ގުޅި، ގުރައިދޫ، މާފުއްޓަށްޓަކައި ދެފައި އެއްތާ ނުޖަހައި އުޅޭނެ މީހަކު ބޭނުންވޭ، އެ މީހަކީ އަޅުގަނޑު: ޝާޒް
މި ދާއިރާގެ ރަށްތަކަށް ތަރައްގީ އައިސްފައިވާކަމަށް ވިދާޅުވި
އިބްރާހީމް ޝާޒް
ގުޅި، ގުރައިދޫ، އަދި މާފުށީގެ ތަރައްގީއަށްޓަކައި ދެފައި އެއްތާ ނުޖަހައި އުޅޭނެ މީހަކު ބޭނުންވާ ކަމަށާއި، އެއީ އޭނާކަމަށް، ގުރައިދޫ ދާއިރާގެ ބައި އިލެކްޝަންގައި އެމްޑީޕީގެ ޓިކެޓުގައި ވާދަކުރައްވާ އިބްރާހީމް ޝާޒް ވިދާޅުވެއްޖެއެވެ.
ކ. ގުޅީގައި، ގުރައިދޫ ދާއިރާގެ ބައި އިލެކްޝަންގެ ކެމްޕޭން ރަސްމީކޮށް ފެށުމަށް ބޭއްވި ޖަލްސާގައި ވާހަކަފުޅު ދައްކަވަމުން ޝާޒް ވިދާޅުވީ، މި ސަރުކާރުގެ ތަރައްގީ ހިނގަނީ ރަށްރަށުގެ ސައިޒަށް ނުބަލައި، ބޮޑު ރަށެއް ކުޑަ ރަށެއް ބެލުމެއް ނެތި ކަމަށެވެ. އަދި ކޮވިޑްގެ ދަތި ދެ އަހަރާއެކުވެސް ގުރައިދޫ ދާއިރާގެ ރަށްރަށަށް އައި ތަރައްގީ ގާތުން ފެންނަ ކަމަށް އޭނާ ވިދާޅުވިއެވެ.
ޝާޒް ވިދާޅުވީ ރަށްފުށުގައި ދިމާވާ އެންމެ ބޮޑު ދަތިކަމަކީ ބިންފުރި ތޮއްޖެހުން ކަމަށާއި، މާފުއްޓާއި ގުރައިދޫ ބިމުގެ ދަތިކަން ވަނީ ހައްލުވެފައި ކަމަށެވެ. އަދި އެއިން ކޮންމެ ރަށަކަށް ޕިކްނިކް އައިލެންޑެއް ވަނީ ލިބިފައިވާ ކަމަށާއި، ގުޅީގެ ބިން ހިއްކުން ކޮންޓްރެކްޓް ކުރެވި އެމްޓީސީސީއާ ވަނީ ހަވާލުކުރެވިފައިކަމަށާއި، ބަލަބަލައި ތިއްބައި ދަތްގަނޑު ވައްޓާލާނެ ކަމަށް އޭނާ ވިދާޅުވިއެވެ.
މި ދާއިރާގެ ރަށްތައް އޮތީ މާލެ ކައިރީގައި ކަމަށާއި، ނަމަވެސް މި ރަށްތަަކަށް އަންނަ ކުރިއެރުން ކުރިން އޮތީ ކުރިން އޮބަހައްޓައި، ހިފަހައްޓާފައިކަމަށް އޭނާ ވިދާޅުވިއެވެ. ސިޔާސަތަށް ގެނައި ބަދަލާއެކު މި ރަށްތައް ދުއްވައިގަތް ގޮތް ކައިރިން ފެނިވަޑައިގެންފައިވާކަމަށް ޝާޒް ވިދާޅުވިއެވެ. އެމްޑީޕީއަކީ އެއީ ކަމަށާއި، އެ ޕާޓީގެ ޓިކެޓުގައި އޭނާ އެ ވާދަކުރައްވަނީ އެމްޑީޕީގެ ތަސައްވަރު ރައްޔިތުންނާ ވީހާވެސް ގާތުން ބޭއްވެވުމަށް ކަމަށް އޭނާ ވިދާޅުވިއެވެ.
ރައްޔިތުންގެ މަޖިލީހަށް މި ވަންނަވަނީ އެ ތަނުގައި ގޮނޑިއެއް ހޫނުކުރައްވަން ނޫންކަމަށާއި، ރައްޔިތުންގެ ގުޅި، ގުރައިދޫ، އަދި މާފުށީގެ ތަރައްގީއަށްޓަކައި ކަމަށް އޭނާ ވިދާޅުވިއެވެ.
