2015އިން 2017އަށް، އިއުލާން ނުކޮށް އެމްޕީއެލްއިން 86 މިލިއަން ރުފިޔާގެ މުދާ ހޯދާފައިވޭ
22 މާރިޗު 2023 | ބުދަ 14:06އޮޑިޓަރ ޖެނެރަލްގެ އޮފީހުން މިހެން ބުނެފައިވަނީ ބުދަ ދުވަހު ބޭއްވި މާލިއްޔަތު ކޮމިޓީގެ ބައްދަލުވުމުގައި
އެމްޕީއެލްގެ މަސައްކަތްތައް
މޯލްޑިވްސް ޕޯޓްސް ލިމިޓެޑް (އެމްޕީއެލް)އިން, 2015އިން 2017ގެ ނިޔަލަށް، އާއްމުކޮށް އިއުލާންކޮށް އަދި ބީލަމަށް ހުޅުވާލުމަކާނުލައި، 86 މިލިއަން ރުފިޔާގެ މުދަލާއި ޚިދުމަތް ހޯދާފައިވާ ކަމަށް އޮޑިޓަރ ޖެނެރަލްގެ އޮފީހުން ހާމަކޮށްފިއެވެ.
އޮޑިޓަރ ޖެނެރަލްގެ އޮފީހުން އެފަދައިން ބުނެފައިވަނީ ބުދަ ދުވަހު ބޭއްވި މާލިއްޔަތު ކޮމިޓީގެ ބައްދަލުވުމުގައެވެ. މި ބައްދަލުވުމަކީ އޮޑިޓަރ ޖެނެރަލްގެ އެދިވަޑައިގަތުމަކަށް ކުރިއަށް ގެންދިޔަ ބައްދަލުވުމެކެވެ.
އޮޑިޓަރޖެނެރަލްގެ އޮފީހުން ބުނެފައިވަނީ، އެ ރިޕޯޓްގައި ހިމެނެނީ 2015އިން 2017ވަނަ އަހަރާ ހަމައަށް ކުންފުނިން އަމަލުކުރި ގޮތުގެ މައްޗަށް ކަމަށް ވަނީ ބުނެފައެވެ. އެގޮތުން ކުންފުނިން ޕްރޮކިއުމެންޓް އުސޫލަށް އަމަލުކުރި މިންވަރާއި، ކުންފުނީގެ ގަވާއިދުތަކާއި އުސޫލުތަކަށް އަމަލުކުރި މިންވަރަށް ބަލާފައިވާނެކަމަށް ވަނީ ބުނެފައެވެ. މީގެ އިތުރުން މުދަލާއި ޚިދުމަތް ހޯދުމުގައި އިންޓަރނަލް ކަންކަން، ނުވަތަ ކުންފުނީގެ އެތެރޭގެ ހިންގުން ގާއިމް ކުރެވިފައިވާ ގޮތަށްވެސް ބަލާފައި ވާނެކަަމަށް އޮޑިޓަރ ޖެނެރަލްގެ އޮފީހުން ވަނީ ބުނެފައެވެ. ހަމައެހެންމެ ޕޮލިސީ ގައިޑްލައިންތަކާ އެއްގޮތަށް ކަންކަން ހިނގާފައިވޭތޯވެސް ވަނީ ބަލާފައެވެ.
2015އިން 2017ގެ ނިޔަލަށް، ވާދަވެރި ބީލަމުގެ އުސޫލުން ތަކެތި ހޯދުމުގެ މަސައްކަތް ކުރިއަށް ދިޔަނަމަވެސް، ހާމަކަން ބޮޑުކޮށް ބީލަމަށް ހުޅުވާނުލައި އެފަދަ ކަންކަންކުރިއަށް ގެންގޮސްފައިވާ ކަމަށްވެސް އެ ރިޕޯޓުގައި ފާހަގަކޮށްފައިވެއެވެ. އެގޮތުން ހޯދާފައިވާ މުދާ ހޯދާފައިވަނީ ކުންފުނީގެ މެނޭޖްމެންޓުން ތިން ފަރާތަކުން، ނުވަތަ އެއަށްވުރެ މަދު ފަރާތުން ކޯޓޭޝަން ހޯދައިގެން ކަމަށް އޮޑިޓަރ ޖެނެރަލްގެ އޮފީހުން ބުނެއެވެ. އެ ކޯޓޭޝަންތައް ކުންފުނީގެ ޑިރެކްޓަރުންގެ ބޯޑަށް ހުށަހެޅުމުން، އެ ހުށަހެޅުންތައް ފުރިހަަމައަށް އިވަލުއޭޓްނުކޮށް، ވަކި ފަރާތަކަށް މަސައްކަތައް ހަވާލުކޮށްފައިވާކަމަށް ވަނީ ބުނެފައެވެ. އަދި ކުއްލި ހާލަތެއް ނުވަތަ އިމަރޖެންސީ ހާލަތެއް މެދުވެރި ނުވަނީސް، އެމަޖެންސީ ޕްރޮކއިުމެންޓުގެ އުސޫލުންވެސް މަސައްކަތްތައް ހަވާލުކޮށްފައިވާކަމަށް ވަނީ ބުނެފައެވެ.
