އަނިޔާ އިން ރަނގަޅުވެ ސްޕެއިންގެ މިޑްފީލްޑަރު އެލެކްސިއާ ޕުޓޭޔާސް ބާސެލޯނާގެ ފަރިތަކުރުންތަކަށް ޙާޟިރުވެއްޖެ އެވެ.

ޕުޓޭޔާސް އަށް ކަކުލުގެ އަނިޔާ އަށް ލިބުނީ މިދިޔަ އަހަރުގެ މެދުތެރޭގަ އެވެ. އެ އަނިޔާގެ ސަބަބުން އޭނާ ވަނީ ކުޅުމާ ދުރުގައި ވެސް ދުވަސްތަކެއް ހޭދަކޮށްފަ އެވެ. ނަމަވެސް އަނިޔާ އިން ރަނގަޅުވުމުން އޭނާ ވަނީ ބާސެލޯނާ އިން އަންގާރަ ދުވަހު ކުރިއަށްގެންދިޔަ އެ ޓީމުގެ ފަރިތަކުރުންތަކުގައި ބައިވެރިވެފަ އެވެ. ބާސެލޯނާ ޓީމުގެ މައިގަނޑު ތަނބު ކަމަށްވާ ޕުޓޭޔާސް އަށް ފީފާގެ އެންމެ މޮޅު އަންހެން ކުޅުންތެރިޔާގެ މަގާމު ލިބުނީ، 2022 ވަނަ އަހަރު ޖެހި ޖެހިގެން ތިން ވަނަ ފަހަރަށް ސްޕެނިޝް ލީގުގެ ޗެމްޕިއަންކަން ހޯދައި، ޗެމްޕިއަންސް ލީގުގެ ރަނަރަޕްކަން ހޯދައި އަދި 11 ލަނޑު ޖަހާފައި ވުމުންނެވެ.

ބާސެލޯނާ އިން މިހާރު ތައްޔާރުވަމުން އަންނަނީ އަންހެނުންގެ ޗެމްޕިއަންސް ލީގުގެ ކުއާޓާ ފައިނަލްގެ ދެ ވަނަ ލެގުގައި ރޯމާއާ ދެކޮޅަށް ނުކުތުމަށެވެ. ޕުޓޭޔާސް ބާސެލޯނާގެ ފަރިތަކުރުންތަކަށް ޙާޟިރުވުމުން އެ ޓީމުގެ ކޯޗު ޖޮނަޓަން ޖިރާލްޑޭޒް ބުނީ، އޭނާ އަށް ފެންނަނީ ޓީމު ވަރަށް ބޮޑަށް ތައްޔާރުވެފައި އޮތް މަންޒަރު ކަމަށެވެ. އޭނާ ބުނީ އެކަން އެގޮތަށް ވަނީ އެންމެ ފަހުން ރޯމާގައި ކުޅުނު މެޗުގެ ސަބަބުން ނޫން ކަމަށާއި، ބާސެލޯނާގައި އޮތް ވަރުގަދަ ރޫޙެއްގެ ސަަބަބުން ކަމަށެވެ. އޭނާ ބުނީ ޕުޓޭޔާސް ފަރިތަކުރުންތަކުގައި ބައިވެރުވުމަކީ ވަރަށް ބޮޑު އުފަލެއް ކަމަށާއި، އުންމީދަކީ އޭނާ އަށް ވީ އެންމެ އަވަސް މުސްތަޤުބަލެއްގައި ކުޅެވޭނެވަރުވުން ކަމަށެވެ.

ބާސެލޯނާގެ އަމިއްލަ ދަނޑުގައި އެ ޓީމުން ރޯމާއާ ދެކޮޅަށް ނުކުންނާނީ ބުދަ ދުވަހުގެ ރޭ ރާއްޖެ ގަޑިން 21:45 ގައެވެ. އެ މެޗުން މޮޅުވާ ޓީމަކަށް މުބާރާތުގެ ސެމީ ފައިނަލްގައި ވާދަކުރަން ޖެހޭނީ ލިއޯން ނުވަތަ ޗެލްސީއާ އެވެ.