ދެމެހެއްޓިނިވި ދިރިއުޅުމަކަށް ކުނި ބަލާ "ދޮރުން – ދޮރަށް"

ދެމެހެއްޓެނިވި ދިރިއުޅުމުގެ އާދަކާދައިގެ ވާހަކައަކީ ތާ އަބަދުމެ ދައްކާ ވާހަކައެކެވެ. ނަމަވެސް، އެކަމަކަށް ޢަމަލީ ސިފައެއް ގެނައުމަށް މަސައްކަތް ކުރާތީ ފެންނަނީ މަދު ބައެކޭވެސް ދެންނެވިދާނެއެވެ. އެކަމަށް ހިނގާ ޚަރަދާއި، އުފުލަން ޖެހޭ ބުރައިގެ ބޮޑު ކަމުން ކަމުގައިވެސް ވެދާނެއެވެ. ފަރުދީ ފެންވަރެއްގައި ކުރަން ވަކިން ތަކުލީފު ބޮޑު ކަމެއް ކަމުން، ދެމެހެއްޓެނިވި ދިރިއުޅުމުގެ އާދަތައް އަށަގެންނެވުމަށް އަތުކުރި އެއް ބަޔަކީ، އެކުވެރި ޢަރަބި ޢިމާރާތް (ޔުއޭއީ)އަށް ނިސްބަތްވާ "ރީކެޕް"އެވެ.

ކުނި މެނޭޖްކޮށް، ދެމެހެއްޓެނިވި ދިރިއުޅުމުގެ އާދަތައް އަށަގެންނެވުމަށްޓަކާއި "ރީކެޕް"ގެ ޓީމުން، އާންމުން ދިރިއުޅޭ ގެތަކާއި ވިޔަފާރި ކުރާ ތަންތަނަށް ގޮސް ހަދައެވެ. "ދޮރުން – ދޮރަށެވެ."

ޙަޤީޤަތުގައި "ރީކެޕް"އަކީ ޑިޖިޓަލް ޕްލެޓްފޯމެކެވެ. 46000 އެއްހާ ކަސްޓަމަރުންނާ އެންމެ ކުލިކެއް ދުރުގައި އޮތް "ރީކެޕް"ގެ އާބާދީ ހައްތަހާ ދަނީ ބޮޑުވަމުންނެވެ. "ރީކެޕް"އިން ވަނީ އުކާލާ ކުނި އަލުން ބޭނުން ކުރުމަށް ކުރަން ޖެހޭ ޚަރަދު ސުން ރޭޓަށް ތިރި ކޮށް، އަބޫދާބީއާއި ދުބާއީގެ ރަށްވެހިން އެކަމަށް އުފުލަން ޖެހޭ ތަކުލީފުތަކަށް ލުއި ހޯދާ ދީފައެވެ.

ކުޑަ ކުދިންގެ ހިތްތަކުގައި، ދެމެހެއްޓެނިވި މުސްތަޤުބަލުގެ ރޫޙު އަށަގެންނެވުމުގެ ގޮތުން، "ރީކެޕް"އިން ވަނީ، ރީސައިކަލް ކުރުމަށް ހާއްސަކޮށްގެން ސްކޫލްތަކުގައިވެސް ފޮށިތަކެއް ބަހައްޓާފައެވެ. ޝިޢާރެއް ކަމުގައި ވަނީ، "ކޮންމެ ފުޅިއެއްވެސް ގުނޭނެ" މި ޝިޢާރެވެ.

ދުބާއީގައި ހިންގާ ރީޖެންޓް އިންޓަރނޭޝަނަލް ސްކޫލްގެ ކީ ސްޓޭޖް 1ގެ އިސްވެރިޔާ ޖޮއޭން ލެޒްލީ ވިދާޅުވީ، އެ ސްކޫލްގެ ޓީޗަރުންނަކީވެސް އުކާލާ ކުނި، އަލުން ބޭނުން ކުރުމުގެ ޘަޤާފަތް ކުރިއަރުވާ، އެކަމަށް ހިތްވަރު ދޭ ބައެއް ކަމަށެވެ.

އަލުން ބޭނުން ކުރުމަށް ނުވަތަ ރީސައިކަލް ކުރުމަށް ހިތްވަރު ދިނުމުގެ ގޮތުން "ރީކެޕް"އިން ދަނީ، ކޮތަޅުތަކުގެ ބަރުދަން ބަލާ، އެ މަޢުލޫމާތު ނޯޓު ކުރަމުންނެވެ. އަދި އެ މަޢުލުމާތަށް ބަލާ ޕޮއިންޓް ދެއެވެ. ޕޮއިންޓާ އެކު ލިބޭ ވައުޗަރުތަކަކީ، "ރީކެޕް"ގެ ޕަރޓްނަރ ކުންފުނިތަކުގައި ބޭނުން ކުރެވޭ ވައުޗަރުތަކެކެވެ.

ދުބާއީގައި "ރީކެޕް"އިން ދާދި ފަހުން ހުޅުވި ގުދަނުގައި ކުރިއަށް ދަނީ އަލުން ބޭނުން ކުރެވެން ހުރި ކުނިބުނި، ބައިބަޔަށް ވަކި ކުރުމުގެ މަސައްކަތެވެ. އެއަށްފަހު، "ރީކެޕް"އާ ޕަރޓްނަރޝިޕް ހަދާފައި ވާ، އުފެއްދުންތެރިކަމުގެ ސިނާޢަތުގައި ހަރަކާތްތެރިވާ ފަރާތްތަކަށް އެ ތަކެތި ފޯރުކޮށްދެއެވެ.

2020 ވަނަ އަހަރުން ފެށިގެން މިހާތަނަށް ބަލާއިރު، "ރީކެޕް"އިން އެއްކުރި، އަލުން ބޭނުން ކުރެވިދާނެ ނުވަތަ ރީސައިކަލް ކުރެވިދާނެ ފަދަ ކުނިބުނީގެ ބަރުދަން، 558 ޓަނަށް އަރައެވެ. އޭގެ ތެރޭގައި 20 މިލިއަން ޕްލާސްޓިކް ފުޅި، 1 މިލިއަން (ސޮޑާ ހުސްކުރާ ވައްތަރު) ދަޅު، 840000 (ކިރު ހުސްކުރާ ވައްތަރު) ދަޅު އަދި 500000 ޕްލާސްޓިކް ޓްރޭ ހިމެނެއެވެ. މި މުއްދަތުގައި "ރީކެޕް"އިން ވަނީ، ޖައްވު ހޫނުކުރާ ވިހަ ގޭސް ކަމަށް ވާ ސީއޯ-ޓޫ ބޭރު ކުރާ މިންވަރު، 1180 ޓަން ދަށްކޮށްދީފައެވެ.