ކާއްޓެއް ވިއްކުމަށް ނިންމާފައިވަނީ 06 ރުފިޔާއަށް : އެސްޓީއޯ

ކާށި ޝިޕްމެންޓެއް ގެނައުމަށް ނިންމީ ސަޕްލައި ނެތުމުން ކަމަށާއި، ކާއްޓެއް ވިއްކުމަށް ނިންމާފައިވަނީ 06 ރުފިޔާއަށް ކަމަށް އެސްޓީއޯއިން ބުނެފިއެވެ.

ރާއްޖެއެމްވީއަށް އެސްޓީއޯގެ މީޑިއާ އޮފިޝަލް ވިދާޅުވީ ހޯމަ ދުވަހު ކާށީގެ ޝިޕްމެންޓް ލިބޭނެ ކަމަށެވެ. މިވަގުތު ކާށީގެ ޝިޕްމެންޓެއް ގެނައުމަށް ނިންމީ ސަޕްލައި ނެތުމުން އަގު ކޮންޓްރޯލް ކުރުމުގެ ގޮތުން ކަމަށާއި، މިވަގުތު ކާއްޓެއް ވިއްކުމަށް އަދި ނިންމާފައިވަނީ 06 ރުފިޔާއަށް ކަމަށެވެ. އަދި ވިދާޅުވީ މަރކެޓަށް ކާށި ނެރުމަކީ އެސްޓީއޯއިން އަބަދު ކުރާނެ ކަމެއް ނޫން ކަމަށެވެ.

ކުރިއަށް އޮތްތަނުގައި ކާށި އެތެރެކުރުމުގެ ވިސްނުން އެސްޓީއޯގެ ނެތްއިރު، ރާއްޖެފަދަ ގައުމަކަށް ބޭރު ގައުމަކުން ކާށި އެތެރެ ކުރުމަކީ ވަރަށް ދެރަމެއްގެ ގޮތުގައި ބައެއް މީހުން ފާހަގަކުރެއެވެ. އަދި އަތޮޅުތެރޭގެ ރަށްރަށުގައި ރުށްގަސް އިންދާ އިތުރު ކުރުމަކީ ކުރިއަށް އޮތްތަނުގައި ވަރަށް މުހިންމު ކަމެކެވެ.

ރަމަޟާން މަހާ ދިމާކޮށް، އެހެން އަހަރުތަކެކޭ އެއްފަދައިން މިއަހަރުވެސް އާންމުން ބޭނުންވާ އަސާސީ ބާވަތްތައް އެތެރެކުރުމަށް އިސްކަންދޭ ކަމަށް އެސްޓީއޯއިން ބުނެއެވެ. ރޯދަމަހާ ދިމާކޮށް ތަކެތީގެ އަގު އުފުލިގެންދާ މިންވަރު ދިރާސާކުރަމުން ގެންދިޔަ ކަމަށާއި، އަގުތައް އެއްވަރެއްގައި ހިފެހެއްޓުމަށް ގިނަ މަސައްކަތްކަތެއް ކުރުމަށް ރާވާފައިވާ ކަމަށް އެސްޓީއޯއިން ބުނެއެވެ.

ރަމަޟާން މަހާއި ދިމާކޮށް، ބާޒާރުގެ ތަކެތީގެ އަގު އުފުލޭއިރު މިއަހަރުގެ ރޯދަ މަހު އަގު އެންމެ ބޮޑަށް އުފުލުނު އެކައްޗަކީ ކާއްޓެވެ. އެގޮތުން ބާޒާރުގައި ކާށީގެ އަގު ވަނީ 30 ރުފިޔާއިން މައްޗަށް ވެސް އަރާފައެވެ. އެސްޓީއޯއިން ކާށި ގެނެސް ވިއްކުމަށް ނިންމާފައިވަނީ 6 ރުފިޔާއަށެވެ.