ސިއްހީ ދާއިރާއަށް ދިގު މުއްދަތަކަށް ޚިދުމަތްކުރެއްވި މުވައްޒަފުންގެ އަގު ވަޒަންކޮށްފި
40 އަހަރަށްވުރެ ދިގު މުއްދަތަކަށް ސިއްހީ ދާއިރާއަށް ޚިދުމަތްކުރެއްވި މުވައްޒަފުންނަށް އެވޯޑްތައް ހަވާލުކޮށްދެއްވީ ރައީސް
ސިއްހީ ދާއިރާއަށް 75 އަހަރު ފުރުން ފާހަގަކުރުމުގެ މުނާސަބަތުގައި ބޭއްވި ހަފުލާގެ ތެރެއިން
ސިއްހީ ދާއިރާއަށް ދިގު މުއްދަތަކަށް ޚިދުމަތް ކުރެއްވި މުވައްޒަފުންގެ އަގު ވަޒަންކޮށްފިއެވެ.
އެމީހުންގެ އަގު ވަޒަންކޮށްފައިވަނީ ދިވެހިރާއްޖޭގައި ސަރުކާރު ހޮސްޕިޓަލްތައް ހިންގަން ފެށިތާ 75 އަހަރު ފުރުން ފާހަގަކުރުމަށް އަންގާރަ ދުވަހުގެ ރޭ ބޭއްވި ހަފްލާގައެވެ.
އެގޮތުން 40 އަހަރަށްވުރެ ދިގު މުއްދަތަށް ސިއްހީ ދާއިރާއަށް ޚިދުމަތްކޮށްފައިވާ މުވައްޒަފުންނާއި، 35 އަހަރާ 40 އަހަރާ ދެމެދުގެ މުއްދަތަކަށް ޚިދުމަތް ކޮށްދީ، ޚިދުމަތުގައި ދެމިތިބި މުވައްޒަފުންނަށް ވެސް ވަނީ އެވޯޑް ދީފައެވެ.
40 އަހަރަށްވުރެ ދިގު މުއްދަތަށް ސިއްހީ ދާއިރާއަށް ޚިދުމަތް ކުރެއްވި މުވައްޒަފުންނަށް އެވޯޑްތައް ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހެވެ.
މީގެއިތުރުން 35 އަހަރާ 40 އަހަރާ ދެމެދު ޚިދުމަތްކޮށްދީ، ޚިދުމަތުގައި ދެމިތިބި މުވައްޒަފުންނަށް އެވޯޑްތައް ހަވާލުކޮށްދެއްވީ ހެލްތު މިނިސްޓަރު އަހްމަދު ނަސީމެވެ.
މީގެއިތުރުން، މުވައްޒަފުންގެ އަގު ވަޒަންކޮށް ހަނދާނީ ފިލަޔާއި ލިޔުން ވަނީ ދީފައެވެ. ހަފްލާގައި ރައީސް ވިދާޅުވީ، ސިއްހީ ދުޅަހެޔޮކަމާނުލައި ތަރައްގީ ހާސިލު ނުވާނެކަމަށެވެ.
