އިއާދަކުރަނިވި ހަކަތައިން ކަރަންޓު އުފައްދާ ނިޒާމުތައް ގާއިމުކުރުމުގެ މަސައްކަތް ބާރު ދުވެލީގައި ކުރިއަށް ގެންދިޔަ ނަމަވެސް ކަރަންޓު ހެޔޮގޮތުގައި ބޭނުންކުރުމަށް ބާރުއަޅަންޖެހޭ ކަމަށް މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޮލޯޖީގެ ޑެޕިއުޓީ މިނިސްޓަރު އަލީ މާޖިދު ވިދާޅުވެއްޖެއެވެ.

"ހަކަތަ ސަމަކާރަ" ގައުމީ ކެމްޕެއިން އިފްތިތާހް ކުރުމަށް ބޭއްވި ރަސްމިއްޔާތުގައި ޑެޕިއުޓީ މިނިސްޓަރު އަލީ މާޖިދު ވިދާޅުވީ ދުނިޔޭގެ މޫސުމީ ބަދަލާއި ގުޅިގެން އަންނަ ގޮންޖެހުންތައް އެންމެ ބޮޑަށް އިހުސާސްކުރަންޖެހޭ އެއްގައުމަކީ ރާއްޖެ ކަމަށެވެ. ބިންތިރި ޖަޒީރާ ގައުމަކަށްވުމުން ޚާއްސަ ސަމާލުކަމެއް މޫސުމަށް ދޭންޖެހޭ ކަމަށް އޭނާ ވިދާޅުވިއެވެ.

ކަރަންޓު އުފެއްދުމަށް ރާއްޖެއިން ބޭރުން ތެޔޮ އެތެރެ ކުރުމަށް ބޮޑު ޚަރަދެއް ކުރަންޖެހޭކަން ފާހަގަކުރައްވައި މާޖިދު ވިދާޅުވީ މިކަމަށް ހައްލެއް ހޯދުމަށް އިއާދަކުރަނިވި ހަކަތައިން ކަރަންޓު އުފައްދާ ނިޒާމުތައް ގާއިމުކުރުމުގެ މަސައްކަތް ބާރު ދުވެލީގައި ކުރިއަށް ގެންދިޔަ ނަމަވެސް ކަރަންޓު ހެޔޮގޮތުގައި ބޭނުންކުރުމަކީ ވަރަށް މުހިންމު ބޭނުންތެރި ކަމެއް ކަމަށެވެ. އަދި ދިރިއުޅުމުގެ ވައްޓަފާޅިއަށް ގެންނަ ކުދިކުދި ބަދަލުތަކުން ސަލާމަތްކުރެވޭ ފައިސާއަކީ ތަރައްގީގެ މަސައްކަތްތައް ކުރުމަށް ބޭނުންކުރެވޭނެ ފައިސާ ކަމަށް މާޖިދް ވިދާޅުވިއެވެ.

ހަކަތަ ސަމަކާރަ ކެމްޕެއިންގެ ދަށުން ކުރެވޭ މަސައްކަތްތަކަށް އަލިއަޅުއްވާލައްވައި މާޖިދް ވިދާޅުވީ ނިސްޓްރީއިން/ސަރުކާރު ހިއްސާވާ ކުންފުނިތަކުން ހަކަތަރި އާލާތްތަކަށް އިސްކަންދިނުމަށް އެމް.އޯ.ޔޫގައި ސޮއިކުރުމާއި، ހަކަތަ ސަމަކާރަ ކުރުމާއި ހަކަތަ އިޤްތިޞާދުކުރުމަށް އެގްޒިބިޝަންއެއް ބޭއްވުމާއި، ސްކޫލް ދަރިވަރުން، ޓީޗަރުން، ނޫސްވެރިން، އަދި އެކި އެކި އިދާރާތަކަށް އަމާޒުކޮށްގެން ހަކަތަ ސަމަކާރަކުރުމަށް ހޭލުންތެރިކުރުވުމުގެ ޕްރޮގްރާމުތައް ހިންގުމާއި އަދި ސޯޝަލް މީޑިއާ އާއި ޚަބަރުތަކުގައި ހަކަތަ އިގްތިސާދުކުރުމާއި ގުޅޭ މައުލޫމާތު ޝާއިއުކުރުން ހިމެނޭ ކަމަށެވެ.

ރާއްޖެއަކީ ތިމާވެއްޓާއި ރައްޓެހި ނަމޫނާ ގައުމަކަށް ހެދުމަށް މިނިސްޓްރީން ދަނީ ގިނަ މަސައްކަތްތައް ކުރަމުންނެވެ.