ޔުއެފާ އަންހެން ޗެމްޕިއަންސް ލީގުގެ ކުއާޓާ ފައިނަލްގައި ޕެނަލްޓީ ޖަހައިގެން އެންމެ ފަހުގެ ޗެމްޕިއަން ލިއޯން ބަލިކޮށް، ޗެލްސީން މުބާރާތުގެ ސެމީ ފައިނަލަށް ދަތުރުކޮށްފި އެވެ.

ބުރާސްފަތި ދުވަހުގެ ރޭ ޗެލްސީގެ އަމިއްލަ ދަނޑުގައި ކުޅުނު މެޗަށް ނުކުތްއިރު ކުރީގައި އޮތީ ވެސް އެ ޓީމެެވެ. އެއީ ކުއާޓާ ފައިނަލްގެ ފުރަތަމަ ލެގުގައި ލިއޯންގެ ދަނޑުގައި 1-0 އިން މޮޅުވެފައި އޮތުމުންނެވެ. ނަމަވެސް ޗެލްސީގެ ދަނޑުގައި ކުޅުނު މެޗުގައި ލިއޯން އިން ވަނީ ދެ ލަނޑު ޖަހައި ކުރި ހޯދައިފަ އެވެ. ލިއޯން އިން މެޗުގައި ލީޑު ނަގާފައި ވަނީ ދެ ވަނަ ހާފުގަ އެވެ. މެޗުގެ 77 ވަނަ މިނެޓުގައި އެ ޓީމަށް ލީޑު ނަގައިދިނީ ވެނެސާ ޖިލްސް އެވެ. އެއީ ލިއޯންގެ ލިންޑްސީ ހޯރަން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެވެ. ލިއޯން އިން ދެ ވަނަ ލަނޑެއް ޖަހައި އެގްރިގޭޓުން ކުރި ހޯދީ ނަތީޖާ ނެރުމަށް ކުޅުނު އިތުރު ހާފުގަ އެވެ. އަޑާ ހެގާބާގް ތަނަވަަސްކޮށްދިން ފުރުސަތެއްގައި ސާރާ ޑަބްރިޓްޒް ލަނޑު ޖެހީ 110 ވަނަ މިނެޓުގަ އެވެ. އެ ނަތީޖާގައި އޮވެ މެޗު ނިމެން ދަނިކޮށް ޗެލްސީ ސަލާމަތްވީ ފަހު ވަގުތު ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބުކޮށް މެޗުން ޗެލްސީ ސަލާމަތްކޮށްދިނީ މާރެން އެމްޖެލްޑޭ އެވެ. އެއާއެކު އެގްރިގޭޓް 2-2 އިން އެއްވަރުވުމުން ނަތީޖާ ނެރުމަށް ޖެހީ ޕެނަލްޓީ އެވެ.

ޕެނަލްޓީ ގައި ޗެލްސީން ވަނީ ފަސް ޕެނަލްޓީގެ ތެރެއިން ހަތަރު ޕެނަލްޓީ ކާމިޔާބުކޮށްފަ އެވެ. އެއީ އެމްޖެލްޑޭ، ސޭމް ކެރް، ޖެސީ ފްލެމިންގް އަދި ޖެސް ކާޓާގެ ޕެނަލްޓީ އެވެ. ޗެލްސީން ނާކާމިޔާބުވީ ލޯރެން ޖޭމްސްގެ ޕެނަލްޓީ އެވެ. ފަސް ޕެނަލްޓީގެ ތެރެއިން ލިއޯން އަށް ކާމިޔާބު ކުރެވުނީ ތިން ޕެނަލްޓީ އެވެ. އެއީ ޑެޒްސެނިފާ މަރޮޒްސަން، ހެގާބާގް އަދި ޑަބްރިޓްޒްގެ ޕެނަލްޓީ އެވެ. ލިއޯންގެ ވެންޑީ ރެނާޑް އަދި ހޯރަންގެ ޕެނަލްޓީ ވަނީ ނާކާމިޔާބުވެފަ އެވެ.

މުބާރާތުގެ ސެމީ ފައިނަލްގައި ޗެލްސީ ނުކުންނަން ޖެހޭނީ ބާސެލޯނާއާ ދެކޮޅަށެވެ. ފުރަތަމަ ލެގު އޮތީ އޭޕްރީލް މަހުގެ 23 ވަނަ ދުވަހު ޗެލްސީގެ ދަނޑުގަ އެވެ. ދެ ވަނަ ލެގު ބާސެލޯނާގެ ދަނޑުގައި އޮތީ 29 ގައެވެ.