ދިވެހިބަހަކީ ދިވެހީންގެ އަމިއްލަވަންތަކަމުގެ ރަމްޒު، ދިވެހި ޤައުމިއްޔަތުގެ ހިތް: ރައީސް
ރައީސް ވަނީ ދުވަހުގެ ތަހުނިޔާ ރާއްޖޭގެ ރައްޔިތުންނަށް އަރިސްކުރައްވާފައި
ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިހު
ދިވެހިބަހަކީ ދިވެހީންގެ އަމިއްލަވަންތަކަމުގެ ރަމްޒު ކަމަށާއި، ދިވެހި ޤައުމިއްޔަތުގެ ހިތްކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިހު ވިދާޅުވެއްޖެއެވެ.
އޭޕްރީލް މަހުގެ 14 ވަނަ ދުވަހު ފާހަގަކުރަމުންދާ ދިވެހި ބަހުގެ ދުވަހާއި ގުޅިގެން ރައީސް ސޯލިހު ކުރެއްވި ޓްވީޓެއްގައި ވަނީ ދުވަހުގެ ތަހުނިޔާ ރާއްޖޭގެ ރައްޔިތުންނަށް އަރިސްކުރައްވާފައެވެ.
ރައީސް ސޯލިޙު ވިދާޅުވީ، ދިވެހިބަހަކީ ދިވެހީންގެ އަމިއްލަވަންތަކަމުގެ ރަމްޒު ކަމަށާއި، ދިވެހި ޤައުމިއްޔަތުގެ ހިތް ކަމަށެވެ. އަދި އެއީ އަޅުގަނޑުމެން ހުރިހާ ދިވެހިން ގުޅުވާލަދޭ ފާލަމުގެ ގޮތުގައި ރައީސް ސޯލިޙު ވަނީ ސިފަ ކުރައްވާފައެވެ.
ކޮންމެ އަހަރެއްގެ އޭޕްރީލް މަހުގެ 14 ވަނަ ދުވަހަކީ ރާއްޖޭގައި ފާހަގަކުރާ ދިވެހިބަހުގެ ދުވަހެވެ. އެގޮތުން މި އަހަރުގެ ދިވެހިބަހުގެ ދުވަހުގެ ޝިޢާރަކީ" ފޮތް ކިޔުމާއި މުއާމަލާތު ކުރުން: އިސްކަން ދިވެހިބަހަށް”އެވެ.
ދިވެހި ބަހުގެ އެކަޑަމީން ބުނީ، މި ޝިޢާރުން ބާރު އަޅަނީ ދިވެހި ބަހުން ލިޔެފައިވާ ފޮތްތައް ކިއުމާއި ދިވެހިބަހުން މުއާމަލާތު ކުރުމަށް ކަމަށެވެ.
