ގެތަކުން ކުނި ނަގާ ރޭޓަކީ ދުވާލަކަށް 4.93 ރުފިޔާ
ގޭބިސީތަކުން ބޭނުން ނުކުރާ ކަރަންޓް މީޓަރުތަކުގައި، ކުނި އުކާލުމުގެ ޚިދުމަތުގެ ފީ ނުހިމެނޭނެ
ވެމްކޯއިން ކުނި އުކާލުމުގެ މަސައްކަތްކުރަނީ
އޭޕްރީލް މަހުން ފެށިގެން ވޭސްޓް މެނޭޖްމަންޓް ކޯޕަރޭޝަން (ވެމްކޯ)އިން ގޭބިސީތަކުން ނަގާ ކުނީގެ އަގު ސްޓެލްކޯ ބިލުގައި ހިމެނުމަށް ހަމަޖެހިފައިވާއިރު، ގެތަކުން ކުނި ނަގާނީ ދުވާލަކަށް 4.93 ރުފިޔާގެ ރޭޓުންކަމަށް އެކުންފުނިން ބުނެފިއެވެ.
ވެމްކޯއިން ބުނީ ގޭބިސީތަކުން ބޭނުން ނުކުރާ ކަރަންޓް މީޓަރުތަކުގައި، ކުނި އުކާލުމުގެ ޚިދުމަތުގެ ފީ ނުހިމެނޭނެކަމަށެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަފުޅުދައްކަވަމުން ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވެފައިވަނީ، ވެމްކޯގެ ބިލާއި ސްޓެލްކޯގެ ކަރަންޓު ބިލު އެއްކޮށްލުމާއެކު ކުނީގެ ބިލް ޗާޖުކުރަމުންދާނީ ސްޓެލްކޯއިން ކަރަންޓް ބިލަށް ރީޑިންގ ނަގާ މުއްދަތަށް ކަމަށެވެ.
ދުވާލަކަށް 4 ރުފިޔާ 93 ލާރި ކަނޑައެޅުމާގުޅޭގޮތުން ވެމްކޯގެ އޮފިޝަލަކު "ރާއްޖެއެމްވީ"އަށް މައުލޫމާތު ދެއްވަމުން ވިދާޅުވީ، ވެމްކޯއިން ކޮންމެ ގޭބިސީއަކުންވެސް ނަގާއަގަކީ 150 ރުފިޔާކަމަށެވެ. ދުވާލަކަށް ޖެހޭ އަދަދު ކަނޑައަޅާފައިވަނީ އަހަރަކަށް އަރާވަރުން ދުވާލަކަށް އަރާ އަދަދު ބަލައިގެންކަމަށެވެ.
މީގެއިތުރުން ވެމްކޯއިން ބުނީ ގޭބިސީތަކުގެ މެއިންޓެނެންސް، ސަރވިސް، ބޫސްޓަރ ޕަމްޕް އަދި ޓެލެކޮމްފަދަ މީޓަރުތައް ބިލުން އުނިކުރުމަށް ވެމްކޯގެ ވެބްސައިޓްގައިވާ "ޔުޓިލިޓީ މީޓަރ އެކްސްކްލޫޝަން ފޯމު" ހުށަހަޅަންވާނެކަމަށެވެ.
ސްޓެލްކޯގެ ކަރަންޓު ބިލުގައި ވެމްކޯގެ ކުނި ބިލު ހިމަނަން ނިންމާފައިވަނީ ކުނި ނެގުމުގެ ޚިދުމަތަށް ފައިސާ ނުދައްކާ މައްސަލައަށް ހައްލު ހޯދުމުގެ ގޮތުންނެވެ. ވެމްކޯއިން ބުނެފައިވަނީ މާލޭ ސަރަހައްދުގައި ފީދައްކަންޖެހޭ ޖުމްލަ 53,690 (ފަންސާސް ތިންހާސް ހަސަތޭކަ ނުވަދިހަ) ގޭބިސީ ހުރިނަމަވެސް، ވެމްކޯގެ ޚިދުމަތަށް ރަޖިސްޓްރީކޮށްގެން ބަރާބަރަށް ފީ ދައްކަމުން އަންނަނީ ގާތްގަނޑަކަށް 20,000 (ވިހި ހާސް) ގޭބިސީންކަމަށެވެ. އެހެންކަމުން ދެމެހެއްޓިނިވިގޮތެއްގައި މި ޚިދުމަތްދިނުމަށާއި، އަދި ކުނި މެނޭޖްކުރުމަށް މި ގެނެވޭ ބޮޑެތި ބަދަލުތަކުގެ ޚަރަދު ބެލެހެއްޓޭނީ ޚިދުމަތް ހޯދާ ހުރިހާ ފަރާތަކުންވެސް ވެމްކޯއަށް ފީ ދައްކައިގެން ކަމުގައި ވާތީ، އެންމެ ފަސޭހައިން، ޚަރަދުކުޑަކޮށް މި ފީ ލިބިގަނެވޭނެ ގޮތަކީ އާންމު ބޭނުންތަކުގެ އެހެން ޚިދުމަތެއްގެ ބިލުގައި ހިމަނައިގެން ފީ ނެގުން ކަމަށެވެ.
