އެންމެ މަދުން މީހުން ދިރިއުޅެނީ ރަކީދޫގައި، އެންމެ 63 ދިވެހީން!

ރާއްޖޭގެ މީހުން ދިރިއުޅޭ ރަށްރަށުގެ ތެރެއިން އެންމެ މަދުން މީހުން ދިރިއުޅެނީ ވ. ރަކީދޫގައިކަމަށް ތަފާސް ހިސާބުތަކުން ދައްކައިފިއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކުރި 2022ވަނަ އަހަރުގެ ބޯހިމެނުމުގެ ވަގުތީ ނަތީޖާއިން ދައްކާގޮތުން; ރަކީދޫގައި ދިރިއުޅޭ މީހުންގެ އާބާދީއަކީ 77 މީހުންނެވެ. އެއީ 63 ދިވެހީންނާއި 14 ބިދޭސީންނެވެ. ދެވަނައަށް އެންމެ މަދުން މީހުން ދިރިއުޅެނީ އދ. ދިއްދޫގައެވެ. އެ ރަށުގައި ދިރިއުޅެނީ 140 މީހުންނެވެ. އެއީ 111 ދިވެހީންނާއި 29 ބިދޭސީންނެވެ.

ދެން އެންމެ މަދުން މީހުން ދިރިއުޅޭ ރަށްތަކަކީ، މ. ރަތްމަންދޫ، ލ. މުންޑޫ، ބ. ފެހެންދޫ، ވ. ތިނަދޫ، ހއ. ތަކަންދޫ، ހއ. މުޅަދޫ، ހދ. ހިރިމަރަދޫ އަދި މ. ވޭވަށެވެ. އެއިން ކޮންމެ ރަށެއްގައިވެސް އުޅެނީ 300އަށްވުރެ މަދު މީހުންނެވެ.

ބޯހިމެނުމުގެ ވަގުތީ ނަތީޖާ ދައްކާގޮތުން، އަތޮޅުތެރޭގައި އެންމެ ގިނަ މީހުން ދިރިއުޅެނީ ސ. ހިތަދޫގައެވެ. އެ ރަށުގައި ޖުމުލަ 13،745 މީހުން އުޅެއެވެ. އެއީ 11،070 ދިވެހީންނާއި 2،675 ބިދޭސީންނެވެ. ދެވަނަ އަށް އެންމެ ގިނަ މީހުން ދިރިއުޅެނީ ހދ. ކުޅުދުއްފުށީގައެވެ. އެ ރަށުގައި ޖުމުލަ 10،251 މީހުން ދިރިއުޅެއެވެ. އެއީ 9،265 ދިވެހީންނާއި 986 ބިދޭސީންނެވެ.

ދެން އެންމެ ގިނައިން މީހުން ދިރިއުޅޭ ރަށްތަކަކީ ޏ. ފުވައްމުލައް، ގދ. ތިނަދޫ، ޅ. ނައިފަރު، ލ. ގަން، ކ. މާފުށި، ސ. ފޭދޫ، ހއ. ދިއްދޫ އަދި ރ. ދުވާފަރެވެ.

ބޯހިމެނުމުގެ ވަގުތީ ނަތީޖާ ދައްކާގޮތުން، ރާއްޖޭގެ 41 އިންސައްތަ މީހުން ދިރިއުޅެނީ މާލޭގައެވެ.