މިދިޔަ ފެބްރުއަރީ މަހު މާލޭގައި 178 ކައިވެނި ކުރިއިރު، 98 ވަރިކޮށްފައިވާ ކަމަށް ފެމެލީ ކޯޓުން ބުނެފިއެވެ.

ފެމެލީ ކޯޓުން އާއްމުކޮށްފައިވާ ތަފާސްހިސާބުތަކުން ދައްކާ ގޮތުގައި ފެބްރުއަރީ މަސް ނިމުނުއިރު ވަރިއާ ގުޅޭ އިތުރު 114 މައްސަލައެއް ނުނިމި ކޯޓުގައި އެބައޮތެވެ. އަދި ކުރީމަހުގެ ބާކީހުރި ބައިތަކާއެކު އެ މަހު ނިންމި ވަރީގެ މައްސަލަތައް 140 އަށް އަރައެވެ.

ވަރިއާ މެދު ޝައްކުވެގެން ފެބްރުއަރީ މަހުގެ ތެރޭގައި ދެ މައްސަލައެއް ހުށަހަޅާފާވާއިރު، ދެ މައްސަލައެއް ނިންމާފައިވެއެވެ. އަދި ވަރިއާމެދު ޝައްކުވެގެން ހުށަހެޅި އެއް މައްސަލަ ނުނިމި އެބަ އޮތެވެ.

މީގެ އިތުރުން ފެބްރުއަރީ މަހުގެ ތެރޭގައި ވަރި ސާބިތުކުރުމަށް 67 މައްސަލައެއް ހުށަހަޅާފައިވެއެވެ. އަދި ޖެނުއަރީ މަހުގެ ބާކީ ހުރި 29 މައްސަލައާއެކު ޖުމްލަ 63 މައްސަލައެއް ނިންމާފައިވެއެވެ. މަސް ނިމުނުއިރު، 33 މައްސަލަ ނުނިމޭ ކަމަށް ތަފާސްހިސާބުތަކުން ދައްކައެވެ.

ފެމެލީ ކޯޓުން ނިންމާފައިވާ އެހެނިހެން މައްސަލަތަކަށް ބަލާއިރު، ފެބްރުއަރީ މަހުގެ ތެރޭގައި ކުޑަކުދިންނާއި ގުޅުންހުރި 14 މައްސަލައެއް ނިންމާފައިވެއެވެ. އާއިލީ 12 މައްސަލައެއް ނިންމާފައިވާއިރު، ޚަރަދުގެ 10 މައްސަލައެއް ނިންމާފައިވެއެވެ.