ބޯކޮށް ވާރޭ ވެހި މާލޭގައި ފެންބޮޑުވުމާ ގުޅިގެން، އެމްއެންޑީއެފުން ފެން ހިންދަނީ

މިއަދު ހެނދުނު މާލެއަށް ބޯކޮށް ވާރޭވެހި, މާފަންނު ކޮޅުގައި އެމްއެންޑީއެފުން ފެން ހިންދުމުގެ މަސައްކަތް ފަށައިފިއެވެ.

އެމްއެންޑީއެފުން ބުނީ މާލޭގެ ހަތަރު ސަރަހައްދެއްގައި 8:30ން ފަށައިގެން ފެން ހިންދުމުގެ މަސައްކަތް ކުރިއަށްގެންދާ ކަމަަށެވެ. އެއީ އެކުވެނި ދަނޑު ސަރަހައްދާއި އައިޖީއެމްއެޗް ސަރަހައްދާއި ދިރާގު ހެޑް އޮފީސް ސަރަހައްދާއި ވެސްޓު ޕާކް ސަރަހައްދެވެ.

ހޮނިހިރު ދުވަހު ހެނދުނު ގާތްގަނޑަކަށް ހަތެއް ޖެހީއްސުރެ ވެހެން ފެށި ވާރެއާއެކު އެންމެ ބޮޑަށް ފެންބޮޑުވެފައިވަނީ މާފަންނުގައެވެ. މާފަންނުކޮޅުގައި ވަރަށް ބޮޑަށް ފެންބޮޑުވެ, އެ ސަރަހަައްދުގައި ހުރި ބައެއް ގެތަކަށްވެސް ވަނީ ފެނުގެ އަސަރުކޮށްފައެވެ. އަދި މަގުމަތީގައި ބަހައްޓާފައި ހުރި ސައިކަލުތައްވެސް ފެންބޮޑުވުމުގެ ސަބަބުން ވެއްޓިފައިވާކަމަށް ބައެއް މީހުން ސޯޝަލް މީޑިއާގައި ލިޔެފައިވެއެވެ.

ޓްވިޓަރގައި، މާފަންނުގައި ދިރިއުޅޭ ބައެއް މީހުން ލިޔެފައިވާގޮތުގައި މިހާ ބޮޑަށް މާލެ ފެންބޮޑުވެފައި އޮއްވައެއް ނުފެނެއެވެ. ބައެއް މީހުން ބުނިގޮތުގައި، ތަނބިކައްޓަށްވުރެވެސް މައްޗަށް ވަނީ ފެންބޮޑުވެފައެވެ. އަދި އެ ކަމުގެ ސަބަބުން މަގުމަތީގައި ޕާކުކޮށްފައިހުރި ބައެއް ސައިކަލުތައްވެސް ސްޓާޓް ނުވާކަމަށް މީހުން ވަނީ ބުނެފައެވެ.

މަގުތަކުގައި ފެންބޮޑުވުމާ ގުޅިގެން މާލޭ ސިޓީގެ މޭޔަރު ޑރ. މުހައްމަދު މުއިއްޒު ކުރެއްވި ޓްވީޓެއްގައި ވިދާޅުވީ، މާލޭގައި ފެންބޮޑުވީ ސްޓޯމް ވޯޓާ ޑްރެއިނޭޖް ނިޒާމުގެ ޕަމްޕުތައް ބަލަހައްޓާ ފަރާތްތަކުން އެ ޕަމްޕުތައް ޖެއްސުން ލަސްވުމުގެ ސަބަބުން ކަމަށެވެ. އަދި މަގުތައް ހަދަން ސިޓީ ކައުންސިލުން ފެށި މަސައްކަތް ސަރުކާރުން ހުއްޓުވީކަމަށް އޭނާ ވަނީ ތުހުމަތުކުރައްވާފައެވެ.