ޔޫރޯ ކޮލިފައިންގައި ޖޯޖިއާއާ ދެކޮޅަށް ކުޅުނު މެޗުން ނޯވޭ އެއްވަރުވެއްޖެ އެވެ.

ޖޯޖިއާގެ ބަޓުމީގައި ހުންނަ، ބަޓުމީ ސްޓޭޑިއަމްގައި ކުޅުނު މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. ނޯވޭ އިން ކޮލިފައިންގެ މެޗުތައް ކުޅެމުން އަންނަނީ އެ ޓީމުގެ އެންމެ އިތުބާރު ކުޅުންތެރިޔާ އާލިން ހާލަންޑު ނުލަ އެވެ. ހާލަންޑަށް ކޮލިފައިންގެ މެޗުތައް ގެއްލުނީ، ޤައުމީ ޓީމުގެ ފަރިތަކުރުންތަކަށް ޙާޟިރުވެ ހުއްޓަ އެވެ. އެއާއެކު އޭނާ ވަނީ ޤައުމީ ޓީމު ދޫކޮށް، ކުލަބަށް ގޮސްފަ އެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ނޯވޭ އިންނެވެ. މެޗު ފަށައިގެން 15 ވަނަ މިނެޓުގައި ފްރެޑްރިކް އޯސްނެސް ތަނަވަސްކޮށްދިން ފުރުސަތެއްގައި ނޯވޭ އަށް ލީޑު ނަގައިދިނީ އެލެގްޒެންޑާ ސޯލޮތު އެވެ. އެ ލީޑު ހިފަހައްޓައިގެން ކުޅެމުން އައި ނޯވޭ އިން ވަނީ އިތުރު ލަނޑު ޖެހުމަށް ވެސް މަސައްކަތްކޮށްފަ އެވެ. ނަމަވެސް ދެ ވަނަ ހާފުގައި ޖޯޖިއާ އިން ވަނީ ލަނޑު ޖަހައި މެޗުގެ ނަތީޖާ ހަމަހަމަކޮށް، ނޯވޭ އަތުން ޕޮއިންޓެއް ހޯދައިފަ އެވެ. މެޗުގެ 60 ވަނަ މިނެޓުގައި ޖޯޖިއާ އަށް ނަތީޖާ ހަމަހަމަކޮށްދިނީ ޖޯޖްސް މިކައުޓާޒޭ އެވެ. އެއީ އެ ޓީމުގެ ސޮލޮމަން ކްވިރްކްވެލިއާ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މި ނަތީޖާއާއެކު ނޯވޭ އަށް ވަނީ ކޮލިފައިންގައި އިތުރު ހާސްކަމާ ކުރިމަތިލާން ޖެހިފަ އެވެ. އެ ޓީމު ކުޅުނު ފުރަތަމަ މެޗުގައި ވަނީ ސްޕެއިން އަތުން ބަލިވެފަ އެވެ. ކުޅުނު ދެ މެޗުން އެއް ޕޮއިންޓާއެކު ނޯވޭ އޮތީ ގްރޫޕް އޭގެ ތިން ވަނައިގަ އެވެ. ކުޅުނު އެއް މެޗުން އެއް ޕޮއިންޓާއެކު ޖޯޖިއާ އޮތީ ހަތަރު ވަނައިގަ އެވެ.