ޖުމްހޫރީ ޕާޓީގެ ކައުންސިލް މެންބަރު ހަސަން ޝާހް އެ ޕާޓީން ވަކިވެވަޑައިގެންފިއެވެ.
ބުރާސްފަތި ދުވަހުގެ ރޭ ޝާހު ކުރެއްވި ޓްވީޓެއްގައި ވިދާޅުވީ 2023ގެ ރިޔާސީ އިންތިހާބުގައި ރައީސް އިބްރާހިމް މުހައްމަދު ޞާލިހުއަށް ތާއީދު ކުރާތީ ޖުމްހޫރީ ޕާޓީން ވަކިވެފައިވާ ކަމަށެވެ. އަދި އޭނާ ވަނީ އެ ކަން ސިޓީއަކުން ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ދަންނަވައިފައެވެ.
އެމްޑަބްލިޔުއެސްސީގެ މެނޭޖިން ޑިރެކްޓަރުގެ މަގާމު ފުރުއްވަމުން ގެންދަވާ ޝާހު އެ ސިޓީގައި ވިދާޅުވެފައިވަނީ ރައީސް އިބްރާހިމް މުހައްމަދު ޞާލިހުގެ ރިޔާސީ ދައުރުގައި ދެއްވައިފައިވަނީ ގައުމުގެ ހަމަޖެހުމާއި އަސާސީ ހިދުމަތް ފޯރުކޮށްދިނުމާއި ތަރައްގީ ކަމަށެވެ. އެހެންކަމުން، 2023ވަނަ އަހަރުގެ ރިޔާސީ އިންތިހާބުގައި އެ މަނިކުފާނަށް ތާއީދުކުރައްވާތީ ޖުމްހޫރީ ޕާޓީގެ ކައުންސިލް މެންބަރުކަމުގެ މަގާމުން އިސްތިއުފާ ދެއްވަން ނިންމައިފައިވާ ކަމަށެވެ. އަދި ޖޭޕީގެ ދަފްތަރުން އޭނާގެ ނަން އުނިކޮށްދެއްވުމަށް އެދޭ ކަމަށް ވެސް ޝާހުގެ ސިޓީގައި ވެއެވެ.
ޖުމްހޫރީ ޕާޓީން ވަކިވެވަޑައިގަތުމަށް ޝާހު ނިންމަވައިފައިވާއިރު، އެ ޕާޓީގެ ލީޑަރު ގާސިމްގެ އެޑްވައިޒަރެއްގެ މަގާމުގައި ހުންނެވި އެމްޓީސީސީގެ ސީއީއޯ އާދަމް އާޒިމް ވެސް ވަނީ ބުރާސްފަތި ދުވަހުގެ ރޭ އެ މަގާމުން އިސްތިއުފާ ދެއްވައިފައެވެ. އަދި ޖޭޕީއިން ވަކިން އިންތިހާބަށް ވާދަކުރައްވަން ނިންމެވުމާއެކު ރައީސް އޮފީހުގެ މިނިސްޓަރު އަހްމަދު ސަމީރު ވެސް ވަނީ އެ ޕާޓީން އިސްތިއުފާ ދެއްވައިފައެވެ.
