ގިނަ ރަށްތަކެއް ބިޑަށް ހުޅުވާލިނަމަވެސް، ބައެއް ސަރަހައްދުތަކުގެ ރަށްތަކަށް ޑިމާންޑެއް ނެތް: މިނިސްޓަރު މައުސޫމް
1 އެޕްރީލު 2023 | ހޮނިހިރު 07:02އިންވެސްޓަރުންވެސް ރަށެއް ކުއްޔަށް ނަގާއިރު ވަރަށް ގިނަ ގޮތްގޮތަށް ބަލާ
ޓޫރިޒަމް މިނިސްޓަރ، ޑރ. އަބްދުﷲ މައުސޫމް
ފަތުރުވެރިކަމުގެ ބޭނުމަށް ކުއްޔަށް ދޫކުރަން ގިނަ ރަށްތަކެއް ބިޑަށް ހުޅުވާލިނަމަވެސް, ބައެއް ސަރަހައްދުތަކުގެ ރަށްތަކަށް ޑިމާންޑް ނެތްކަމަށް، ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގައި ވާހަކަފުޅުދައްކަވަމުން މިނިސްޓަރު މައުސޫމް ވިދާޅުވީ، ރައްޔިތުންގެ އެދުމުގެ މަތިން ވަރަށް ގިނަ ރަށްރަށް ބިޑަށް ހުޅުވާލިކަމަށެވެ. ނަމަވެސް ފަތުރުވެރިކަމުގެ ބޭނުމަށް މިފަހުން ބިޑަށް ހުޅުވާލި ރަށްތަކުގެ ތެރެއިން ބައެއް ސަރަހައްދުތަކުގައި ހުރި ރަށްތަކަށް ޑިމާންޑް ނެތްކަމަށް މިނިސްޓަރު މައުސޫމް ވިދާޅުވިއެވެ. އަދި ވިދާޅުވީ ފަތުރުވެރިކަން ތަރައްގީކުރުމަށް ޑިމާންޑް އޮތްކަމަށް ބެލެވޭ ސަރަހައްދުތަކަށް ޑިމާންޑް އެބައޮތްކަމަށެވެ.
އަބަަދުވެސް ރާއްޖެއަށް އިންވެސްޓަރުންގެ ޝައުގުވެރިކަމާއި، ތަރުހީބު ލިބޭކަން ފާހަގަކުރައްވައި މިނިސްޓަރު ވިދާޅުވީ، އިންވެސްޓަރުންވެސް ރަށެއް ކުއްޔަށް ނަގާއިރު ވަރަށް ގިނަ ގޮތްގޮތަށް ބަލާކަމަށެވެ. އެގޮތުން އެރަށެއްގެ ކައިރީގައި ދަތުރުފަތުގެ ނިޒާމް އޮންނަ ގޮތާއި، ރަށް އުފެދިފައި އޮންނަ ގޮތަށް ބަލާ ކަމަށް މިނިސްޓަރު ވިދާޅުވިއެވެ.
ފަތުރުވެރިކަމުގެ ބޭނުމަށް ކުއްޔަށް ދޫކުރަން ގިނަ ރަށްތަކެއް ބިޑަށް ހުޅުވާލިނަމަވެސް ބައެއް ސަރަހައްދުތަކުގެ ރަށްތަކަށް ޑިމާންޑް ނެތްކަމަށް މިނިސްޓަރު ވިދާޅުވެފައިވާއިރު، ޖެނުއަރީ މަހުގެ 23 ވަނަ ދުވަހު، ރިސޯޓު ތަރައްގީކުރުމަށް 14 ރަށެއް ބިޑަށް ހުޅުވާލިއެވެ. މީގެ ތެރޭގައި އެންމެ ގިނައީ ހުވަދުއަތޮޅުގެ ރަށްތަކެވެ. އެގޮތުން ގއ. އަދި ގދ.ގެ ޖުމްލަ އަށް ރަށެއް ރިސޯޓު ތަރައްގީކުރަން ޓޫރިޒަމް މިނިސްޓްރީން އިއުލާން ކޮށްފައިވެއެވެ.
މި ރަށްތަކުގެ ތެރެއިން އެންމެ ގިނައީ 2022 ވަނަ އަހަރުވެސް ރިސޯޓް ތަރައްގީކުރުމަށް އެ މިނިސްޓްރީން ހުޅުވާލި ރަށްތަކެވެ. ނަމަވެސް އެފަހަރު ވެސް މާ ބޮޑު ތަރުހީބެއް ލިބިފައެއްނުވެއެވެ.
