އެމެރިކާއިން އެނބުރި ރާއްޖެ އަންނަ ދިވެހީން ކަރަންޓީން ކުރުމަށް ނިންމައިފި

އާންމު ސިއްޙަތު ރައްކާތެރި ކުރުމުގެ ޤާނޫނުން ލިބިދޭ ބާރުގެ ދަށުން ޔުނައިޓެޑް ސްޓޭޓްސް އޮފް އެމެރިކާއިން އެނބުރި އަންނަ ދިވެހިން 14 ދުވަހުގެ މުއްދަތަށް ކަރަންޓީން ކުރުމަށް ނިންމައިފިއެވެ.

އެ ޤާނޫނުގެ ދަށުން ރާއްޖޭގައި ސިއްޙީ ކުއްލި ނުރައްކަލުގެ ޙާލަތު އިއުލާނުކޮށް ގިނަ ފިޔަވަޅުތަކެއް އަޅަމުންދާއިރު، ބުދަ ދުވަހު ހެލްތު ޕްރޮޓެކްޝަން އޭޖެންސީން ނެރުނު ބަޔާނެއްގައި ބުނެފައިވަނީ، ބުދަ ދުވަހުގެ ރެއިން ފެށިގެން އެމެރިކާއިން އެނބުރި ރާއްޖެ އަންނަ ދިވެހިން ސަރުކާރުން ކަނޑައަޅާ ތަނެއްގައި 14 ދުވަހުގެ މުއްދަތަކަށް ކަރަންޓީން ކުރެވޭނެ ކަމަށެވެ.

އޭގެ އިތުރުން، ކޮވިޑް-19 އާ ގުޅިގެން މިހާތަނަށް ރާއްޖެއަށް އެތެރެވުން މަނާކޮށްފައިވާ ޤައުމުތަކާއި ސަރަޙައްދުތައް ފިޔަވައި އެހެން ޤައުމުތަކުން އަންނަ ދިވެހިންވެސް 14 ދުވަހުގެ މުއްދަތަށް ގޭގައި އެކަހެރިކުރުން (ހޯމް އައިސޮލޭޝަން) ޖެހޭނެކަމަށް އެޗްޕީއޭގެ ބަޔާނުގައި ބުނެފައިވެއެވެ.

ރާއްޖެއަށް އެތެރެވުން މަނާކޮށްފައިވާ ބައެއް ޤައުމުތަކުގެ ތެރޭގައި ޗައިނާ، އިޓަލީ، އިރާން، ސައުތު ކޮރެއާ (2 ސަރަޙައްދެއް)، ބަންގްލަދޭޝް، ޖަރުމަނު (2 ސަރަޙައްދެއް)، ސްޕެއިން، ފްރާންސްގެ ސަރަޙައްދެއް، މެލޭޝިއާ ހިމެނެއެވެ.