އެމްއެންޑީއެފްގެ ޗީފް ވޮރަންޓް އޮފިސަރގެ ރޭންކް މުޅިން އަލަށް ފަސް ފަރާތަކަށް ހަވާލުކުރައްވައި މަގާމުގެ ކުރިއެރުން ދެއްވައިފިއެވެ.

މި ރަސްމިއްޔާތު އޮތީ މިއަދު ހެނދުނު ސިފައިންގެ މައި މަރުކަޒު ބަންޑާރަކޮށީގައެވެ. މަގާމުގެ ކުރިއެރުން ލިބިވަޑައިގަތް ފަސް ބޭފުޅުންނަށް މަގާމުގެ ލިޔުން ހަވާލުކޮށްދެއްވީ މިނިސްޓަރ އޮފް ޑިފެންސް، މާރިޔާ އަހުމަދު ދީދީއެވެ. އަދި މި ފަސް ބޭފުޅުންނަށް ރޭންކް ހަވާލުކޮށްދެއްވީ ޗީފް އޮފް ޑިފެންސް ފޯރސް، މޭޖަރ ޖެނެރަލް އަބްދުﷲ ޝަމާލެވެ.

ޗީފް ވޮރަންޓް އޮފިސަރގެ ރޭންކް މިއަދު ލިބިވަޑައިގެންވި ފަސް ބޭފުޅުންގެ ތެރޭގައި އަންހެން ބޭފުޅަކު ހިމެނިވަޑައިގަންނަވާ ކަމަށް އެމްއެންޑީއެފުން ބުނެއެވެ. މިއަދުގެ ރަސްމިއްޔާތަށްފަހު މިނިސްޓަރ މާރިޔާ ވަނީ މި ފަސް ބޭފުޅުންނާ ބައްދަލުކުރައްވައި މަރުހަބާ ވިދާޅުވެފައެވެ. މިނިސްޓަރ މާރިޔާ ވިދާޅުވީ، މިއީ 130 އަހަރަށްވުރެ ގިނަ އަހަރުވެފައިވާ ސިފައިންގޭގެ މުއައްސަސާގައި ފުރަތަމަ ފަހަރަށް ޗީފް ވޮރަންޓް އޮފިސަރގެ ރޭންކް އައްޔަންކުރެއްވި ފުރަތަމަ ފަހަރު ކަމަށާއި، މިފަސް ބޭފުޅުންގެ ދައުރު ސިފައިންގެ ތާރީޚުގައި ލިޔެވިގެން ދާނެ ކަމަށެވެ.

މިރަސްމިއްޔާތުގައި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފްގެ އިތުރުން ސިފައިންގެ ޖެނެރަލް އޮފިސަރުން ބައިވެރިވެ ވަޑައިގެންނެވިކަމަށް އެމްއެންޑީއެފުން ބުނެއެވެ.