ހިލޭ ޑިގްރީގެ ދަށުން، ސިއްހީ ދާއިރާއިން 2،082 ދަރިވަރުން އުނގެނެމުންދޭ: ރައީސް
ރާއްޖެއިން ބޭރުގައިވެސް 300އަށްވުރެ ގިނަ ދަރިވަރުން މި ދާއިރާއިން އުނގެނެމުންދޭ
ސަރުކާރު ހޮސްޕިޓަލްތައް ހިންގަން ފެށިތާ 75 އަހަރު ފުރުން ފާހަގަކުރުމުގެ ރަސްމިއްޔާތުގައި، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
ސަރުކާރުން ހިންގާ ހިލޭ ޑިގްރީ ޕްރޮގްރާމުގެ ދަށުން، ސިއްހީ ޚިދުމަތުގެ ތަފާތު ދާއިރާތަކުން ކިޔެވުމަށް 2،082 ދަރިވަރުން ރަޖިސްޓްރީކޮށްފައިވާކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ، ދިވެހިރާއްޖޭގައި ސަރުކާރު ހޮސްޕިޓަލްތައް ހިންގަން ފެށިތާ 75 އަހަރު ފުރުން ފާހަގަކުރުމަށް އަންގާރަ ދުވަހުގެރޭ ބޭއްވި ހަފްލާގައި ވާހަކަފުޅުދައްކަވަމުންނެވެ.
ރައީސް ވިދާޅުވީ ސިއްހީ ދާއިރާ އިތުރަށް ތަރައްގީކުރުމަށް ހިންގާ ތަރައްގީގެ މަޝްރޫއުތަކުގެ އިތުރުން، އެ ދާއިރާއިން މީހުން ބިނާކުރުމަކީވެސް ޚާއްސަ އިސްކަމެއް ދެއްވާ ކަމެއް ކަމަށެވެ. ސަރުކާރުގެ ހިލޭ ޑިގްރީ ޕްރޮގްރާމުގައި މިހާތަނަށް 16،000ށްވުރެ ގިނަ ދަރިވަރުން ބައިވެފައިވާއިރު، މީގެތެރެއިން 2،082 ދަރިވަރުންނަކީ ސިއްހީ ދާއިރާއިން ކިޔެވުމަށް ރަޖިސްޓްރީވި ދަރިވަރުން ކަމަށް ރައީސް ވިދާޅުވިއެވެ.
ސްޓޫޑަންޓް ލޯން ސްކީމާއި ސަރުކާރުގެ ސްކޮލާރޝިޕް ސްކީމްގެ ދަށުން، ރާއްޖެއިން ބޭރުގައިވެސް 300އަށްވުރެ ގިނަ ދަރިވަރުން ސިއްހީ ދާއިރާގެ ތަފާތު ރޮނގުތަކުން ތައުލީމު އުނގެނެމުން އަންނަކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ ސިއްހީ ޚިދުމަތް ރައްޔިތުންގެ އިތުބާރު ހިފޭ ޚިދުމަތެއްގެ ގޮތުގައި އޮންނާނީ ވަރަށް ގިނަ ބައެއްގެ ތެދުވެރި މަސައްކަތްތަކެއްގެ ސަބަބުން ކަމަށެވެ. މި ދާއިރާއިން އެކި ގޮތްގޮތުން، އަދި އެކި ދާއިރާތަކުން ޚިދުމަތްދެއްވާ ފަރާތްތަކުން އެ ކޮށްދެނީ ވަރަށް އަގުހުރި މަސައްކަތްތަކެއް ކަމަށް ރައީސް ވިދާޅުވިއެވެ. އަމިއްލަ އެތައް ކަމެއް ގުރުބާންކޮށް، އެ ކުރާ މަސައްކަތްތަކަށްޓަކައި ރައީސް ވަނީ ޝުކުރު އަދާކުރައްވާފައެވެ.
