ވަރލްޑް އޯޓިޒަމް އެވެއަރނަސް ޑޭ: މިއަދު ނޫކުލައިގެ ހެދުމެއް ލާން ޖެހެނީ ކީއްވެ؟
2 އެޕްރީލު 2023 | އާދީއްތަ 13:54އޭއެސްޑީއަކީ، ވާހަކަދައްކައިއުޅުމަށާއި އިޖްތިމާއީ ގުޅުންތައް ދެމެހެއްޓުމަށް، އަދި އާންމު ދިރިއުޅުމުގެ ހަރަކާތްތަކަށްވެސް އަސަރުކުރުވާ، އުފެދުމުގައި ހުންނަ ތަފާތުކަމަކަށް ކިޔާނަމެއް
އޯޓިޒަމް ޕޯސްޓަރ
އެޕްރިލް މަހުގެ ދެވަނަ ދުވަހަކީ, ދުނިޔޭގެ ފެންވަރުގައި ފާހަގަކުރާ، އޯޓިޒަމަށް ހޭލުންތެރިކަން އިތުރުކުރުމުގެ ދުވަހެވެ. އޯޓިޒަމް ސްޕެކްޓްރަމް ޑިސްއޯޑަރ (އޭއެސްޑީ)އަކީ ވާހަކަ ދައްކައިއުޅުމަށާއި އިޖްތިމާއީ ގުޅުންތައް ދެމެހެއްޓުމަށް، އަދި އާންމު ދިރިއުޅުމުގެ ހަރަކާތްތަކަށްވެސް އަސަރުކުރުވާފަދަ، އުފެދުމުގައި ހުންނަ ތަފާތުކަމަކަށް ކިޔާނަމެކެވެ. މި ދުވަސް ފާހަގަކުރުމަށް ކޮންމެ އަހަރަކުވެސް ޚާއްޞަ ދުވަހެއް ފާހަގަކުރަމުންދާއިރު، ވަރަށް ގިނަ މީހުން މިދުވަސް ފާހަގަކުރުމުގެ ގޮތުން ނޫކުލައިގެ ހެދުމެއް ބޭނުންކުރެއެވެ. އަދި އެކި ތަންތަނުގައި ނޫކުލައިގެ ބޮކިތައްވެސް ދިއްލައެވެ. މިއީ ހޭލުން ތެރިކަމުގެ ހަރަކާތްތަކަށް އެއްބާރުލުން ދޭކަން ހާމަކުރުމުގެ ގޮތުން ކުރާ ކަމެކެވެ.
އޯޓިޒަމްއާ ގުޅޭ ޚާއްޞަ ދުވަހެއް ފާހަގަކުރަނީ "އޯޓިޒަމް ސްޕީކްސް" އޯގަނައިޒޭޝަންގެ އިސްނެގުމުގެ މަތިންނެވެ. މަގުސަދަކީ އޯޓިޒަމަކީ ކޮބައިކަން ވީހާވެސް ގިނަ ބަޔަކަށް އަންގައިދީ އަދި އެކަން ތަހައްމަލްކުރަމުންދާ ކުދިންނާއި މީހުން މުޖްތަމައުގައި ބަލައިގަންނަ ބަޔަކަށް ހެދުމަށް ހިތްވަރު ދިނުމެވެ.
މިދުވަހާ ބެހޭގޮތުން ހޭލުންތެރިކަން އިތުރުކުރުމަށް ހިންގާ ހަރަކާތްތަކުގައި ވަކި ހޭޝްޓެގް އެއްވެސް ބޭނުން ކުރަމުން ދެއެވެ. މީގެ އިތުރުން ބައެއް މަޝްހޫރު ސްޓޭޑިއަމްތަކާއި ކުޅިވަރު އެރީނާތަކާއި، ޓުއަރިސްޓް މަންޒިލްތަކާއި އެހެންވެސް މީހުން އެއްވާ އެފަދަ ތަންތަނުގައި ނޫކުލަ ގިނައިން ބޭނުންކުރުމަށް ވަނީ ބާރު އަޅާފައެވެ. އަދި ބައެއް ގައުމުތަކުން، ނޫކުލައިގެ ބޮކިތައް ދިއްލުމަށްވެސް ވަނީ ޚާއްޞަ އިސްކަމެއް ދީފައެވެ. މިގޮތުން ބަންގްލާދޭޝްގެ މިނިސްޓްރީ އޮފް ސޯޝަލް ވެލްފެއަރއާއި ސަރުކާރުގެ އެހެން ބައެއް ޑިޕާޓްމަންޓްތަކުގައި މިއަދު ނޫ ބޮކި ދިއްލާނެކަމަށް ޚަބަރުތައް ބުނެއެވެ.
އޯޓިޒަމް އެވެއަރނަސް ދުވަސް ފުރަތަމަ ފާހަގަކުރީ 2007 ވަނަ އަހަރު، އދ.ގެ ޖެނެރަލް އެސެމްބްލީގެ ޚާއްޞަ ނިންމުމަކަށެވެ. އޭގެ ފަހުން ދުނިޔޭގެ ވަރަށް ގިނަ ގައުމު ތަކުގައި މިދުވަސް އަންނަނީ ފާހަގަކުރަމުންނެވެ. މިގޮތުން އޯޓިޒަމް ތަހައްމަލް ކުރަމުންދާ ކުދިން ބައިވެރިކޮށްގެން ޚާއްޞަ ކުޅިވަރު ހަރަކާތްތައް ބޭއްވުމާއި އެކުދިންގެ އަމިއްލަ ނަފްސަށް އޮންނަ އިތުބާރު ވަރުގަދަކުރުމަށް ހިތްވަރު ލިބޭފަދަ ކަންކަމުގައި ބައިވެރިކުރުވުން ހިމެނެއެވެ. އެއީ އެއްގޮތަކަށްވެސް އުނި ނުވަތަ ނުކުޅެދޭ ކުދިން ކަމުގައި ނުދެކި، އެހެން ކުދިންނާ އެކީ އެއް ހަރަކާތްތަކެއްގައި ބައިވެރިވެ އުޅުމަށް ވީހާވެސް ބޮޑަށް މަގުފަހި ކޮށްދިނުމަކީ މުޖްތަމައަށް ލާޒިމް ކަމެކެވެ.
