އިންތިހާބާ ބެހޭ މައިމަރުކަޒަށް ވަދެވޭނީ މި މަހުގެ ފަހުކޮޅު - އިލެކްޝަންސް
ފްލޯ ޕްލޭންތަކާއި، ވޯކް ޗާޓްތަކާއި މިކަންތައްތައް އިދާރީ ގޮތުން ކުރަމުން އެބަދޭ
އިލްކެޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ
އިންތިހާބާ ބެހޭ މައިމަރުކަޒެއް ހަމަޖެހިފައިވީނަމަވެސް، އެތަނަށް ވަދެވޭނީ މި މަހުގެ ފަހުކޮޅުގައި ކަމަށާއި، އޭގެ ކުރިން ކުރަންޖެހޭ ކަންކަން ކުރަމުން އަންނަ ކަމަށް އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ރިޔާސީ އިންތިހާބަށް މިހާރު ކުރެވެމުން އަންނަ މަސައްކަތުގެ ތެރެއިން އެންމެ މުހިންމު އެއްކަމެއްގެ ގޮތުގައި މިހާރު ކުރިއަށްދަނީ މިހާތަނަށް އެންމެ ބޮޑު ދަތިތަކަމެއްގެ ގޮތުގައި ދިމާވެފައިވާ މައްސަލައަށް ހައްލެއް ލިބިފައި އޮތީމަ އެކަމާއިގެން ކުރިއަށްގެންދިއުން ކަމަށެވެ. އެއީ އިންތިހާބާބެހޭ މައި މަރުކަޒުގެ ގޮތުގައި ދަރުބާރުގެ، ހައުސިން މިނިސްޓްރީން ހަޖައްސައިދީފައިވުމުން، ދަރުބާރު ތައްޔާރުކުރުމުގެ އިދާރީ މަސައްކަތް ކުރިއަށްގެންދިއުން ކަމަށެވެ.
ހަސަން ވިދާޅުވީ ވަރަށް ގިނަ މަސައްކަތްތަކެއް ދަރުބާރުގެއަށް ބަދަލުކުރަން ޖެހޭ ކަމަށެވެ. އެހެންކަމުން، އެކަންކަމަށް ބޭނުންވާ ފްލޯ ޕްލޭންތަކާއި، ވޯކް ޗާޓްތަކާއި މިކަންތައްތައް އިދާރީ ގޮތުން ކުރަމުންގެންދާ ކަމަށެވެ. އަދި މި މަސައްކަތް ކުރަން ދަރުބާރުގެއަށް ވަދެވޭނީ މި މަހުގެ ފަހުކޮޅު ކަމަށްވާތީ ދަރުބާރުގެއަށް ވަނުމުގެ ކުރިން ކުރަން ޖެހޭ އިދާރީ މަސައްކަތްތައް އިލެކްޝަންސް ކޮމިޝަނުން ކުރިއަށްގެންދާ ކަމަށެވެ.
ހަސަން ވިދާޅުވީ އިންތިހާބުގެ މަސައްކަތްތައް ކުރިއަށް ގެންދިއުމަށްޓަކައި ވޯޓުލާ މަރުކަޒުތަކަށް ފޮނުވަންޖެހޭ ތަކެތި ހޯދުމުގެ މަސައްކަތް ފަށާފައިވާ ކަމަށެވެ. އޭގެތެރޭގައި ލިޔެކިޔުމާއި ބެހޭ ތަކެއްޗާއި އެހެންވެސް ވޯޓުލުމަށް ބޭނުންވާ ތަކެތި ހޯދުމަށް ޕްރޮކިއުމެންޓް މަރުހަލާގައި، އެތަކެތި ހޯދަން އިއުލާންކުރެވި ބައެއް މަސައްކަތްތައް އެވޯޑްކުރެވި ތަކެތި ހޯދުމުގެ މަސައްކަތް އަޅުގަނޑުމެން ކުރިއަށްދާ ކަމަށެވެ.
އަދި އެއާއެކު އިންތިހާބާ ގުޅުންހުރި ސަރުކާރުގެ އިދާރާތަކާއެކު މަޝްވަރާ ބައްދަލުވުން ބޭއްވި، ބޭނުންވާ އެހީތެރިކަން ފޯރުކޮށްދިނުމާއި ބެހޭ ގޮތުން މަޝްވަރާ ކުރެވެމުންދާ ކަމަށްވެސް ހަސަން ވިދާޅުވިއެވެ.
ހަސަން ވިދާޅުވީ ރިޔާސީ އިންތިހާބާއި ގުޅިގެން އޮބްޒާވްކުރުމަށް ބޭނުންވާ ބައިނަލްއަގުވާމީ އޮބްޒާވަރުންނާއި މޮނިޓަރުންނަށް އެ ފުރުސަތު ހުޅުވާލާފައިވާ ކަމަށެވެ. އަދި ތަންކޮޅެއް ދިގުމުއްދަތެއް މިފަހަރު އެކަމަަށް ދީފައިވާނެ ކަމަށާއި، އެއީ ރިޔާސީ އިންތިހާބަކީ ވަރަށް ގިނަބައެއްގެ ޝައުގުވެރިކަން އެކަމަށް ހުއްޓިފައިވާ ކަމަކަށްވާތީ ކަމަށެވެ. ބައިނަލްއަގުވާމީ ފަރާތްތަކަށް ފުރުސަތު ހުޅުވާލާފައި ވަނީ އަންނަ ޖުލައި މަހުގެ 25 ވަނަ ދުވަހާ ހަމައަށެވެ.
ހަސަން ވިދާޅުވީ މި މަސައްކަތްތަކުގެ އިތުރުން އޮފިޝަލުން ހޯދުމުގެ މަސައްކަތް ވެސް ކުރިއަށްދާ ކަމަށެވެ. އެގޮތުން އޮފިޝަލުން ހޯދުމަށްޓަކައި އިއުލާންކުރެވި އެކަމަށް އެޕްލިކޭޝަން ލިބެމުންދާ ކަމަށެވެ.
