ދުނިޔަވީ ދިރިއުޅުމަކީ، ހީވެސް ނުކުރާ ފަދަ އެތައް ގޮންޖެހުންތަކަކާ ހުރަސްތަކެއް ގިރާ ކުރަންޖެހިފައި އޮތް ދަތުރެކެވެ. މި ދަތުރުގައި ދިމާވާ އެކިއެކި ހާދިޘާތަކުގައި، ކުރިއަށް ދިއުމަށް އޮތް ހަނި ފުރުޞަތުވެސް ބަންދުވީއޭ ހިތަށް އަރާ ފަހަރު އާދެއެވެ. މެދުވެރިވާ ކަމެއްގެ ސަބަބުން، ދިރިއުޅުމުގެ އިމްތިޙާނުން ފެއިލްވެއްޖެ ކަމަށް ބަލާ ފަހަރުވެސް އާދެއެވެ. ނަމަވެސް، ގަދަ ހިތްވަރާއި އަޒުމާއެކު ދިރިއުޅުމާ ކުރިމަތިލާ، ކިތަންމެ ބޮޑު ތަކުލީފެއް ޖެހި، ކިތަންމެ ދަތި ހާލުގައި އުޅެން ޖެހުނު ކަމުގައި ވީ ނަމަވެސް، އަމިއްލަ ފައިމައްޗަށް ތެދުވެ، އިމްތިޙާނުން ކާމިޔާބު ހޯދަން ގަދަ އަޅާ މަސައްކަތް ކުރާ މީހުން ފެނެއެވެ. އެއީ ތަޢުރީފު ޙައްޤު ޝަޚްސުންތަކެކެވެ. އެފަދަ އެކަކީ، ޢުރުދުންގެ ޢުމަރު އަލް މަޝާރަހްއެވެ.

ޢުރުދުންގެ ވެރިރަށް އައްމާންގައި ހުޅުވާފައި ހުރި ކުޑަކުޑަ ވޯކްޝޮޕެއްގެ ތެރޭގައި، ލަކުޑިން އެކި ކަހަލަ ސާމާނު އުފެއްދުމުގެ މަސައްކަތުގައި އަވަދިނެތި އުޅެމުން ދިޔަ ޢުމަރަކީ މީގެ ކުރިން ޓްރަކް ޑްރައިވަރެއްގެ ގޮތުގައި  މަސައްކަތް ކުރި މީހެކެވެ. އެ މަސައްކަތުގައި އުޅުމުގެ ތެރޭގައި، ޢުރުދުންއިން އިރާޤަށް ކުރި ދަތުރެއްގެ މަތީގައި އޭނާގެ ދެފައިގެ ބޭނުން ކެނޑިދިޔައެވެ. އެއީ އޭނާ ދުއްވަމުން ދިޔަ ޓްރަކް ވަގަށް ނެގުމަށް މަސައްކަތް ކުރި ގުރޫޕަކުން ދިން ހަމަލާއަކާ ގުޅިގެންނެވެ. ހަމަލާގައި ލިބުނު އަނިޔާގެ ސަބަބުން، ޢުމަރުގެ ދެފައި ބުރިކޮށްލަން މަޖުބޫރުވިއެވެ.

ކުރިމަތިވި ޖިސްމާނީ ނުކުޅެދުންތެރިކަމާއެކު، ދުރު ރާސްތާ ދަތުރުތައް ކުރުމަކީ، ޢުމުރުން 55 އަހަރުގެ ޢުމަރަށް މާ ފަސޭހަ ކަމަކަށް ނުވިއެވެ. އެހާ ހިސާބުންވެސް އޭނާ ހިތްވަރު އެލުވައެއް ނުލައެވެ. އަމިއްލަ މަސައްކަތުން، ދިރިއުޅުމައިގެން ކުރިއަށް ދިއުމަށް އޭނާ ތެދުވީ، ސާބިތުކަމާ އެކީގައެވެ. ނަމަވެސް، މުޅިން ތަފާތު ރާސްތާއަކުންނެވެ.

އޭނާގެ އަމިއްލަ މަސައްކަތުން، ވަޑާން ކުރުމުގެ ފަންނުވެރިކަން ޢުމަރު ދަސްކުރީ މީގެ 18 އަހަރު ދުވަސް ކުރިންނެވެ. އަދި އަމިއްލަ ވަޑާންގެއެއް ނުވަތަ ވޯކްޝޮޕެއް ހުޅުވިއެވެ. އެއަށްފަހު ޢުމަރު ދަނީ، ލަކުޑި ފޮށިގަނޑުތަކާ، ގަސްއިންދާ ޕޮޓާއި އެނޫންވެސް ގެވެހި ކަންވާރުގެ ސާމާނުތައް، އެކިއެކި ވިޔަފާރިތަކަށް އުފައްދާ، ތައްޔާރުކޮށްދެމުންނެވެ. ދެ ދަރިންގެ ބައްޕައެއް ކަމަށްވާ ޢުމަރުގެ ޢާއިލާގެ ޚަރަދުތައްވެސް ބަލަހައްޓަނީ، ޚުދު އޭނާގެ މަސައްކަތުންނެވެ.

ޢުމަރަށް ދިރިއުޅެން ޖެހިފައިވާ ޤައުމަކީ ވަޒީފާ ނުލިބުމުގެ ބަލިމަޑުކަން، އޭގެ އެންމެ އިންތިހާއަށް ފެތުރިފައިވާ ޤައުމެކެވެ. 2015 ވަނަ އަހަރުގެ ތަފާސް ހިސާބުތަކާ ހަވާލާދީ، ޖޯޑަން ލޭބަރ ވޮޗްއިން އާންމުކޮށްފައިވާ މަޢުލޫމާތަށް ބަލާއިރު، ޢުރުދުންގައި ތިބި ނުކުޅެދޭ މީހުންގެ ތެރެއިން ޢުމުރުން 15 އަހަރުން މަތީގެ މީހުންގެ އާބާދީއިން، ވަޒީފާއެއްގައި އުޅެނީ 7.7 ޕަސެންޓް މީހުންނެވެ.

މި ހުރިހާ ގޮންޖެހުންތަކަކާ އެކުވެސް، ޢަބުރުވެރި ދިރިއުޅުމެއްގައި، ގަދަ ހިތްވަރު ދައްކަމުންދާ ޢުމަރަކީ، ތަފާތު އެކި ސަބަބުތަކާއި ހުރަސްތަކާ ހެދި މާޔޫސްވެ، ދިރިއުޅުންމަތިން ފޫހިވެފައި ތިބި އެތައް ބަޔަކަށް ޢަޒުމާއި ރޫޙު އާކޮށްދޭނެ މީހެއް ކަމުގައި ދެންނެވިދާނެއެވެ.