މުލީ އެއާޕޯޓް ރަންވޭގައި އޭޕްރީލް މަހު ތާރު އަޅަން ފަށަނީ، އަލިފުށީގައި ފަށާނީ އޯގަސްޓު މަހު
މި ސަރުކާރުގެ ކޮންމެ 11 ދުވަހަކުން އެމްޓީސީސީން ވަނީ މަޝްރޫއެއް ނިންމައިފައި
އެމްޓީސީސީހގެ ސީއިއޯ އާދަމް އާޒިމް
އެމްޓީސީސީން މިހާރު ތަރައްގީކުރަމުން ގެންދާ އެއާޕޯޓްތަކުގެ ރަންވޭގައި ތާރު އަޅަން ފަށާނެ ތާރީހުގެ އަދާހަމަ އެ ކުންފުނީގެ ސީއީއޯ އާދަމް އާޒިމް ވިދާޅުވެދެއްވައިފިއެވެ.
އެމްޓީސީސީން ތަރައްގީކުރި ގދ. ފަރެސްމާތޮޑާ އެއާޕޯޓް ހުޅުއްވައިދެއްވުމަށް އެ ރަށުގައި ބޭއްވި ރަސްމިއްޔާތުގައި ވާހަކަ ދައްކަވަމުން އާޒިމް ވިދާޅުވީ، މި ސަރުކާރުން މިހާތަނަށް އަޅައިދިން ހޯރަފުށީ އެއާޕޯޓާއި މާވަރުލު އެއާޕޯޓާއި ފަރެސްމާތޮޑާ އެއާޕޯޓަށް ފަހުގައި އެމްޓީސީސީން މިހާރު މަސައްކަތް ނިންމަމުން އަންނަ، މުލީ އެއާޕޯޓުގެ ރަންވޭގައި ތާރު އެޅުމުގެ މަސައްކަތް، އެޕްރީލްމަހު ފަށާނެ ކަމަށެެވެ. އަދި އެ ކުންފުނިން، މަސައްކަތެއް ނިންމަމުން ގެންދާ، ފ. މަގޫދޫ އެއާޕޯޓުގެ ރަންވޭގައި ތާރު އެޅުމުގެ މަސައްކަތް ވެސް، މި އަހަރުގެ ޖޫން މަހުގެ ތެރޭގައި ފެށޭނެކަމަށް އޭނާ ވިދާޅުވިއެވެ.
މީގެ އިތުރުން، އެމްޓީސީސީން މަސައްކަތް ނިންމަމުން ގެންދާ، އަލިފުށީ އެއާޕޯޓުގެ ރަންވޭގައި ތާރު އެޅުމުގެ މަސައްކަތް ވެސް، އޮގަސްޓު މަހުގެ ތެރޭގައި ފަށާނެކަމަށް އާޒިމް ވިދާޅުވިއެވެ. އަދި އެމްޓީސީސީން މަސައްކަތްކުރަމުން ގެންދަނީ މި ދައުރުގެ ތެރޭގައި ތިން އެއާޕޯޓް ވެސް ނިންމައި މި ދައުރުގެ ތެރޭގައި ހުޅުވަންކަމަށް އޭނާ ވިދާޅުވިއެވެ.
އިތުރަށް އާޒިމް ވިދާޅުވީ، ކުޅުދުއްފުށީ އެއާޕޯޓުގެ ރަންވޭ ދިއްލޭނީ ރަންވޭގެ ޝޯ ޕްރޮޓެކްޝަންގެ މަސައްކަތް ނިންމައިގެން ކަަމަށާއި އެ މަސައްކަތް ވެސް އޭޕްރީލްމަހުގެ ތެރޭގައި ނިންމަން މަސައްކަތްކުރަމުންދާ ކަމަށެވެ. ނ. މާފަރު އެއާޕޯޓު އެކްސްޕޭންޝަން ޕްރޮޖެކްޓް ވެސް އެއް އަހަރު ތެރޭގައި ނިންމަން އަމާޒު ހިފައިފައިވާ ކަމަށެވެ.
އާޒިމް ވިދާޅުވީ މި ދައުރުގައި އެމްޓީސީސީން ޖުމުލަކޮށް އެގާރަ ދުވަހުން ޕްރޮޖެކްޓެއް ނިންމައިފައިވާ ކަމަށެވެ.
ފަރެސްމާތޮޑާ އެއާޕޯޓް ބުދަ ދުވަހުގެ ރޭ ރައީސް އިބްރާހިމް މުހައްމަދު ޞާލިހު ވަނީ ހުޅުއްވައިދެއްވައިފައެވެ. އާޒިމް ވިދާޅުވީ ސަރުކާރުން އެމްޓީސީސީއާ ހަވާލުކުރެއްވި ފަރެސްމާތޮޑާ އެއާޕޯޓްގެ ކޯޒްވޭގެ މަޝްރޫއު ވެސް ޖުލައި މަހުގެ ތެރޭގައި ނިންމަން މަސައްކަތްކުރަމުން ގެންދާ ކަމަށެވެ.
