ގދ. މަޑަވެލީގައި މަގެއްގެމަތީ އަންހެނަކަށް އަނިޔާކުރި މީހާ ޝަރީއަތް ނިމެންދެން ބަންދުކުރުމަށް މަޑަވެލި މެޖިސްޓްރޭޓް ކޯޓުން އަމުރުކޮށްފިއެވެ.
މަޑަވެލިން ހައްޔަރުކޮށްފައިވަނީ އުމުރުން 33 އަހަރުގެ ފިރިހެނެކެވެ. ހައްޔަރު ކުރި މީހާ އަނިޔާ ކުރީ އޭނާ ލޯބީގެ ގޮތުން ގުޅިގެން އުޅޭ އަންހެނަކަށެވެ. ފިރިހެން މީހާ އެ އަންހެން މީހާ ދަމާ ކޫތާފައި މަގުމަތީގައި ގެންދާ މަންޒަރު ފެންނަ ވީޑިއޯއެއް ސޯޝަލް މީޑިޔާގައި ވަނީ އަންގާރަ ދުވަހު ވަރަށް ބޮޑަށް ވައިރަލްވެފައެވެ.
އެވީޑިއޯގައި ފިރިހެން މީހާ އަންހެން މީހާ ގައިގައި ވަރަށް ބާރަށް ޖަހާ މަންޒަރު ފެންނައިރު އެމީހުން ފަހަތުން ގިނަ ބަޔަކު އަންނަ މަންޒަރު ފެނެއެވެ. އަދި އޭނާ ހުއްޓުވުމަށް މަސައްކަތްކުރާތަން ވެސް ފެނެއެވެ. ވީޑިއޯއިން ފެންނަ މަންޒަރު ގިނަ ބަޔަކު ކުށްވެރިކޮށް ޝުއޫރުތައް ފާޅުކޮށްފައިވާއިރު އެކަން ކަމާބެހޭ ފަރާތްތަކުގެ ސަމާލުކަމަށް ވަނީ އައިސްފައެވެ.
ހިއުމަން ރައިޓްސް ކޮމިޝަނުން އެކަން ކުށްވެރިކޮށްފައިވާއިރު އަނިޔާލިބުނު އަންހެން މީހާއަށް ފަރުވާ ދިނުމަށް ފަހު ދޫކޮށްލުމުން ޖެންޑާ މިނިސްޓްރީން ވަނީ އެ އަންހެން މީހާއަށް ހިމާޔަތްދީފައެވެ. އަދި މިނިސްޓްރީގެ ފަރާތުން ވަނީ އެ މައްސަލަ ފުލުހަށް ހުށަހަޅާފައެވެ.
