅުވީ މަޖިލީހުގެ ރިޔާސަތުގައި އިންނަވާ މެންބަރުންނަށް އަމާޒުކުރައްވާ ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ ވަޒީރުންނާއި ސުވާލުކުރަން ހުށަހެޅުމަށް ފަހު އެ ސުވާލު އަނބުރާ ގެންދެވުމުން ވަޒީރުންނާއި ސުވާލުކުރަން ބޭނުންވާ މެންބަރުންނަށް ފުރުސަތު ގެއްލޭ ކަމަށެވެ. އަދި ވަޒީރުންނާއި ސުވާލު ކުރަން ހުށަހަޅާފައިވާ މިންވަރު ގިނަކަން ނަޝީދު ވަނީ ފާހަގަކުރައްވާފައެވެ.
ހޯމަ ދުވަހު އެޖެންޑާ އަށް ތާވަލުކޮށްފައި އޮތީ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ނަޝީދު ޢަބްދުالله، މިނިސްޓަރ އޮފް ހޯމް އެފެއާޒް އައްޝައިޚް ޢިމްރާން ޢަބްދުالله އާކުރެއްވުމަށް ފޮނުއްވި ސުވާލެވެ.
އޭނާ ކުރައްވަން ހުށަހެޅުއްވި ސުވާލަކީ މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން އިންޑިއަން ހައިކޮމިޝަން އަދި އިންޑިއަން ކަލްޗަރަލް ސެންޓަރު ގުޅިގެން 21 ޖޫން 2022 ވަނަ ދުވަހު އިންޓަރނޭޝަނަލް ޔޯގާ ޑޭ ފާހަގަކުރުމުގެ ގޮތުން ބޭއްވި ޙަރަކާތް ކުރިއަށް ގެންގޮސްފައި ވަނީ މިނިސްޓްރީ އޮފް އިސްލާމިކް އެފެއާޒުން ނުކުރުމަށް އަދި އެތަކެއް ދީނީ ޢިލްމުވެރިންނާއި ޢާންމު ރައްޔިތުން ދެކޮޅުހަދަމުން ދަނިކޮށް ކަމަށްވާއިރު، އެކަން ހުއްޓުމަށްޓަކައި ހޯމް މިނިސްޓަރުގެ ހައިސިއްޔަތުން ކުރެއްވީ ކޮން މަސައްކަތެއްތޯ ސާފުކުރުމަށް ކުރައްވާފައިވާ ސުވާލެކެވެ. އަދި ކުފުރުގެ އެ ޢަމަލު ހުއްޓުވަން ނުކުތް ދިވެހި ދަރިންތަކަކަށް އެހައި ހަރުކަށި އަނިޔާ ދެނީ ކީއްވެތޯ ވެސް ސުވާލު އުފައްދަވާފައިވެއެވެ.
އެހެންނަމަވެސް އާދިއްތަ ދުވަހުގެ ރޭގެ ވަގުތެއްގައި އެ ސުވާލު އަނބުރާ ގެންދަވާފައިވާ ކަމަށް މަޖިލީހުގެ ރައީސް ވަނީ ހޯމަ ދުވަހު ވިދާޅުވެފައެވެ. މީގެ ކުރިންވެސް މެންބަރު ނަޝިދު (މޮސްޓަ) އެ ގޮތަށް ކުރައްވާފައިވާ ސުވާލެއް ފަހު ވަގުތު އަނބުރާ ގެންދަވާފައިވާތީ އެކަން އެގޮތަށް ތަކުރާރު ނުކުރެއްވުމަށް ނަޝީދު ވަނީ ނަސޭހަތްތެރިވެވަޑައިގަންނަވާފައެވެ. އަދި އެ މައްސަލައަށް މެންބަރުން ހައްލެއް ހޯދަން ޖެހޭ ކަަމަށް ވެސް ވިދާޅުވިއެވެ.
