ރޯދަމަހަށް ޚާއްސަކޮށް ހުޅުމާލެ ފޭސް ދޭއްގައި އެސްޓީއޯގެ ފިހާރައެއް ހުޅުވައިފި

ރޯދަމަހަށް ޚާއްސަކޮށް ހުޅުމާލެ ފޭސް ދޭއްގެ ވިނަރެސް ފްލެޓް (9 ނަންބަރު ޓަވަރު) ގެ ތިރީގައި "ރޯދަ މާޓް" ގެ ނަމުގައި އެސްޓީއޯ އިން ފިހާރައެއް ހުޅުވައިފިއެވެ.

ހުކުރު ދުވަހު މި ފިހާރަ ރަސްމީކޮށް ހުޅުވައިދެއްވީ އެޗްޑީސީގެ ގެ މެނޭޖިން ޑިރެކްޓަރު އަހްމަދު އާތިފާއި އެސްޓީއޯގެ މެނޭޖިން ޑިރެކްޓަރު ހުސައިން އަމްރުއެވެ.

ނޫސްވެރިންނަށް މައުލޫމާތު ދެއްވަމުން ސޭލްސް މެނޭޖަރު އަބްދުﷲ ސައީދު ވިދާޅުވީ ފިހާރަ ހުޅުވުމުގެ މަޤްސަދަކީ ރައްޔިތުންނަށް ހެޔޮ އަގުގައި މުދާ ފޯރުކޮށްދިނުން ކަމަށެވެ. ސައީދު ވިދާޅުވީ ލީޒިންގް ޕާޓްނަރުންގެ މުދާތައް ވެސް އެތަނުން ލިބޭނެ ގޮތަށް ކަމަށާއި ރާއްޖޭގެ ދަނޑުވެރިން ހައްދާ ތަކުރާރީގެ ބާވަތްތައް ވެސް ތާޒާކަންމަތީ ލިބިގެންދާނެ ކަމަށެވެ.

ސައީދު އިތުރަށް ވިދާޅުވީ ރޯދަ މަހު އެސްޓީއޯ ފިހާރަ ކުރިމަތީގައި ހެދިކާ ވިއްކުމުގެ ފުރުސަތު އާންމުންނަށް ދޭނެ ކަމަށާއި އެކަމާއި ގުޅޭ މައުލޫމާތުތައް ވަރަށް އަވަހަށް އާންމު ކުރާނެ ކަމަށެވެ.

މި ފިހާރައިން ހޯލްސޭލް އަދި ރީޓެއިލް ހިދުމަތްތައް ލިބޭނެއެވެ. ރޯދަ މަހަށް ޚާއްޞަކޮށްގެން އެތެރެކުރާ ފިޔާ، އަލުވި، ބިސްވެސް އެތަނުން ލިބެން ހުންނާނެއެވެ.